DUBIA

HIC dubitantur duo. Primo, cujusmodi sit ista divisio? Secundo, de numero hierarchiarum.

Circa primum sic proceditur.

1. Cum in omni divisione sit dividendum aliquod commone, quaeratur cujusmodi commune hic dividatur. Si dicatur, quod est divisio generis in species, contra est : quia cum in omni tali divisione exeant primo duo membra, non deberet dividi in tres hierarchias.

2. Praeterea, Species dividentes genus non habent ordinem in illo : cum igitur istae hierarchiae sint acceptae secundum ordinem, non crit divisio generis in species.

3. Si dicatur, quod est divisio totius in partes integrales. Contra : Nulla pars participat rationem totius : sed de qualibet hierarchia est una diffinitio communis quam supra posuit : ergo non videtur esse divisio totius in partes integrales.

Solutio. Dicimus, quod ista divisio est totius in partes, non totius integralis, sed totius potentialis : et hoc totum quasi medio modo se habet inter totum universale et totum integrale. Totum enim universale est in qualibet parte secundum totam essentiam et perfectam virtutem : essentia vero totius integralis non est in qualibet partium, sed in omnibus simul : sed essentia totius potentialis est in quaelibet parte, non tamen secundum virtutem perfectam, sed. in una tantum, sicut patet in anima : quoniam virtus ejus perfecta non est nisi in intellectiva, cum tamen essentia ejus sit etiam in sensitiva et nutritiva. Sed videndum qualiter possit hoc esse, cum virtus fluat ab essentia, et aliquid habet totam essentiam quod non habeat totam virtutem, Sciendum est, quod essentia totius potentialis medio se modo habet ad partes respectu totius universalis et integralis : essentia enim universalis est secundum esse essentia particularis, ut probat Philosophus in septimo primae philosophiae: quidquid enim est in particulari supra 3ssentiam universalis, non est vere essentiale, sed est de individuantibus : essentia vero totius potentialis adest parti deut subjectum, et causa proprietati, vel ei quae denominatur a proprietate : pars enim ejus constituitur a potentia, quae est proprietas causae superaddita, sicut intellectiva constituitur ab intellectu quae est proprietas addita animae : et ideo ratione illius potentiae superadditae in uno est virtus imperfecta, et in alio perfecta : in toto vero integrali essentia totius est per congregationem, partis per separationem : unde essentia totius non est essentia partis unius, neque adest uni, sed omnibus : et ideo universale proprie praedicatur de partibus, totum vero integrale impropriissime : sed potentiale medio modo, secundum quod Augustinus dicit, quod " tres potentiae imaginis sunt " una mens, una anima. " Et per hoc patet solutio ad objecta.

Circa secundum sic proceditur. -

1. Per id quod est commune omnibus, non debet unum separari ab altero ; sed converti in Deum commune est omnibus tam supremis quam infimis, et similiter converti ad alterum in effundendo lumen acceptum a Deo : ergo per hoc non debent distingui hierarchiae, sicut ipse facere videtur, dicens primam esse circa Deum existentem.

2. Praeterea, Per materialia non differunt aliqua secundum speciem : cum igitur in distinctione hierarchiae utatur materialibus conditionibus, dicens eos oculosos et pennosos, videtur inconvenienter dividere.

3. Si dicatur, quod divisio hierarchiae sumitur secundum diversam proportionem capacitatis ad lumen divinum. Contra : Diversitas proportionis secundum quantitatem non diversificat speciem, sicut duo ad unum et quatuor ad duo se habent in dupla proportione, quamvis diversa sit quantitas : ergo nec hierarchiae distinguentur secundum proportionem majoris et minoris capacitatis ad lumen divinum.

4, Praeterea, Hierarchiae distinguuntur secundum officia quibus Angeli serviunt Deo. cum illa sint duo tantum in gene- re, ut dicitur Danielis, vii, 10 : Millia millium ministrabant ei, etc. : non debuit distinguere nisi duas hierarchias.

Solutio. Dicendum, quod tres hierarchiae distinguuntur ab invicem secundum diversam proportionem capacitatis luminis divini : sed proportio potest sumi diversa, aut secundum speciem, aut secundum quantitatem in eadem specie proportionis, sicut sex ad quatuor se habent in sesquialtera proportione, octo vero ad sex, in sesquitertia, licet aequaliter fiat separatio secundum quantitatem : et haec est medietas arithmetica, sed octo ad quatuor se habent in dupla proportione, et similiter sedecim ad octo, licet non sit eadem quantitas : et hoc vocatur medietas geometrica.

Similiter etiam invenimus in naturalibus proportionem aliquorum ad unum, diversam secundum quantitatem, non secundum speciem, sicut aliquis est proportionatus ad inveniendum geometricalia per se, quidam vero ad capiendum ea ab altero, quidam etiam ad hoc non possunt nisi difficulter, ut dicit Philosophus in Ethicis. In his est major et minor capacitas, sed tamen ab omnibus unius rationis, quia a ratione in omnibus, sed non ab eadem forma secundum speciem. Est enim capax oculus aquilae luminis solis in fulgore suo, et oculus vespertilionis, ejusdem obtenebrati, et oculus hominis ut medio modo se habet, et non habent diversam speciem proportionis ad capiendum lumen solis.

Similiter quidam Angelorum sunt ca-

paces divini luminis, prout est in suo fulgore : quidam vero non, nisi obtenebretur vicinando immediate ad continuum et tempus, quomodo obumbratum nos recipimus : et ita efficitur proportionatum nobis : quidam vero medio modo se habent, cum inter duo extrema distantia sit medium, et sufficit accipere unum in genere. Et secundum hoc accipiuntur tres hierarchiae ex diversa proportionis specie in capiendo divinum lumen secundum diversam rationem capacitatis, sed secundum diversam quantitatem capacitatis, quae est ejusdem rationis, differunt ordines in hierarchia, et diversi in eodem ordine.

Ad primum ergo dicendum, quod illa duo non diversificant hierarchiam, sed consequuntur diversas rationes capacitatis : ex hoc enim quod recipiunt lumen divinum in fulgore suo superiores, convertuntur immediate ad ipsum : et ex hoc quod infimi accipiunt lumen proportionatum capacitati nostrae, convertuntur ad nos.

Ad secundum dicendum, quod materiales illae conditiones ostendunt proportionem capacitatis divini luminis, sicut pennati alte feruntur in contemplationem divinam, et oculosi clare inspiciunt : et ideo competunt distinctioni hierarchiarum.

Ad tertium patet solutio per praedicta.

Ad quartum dicendum, quod illa officia non distinguunt hierarchias, sed consequuntur hierarchiam in communi.

6