144. De sancto Erhardo.

1. Alleluia Christo decantet omnis lingua,

2. Quoniam bonus, quoniam
in aeternum misericordia eius,

3. Qui Deus homo factus est,
homines deos facere dum destinat.

4. In quorum

numero est deorum
praesul sanctus
Erhardus, Deo dilectus ;

5. Qui carne

nobilis, castus corde,

pulcher forma,

dives mundi substantia,

6. Patrem, matrem,
fratres, sorores,
domum, agros, totum
linquens saeculum,

7. Crucem suam

tollens est Christum
pauperem secutus
pauper spiritu.

8. Carnis suae vendens tunicam
spiritus emit gladium,

9. Quo accinctus ambit pervigil
Salomonis veri lectulum.

10. O quanta dignitas famuli
in conspectu Domini !

11. Quod signum Christus potentia,
servus facit gratia:

12. Oculos caeci nati

aperit manus Christi,
inauditum saeculis
ante transactis ;

13. Hoc noster et Erhardus
fortiter honoratus
signum in Ottilia
dat caeca nata,

14. Non tamen imperans

illam videre, sed impetrans,

15. Par in miraculo,

impar miraculi Domino,

16. Qui solus habere
noluit,

quae sua sunt solius,
suis sed dividit,

17. Cum ipsi in ipso
opera

faciant, quae et ipse,
horum et maiora.

18. Per quem caecos illuminas,
daemones quoque fugas,

19. Christo tuo nos committe,
praesul clemens Erharde.

20. In se sibi lux est aeterna,
in te sibi laus est aeterna,
in se nobis vita aeterna.