DUBIUM.

Sed hic est dubitatio de hoc quod dicit eos immediate circa Deum collocari : videtur enim hoc esse falsum.

1. Inter immediata enim non est distantia : sed inter Deum et eos qui sunt de prima hierarchia est infinita distantia : ergo non immediate sibi conjunguntur.

2. Praeterea Virgo (ut dicit Hieronymus) et cantatur de ipsa, " est exaltata " super choros Angelorum : " ergo ipsa est media inter Deum et primam hierarchiam.

3. Praeterea, Infinite distans non potest accipi ab intellectu nisi per medium : cum igitur in infinitum distet ab his qui sunt de prima hierarchia, videtur quod non immediate accipiunt visionem ejus.

4. Item, Videtur quod hoc non sit eis proprium. Sicut enim dicitur in I Joannis, III, 2 : Videbimus eum sicuti est. Glosa : " Sine medio. " Ergo non soli ipsi vident sine medio.

5. Praeterea, Homo etiam ante peccatum (ut dicit Augustinus) videbat Deum sine medio, qui tamen erat in via : ergo videtur non solum convenire superiori hierarchiae.

Solutio. Dicimus, quod dicuntur immediate collocari circa Deum, eo quod non sit aliquid primo respiciens a Deo et transfundens in eos : sed habent virtutem ad inspiciendum in suo fulgore lumen divinum. Et si inter eos aliqui sunt

magis capaces et illuminent inferiores ejusdem ordinis vel ejusdem hierarchiae, per hoc non tollitur ab eis facultas immediate accipiendi in ipso fonte luminis, sicut aliquis discit ab alio, qui tamen per se invenire posset : et etiam recipiunt a superioribus lumen nulla ex parte obtenebratum, sed in simili fulgore in quo superiores accipiunt : et ideo immediate collocantur omnes, licet unus ab alio accipere possit : sed inferior hierarchia recipit a superioribus in minori splendore, sicut etiam dicitur in libro de Causis, quod " intelligentiae inferiores continent formas minus universales quam scilicet superiores : " cum enim formae omnium (quae hic producuntur secundum Philosophos) sint apud ipsas sicut formae artificialium apud artificem, quanto magis appropinquant multitudini generabilium et corruptibilium, quae reducuntur ad motum caeli, tanto formae eorum fiunt compositiores et multipliciores, et sic minus universales. Et similiter quanto magis distant a prima luce, tanto recipiunt in minori splendore.

Ad primum ergo dicendum, quod per hoc quod est infinita distantia, non ponitur actu aliquid medium quod est propinquius primo, quia sic numquam esset status, sed secundum possibilem capacitatem majorem istis, tamen infra Deum.

Ad secundum dicendum, quod quan- tum ad hoc quod beata Virgo est media quoad meritum, non tamen est media quoad effusionem illuminationum, cum per se accipiant : et si etiam ab ipsa accipiant, non tollitur ab eis proprius modus, scilicet per se accipiendi.

Ad tertium dicendum, quod distantia intelligibilis ab intellectu potest esse vel ex defectu intelligibilis, quod non est de se aptum et connaturale intellectui, sicut sunt prima principia, et tunc indigent medio per quod accipiantur : vel etiam ex defectu intelligentis qui propter debilitatem intellectus non pertingit ad conspiciendam tantam claritatem, et ideo indiget medio confortante intellectum sub quo videatur : et talis est distantia intellectus creati ad Deum : et ideo non oportet esse medium in quo videatur, sed sub quo, et hoc est theophania.

Ad quartum dicendum, quod in quantum pertinet ad objectum beatitudinis, immediate videtur ab omnibus, sed non quantum ad illuminationes, quae sunt de his quae pertinent ad gubernationem mundi, et Ecclesiae tam militantis quam triumphantis.

Ad quintum dicendum, quod homo ante peccatum videbat sine medio Deum, quod est velamen peccati, videbat tamen per imaginem et vestigium, licet clarius.

3