BALTH. CORDERII, S, J. INTERPRETATIO.

Ac primam quidem ait esse illam, quae circa Deum assiduo versatur, illique jugiter inhaerere, ac prae caeteris immediatius uniri traditur : sanctissimos enim thronos, et pluribus oculis alisque praeditos ordines, cherubim Hebraico vocabulo et seraphim appellato, immediate juxta Deum ante alios eminenti propinquitate locatos esse, sacrorum asserit eloquiorum explanatione comprobari. Hanc igitur ternariam distributionem, ut unam aequalemque ac primam revera hierarchiam, inclytus praeceptor noster memoravit, qua non est altera Deiformior, primo" ribusve Divinitatis illustrationibus immediata conjunctione propinquior.

Secundam vero designat illam, quae potestatibus, dominationibus, virtutibusque completur. Tertiam denique, eamque caelestium hierarchiarum ultimam esse dicit angelorum et archangelorum atque principatuum distributionem.