DUBIA.

HIC sunt duo dubia. Primum, Utrum circa Christum fuerit cura angelica ? Secundum, Utrum receperit illuminationem ab Angelis ?

Circa primum sic proceditur.

1. Majoris est habere curam de minori: ipse autem semper fuit major quolibet Angelo : ergo de ipso non fuit cura angelica.

2. Praeterea. Fortior non. confortatur a minus forti : Christus autem fortior fuit quolibet Angelo : ergo non fuit confortatus per Angelum.

3. Praeterea, Cura habetur de aliquo ab Angelo, ut caveatur sibi a peccato : Christus autem impeccabilis fuit : ergo de ipso non fuit cura angelica.

4. Ad idem, Matth. IV, 6, super illud, Angelis suis Deas mandavit de te , dicit Glossa, quod " diabolus perverse in" tellexit de capite quod dictum est de " membris : " ergo videtur quod perversum sit dicere, quod Angeli habeant curam de ipso.

Solutio. Dicimus, quod est cura essentialis et simplex, quam Angelus habet de aliquo, ut caveat sibi a peccato et de periculis : et sic non habuerunt curam Angeli de Christo, sed per accidens tantum, instruendo illos quorum curae secundum carnem subditus erat. Ipse

enim per se nolebat eos instruere, volens in infantili aetate infantilia opera ostendere, ne putaretur phantasma esse, et non verus homo. Angelus autem dicitur confortasse eum : vel quia ad modum confortantis se habuit, vel quia ministerium confortationis ei exhibuit: ministrabant enim ei, licet de ipso curam non haberent, ut dicitur Math.IV, 11 : Ecce Angeli accesserunt, et ministrabant ei. Et per hoc patet solutio ad objecta.

Circa secundum sic proceditur.

1. Videtur, quod ab Angelis Christus potuit illuminari : quicunque enim potest crescere in scientia, potest illuminari ab alio : Christus potuit crescere in scientia, ut dicitur Luc. II, 52 : ergo potuit illuminari ab Angelo.

2. Praeterea, Dispositiones quibus subdebatur, videntur esse illuminationes.

3. Item, ad. Hebrae. II, 9, dicitur, quod minoratus est ab Angelis. Ergo potuit ab eis illuminari, cum minor a majori illuminetur.

Solutio. Dicimus, quod Christus nullo modo fuit illuminatus ab Angelis, sed omnes illuminationes immediate recipiens a deitate sibi unita.

Ad primum ergo dicendum, quod Christus non potuit crescere in habitu alicujus scientiae, sed tantum in scientia experimentali, convertendo se ad. quamdam scibilia quae prius non viderat, et ad hujusmodi crementum scientiae non est illuminatio, cum experimentum sit circa scibilia, ut dicit Philosophus.

Ad secundum dicendum,quod illae dispositiones non fuerunt factae per Angelos immediate ad ipsum, sed mediantibus his quorum cura infantia regebatur.

Ad tertium dicendum, quod non est minoratus ab Angelis secundum intellectum, sed secundum passibilitatem assumptam, sicut ibidem dicitur.