DUBIA.

Ipsa vero Cherubin, etc.

Positis proprietatibus primi ordinis, scilicet Seraphin, hic ponit proprietates secundi, scilicet Cherubin, quas ejus nomen declarat.

HIC sunt duo dubia. Primo, quid sit Cherubin ? Secundo, de proprietatibus ejus quas ponit.

Circa primum sic proceditur. Gregorius dicit in Homilia de ''Centum ovibus , describens Cherubin : " Cherubin pleni-" tudo scientiae dicitur. Et sublimiora illa " agmina idcirco Cherubin vocata sunt, " quia tanto perfectiori scientiapleni sunt, " quanto Deum vicinius contemplantur, " ut secundum creaturae modum eo plene " omnia sciunt, quo visioni conditoris " sui per meritum dignitatis appropin-" quant. " Sed Seraphin vicinius Deum vident, et plenius omnia sciunt, et sublimiores sunt. Ergo ipsi debent dici Cherubin, et non illi de secundo ordine.

2. Praeterea, Cognitio Angeli qua sciunt omnia in Deo, vocatur ab Augustino

" cognitio matutina, " quae est cognitio eorum in verbo : sed haec communis es omnibus Angelis secundum Augustinum : ergo penes eam non debet sumi ordo specialis.

3. Praeterea, Sicut dicit Augustinus, " Visio est tota merces beatitudinis. " Cum igitur omnes Angeli sint beati, omnibus communis erit visio Dei : ergo non debet appropriari alicui ordini.

4. Praeterea, Apocalyp. XXI , 16, super illud, ''Latera civitatis sunt aequalia , dicit Glossa, quod " fides, spes, et charitas sunt aequalia : " in beatis autem visio tenet locum fidei : cum igitur Seraphin habeant majorem charitatem, habebunt etiam majorem et leniorem visionem quam Cherubin : et sic idem quod prius.

6. Praeterea, Videtur quod male denominet eos. Omnis enim denominatio debet fieri a digniori : sapientia autem dignior habitus est quam scientia : ergo uterque sic in eis debuit a sapientia denominari, non a scientia.

7. Praeterea, Ut dicit Philosophus, " Sapientia est cognitio per altissimam causam rei : " ipsi autem cognoscunt omnia in Deo qui est prima causa : ergo debent dici plenitudo sapientiae.

8. Praeterea, Scientia est cognitio accepta de rebus per propria principia rei : talis autem acceptio cognitionis non est in patria, sed. in causa prima accipiunt cognitionem rerum : ergo non debent dici plenitudo scientiae.

Solutio. Dicimus, quod haec tria quibus hic ordo nominatur, scilicet fusio sapientiae, multitudo scientiae a Dionysio, et plenitudo scientiae a Gregorio, pro eadem re accipiuntur, sed differunt secundum rationem : cum enim cognoscant omnia in prima luce, potest considerari ipsa lux prout in se manens est prima causa rerum, et ex hoc quod per ipsam lucem immediate copiose illuminantur, ut possint aliis communicare, dicuntur fusio sapientiae : sed secundum quod lux illa transit super omnia irradians ea, faciens cognoscere res in propria natura, et propria principia earum, sic dicuntur multitudo scientiae : sed secundum efficaciam lucis ad plene innotescendas res dicuntur plenitudo scientiae.

Ad primum dicendum, quod licet Seraphin plenius videant, non tamen ab hoc denominantur, sed a digniori dono quod est charitas, cedentes secundo ordini a denominatione secundi doni, scilicet scientiae : sed Gregorius loquitur respectu inferiorum,

Ad secundum dicendum, quod est quaedam visio pertinens ad substantiam beatitudinis, quae est visio summi boni amati et habiti, et ab hac non denominatur hic ordo, cum omnes beati ea immediate gaudeant. Est etiam quaedam visio rerum in arte divina actu producente res, et haec dicitur " cognitio matutina " ab Augustino : quia est de rebus in primordio earum, et haec etiam communis est omnibus, etiam ut quidam dicunt, ante beatitudinem : unde ab ea non sumitur hic ordo. Est tertia visio eorum quae pertinent ad dispensationem graduum Ecclesiae tam militantis quam triumphantis, de qua dicitur in Psal. secundum aliam translationem, Distribuite gradus ejus ut enarretis, etc. Ab hac dicitur hic ordo : quia post Seraphin immediate accipit, et inferiores ab ipso. Et per hoc patet solutio ad tertium.

Ad quartum dicendum sicut ad primum.

Ad quintum dicendum, quod denominatur etiam a sapientia, quia dicitur fusio sapientiae : et forte in nomine suo scientia magis exprimitur, quia secundum acceptionem et effusionem multorum scitorum magis se habet ad actionem hierarchiae quam secundum quod accipit a luce prima, et manifestior etiam sit nobis. Et per hoc patet solutio ad sextum.

Ad septimum dicendum, quod Angeli et beati cognoscunt prima principia rerum et habitudinem eorum ad principiata, licet ab eis non incipiat acceptio rerum, sed a prima luce deveniat in cognitionem utrorumque : et ideo salvatur in eis ratio scientiae. ,

Circa secundum sic proceditur.

i. Potentia de se imperfecta est : unde nec bona, nec mala est, secundum Philosophum : sed cognoscibile dicit potentiam: ergo non debuit poni inter proprietates nobilitatis istius ordinis.

2. Praeterea, Omnes beati Deum vident : ergo non est proprietas eorum deividum.

3. Praeterea, Seraphin est altissimus ordo : ergo ejus proprietas est accipere altissimas luminum dationes, et non istius ordinis.

4. Praeterea, Cognoscere in virtute operante actu est cognitio matutina, quae est communis omnibus, ut dictum est : ergo non est proprietas hujus ordinis contemplari in prima operatrice virtute.

5. Praeterea, Pulchritudo divina est respectu idearum quae sunt in ipsa vita et lux, ut dicit Boetius,

Mundum mente gerens pulchrum pulcherrimus

[Ipse.

Secundum hoc autem omnes vident eum, ut dictum est. Ergo non est proprium hujus ordinis contemplatio divinae pulchritudinis.

6. Sapientifica aut est in traditione mundi, aut in traditione Scripturarum : et utraque cognoscitur ab aliis : ergo non est proprium istius esse repletum ea.

7. Ultimo quaeritur, penes quid sumantur istae proprietates ?

Ad primum dicendum, quod quia Angeli recipiunt in munere gratias secundum gradum naturalium, per hoc enim quod dicitur cognoscibile, tangitur naturalis eorum perspicacitas.prout ordinantur ad perfectionem gratiae, et sic dicit naturalem perfectionem ejus quae est potentia respectu gratiae superadditae.

Ad secundum dicendum, quod non dicitur a visione communi omnibus deividum, sed a cognitione in Deo pertinentium ad dispositionem sacram, ut dictum

est.

Ad tertium dicendum, quod ordo altissimus dicitur respectu inferiorum, non respectu superiorum, scilicet Seraphin: quia cedit sibi in hac eminentia dominatus ab eminentia superioris doni.

Ad quartum dicendum, quod operatrix virtus dicitur hic habitualiter, scilicet a qua omnia fluunt : ab hac et in hac accipere immediate pertinentia ad ordines Ecclesiae, proprium hujus ordinis est.

Ad quintum dicendum, quod sicut pulchritudo naturalis est ex victoria formae super materiam, propter quod servat ipsam in decenti figura et colore, ita pulchritudo divina dicitur ex eo quod formae ideali (quae est in mente ejus) subditur materia ut disponatur secundum quod decet, et talem pulchritudinem accipere tu fulgore divinae lucis (secundum ea quae pertinent ad ordines) proprium est hujus ordinis.

Ad sextum dicendum, quod dicitur repletum sapientificae traditionis : eo quod non tantum sciunt res ipsas, sed ordinem ipsarum secundum quod exeunt a primo : et hoc est proprium eis quantum ad ea quae diximus.

Ad ultimum dicendum, quod proprietates istae accipiuntur secundum ea quae faciunt ad plenitudinem scientiae, et hoc vel in accipiendo, vel in communicando. Si in accipiendo, vel ex parte perspicacitatis naturalis intelligentiae, prout ordinatur ad. gratiam, et sic est cognoscibile : vel ex parte objecti alti, et hoc vel in se, et sic deividum : vel in ordine scitorum, et sic sapientificae, etc. Vel ex parte medii quod est efficax, et hoc medium est vel sub quo videtur, et sic est altissimae luminum dationis : vel in quo res videntur, quia in Deo, et sic vel secundum efficientem causam, et sic est contempla- tivum in prima, etc. Vel secundum formam idealem, et sic divinae pulchritudinis repletum. Si in communicando, sic est copiose ad secunda. Si autem communicatum, quare tantum unam proprietatem posuerit in communicando, cum de Seraphin posuerit plures ? Dicendum, quod proprietates Seraphin sumuntur penes ignem charitatis, quae est donum gratum faciens,habens calorem et lucem : et ideo plura considerantur in communicatione ejus quam in communicatione scientiae quae est donum gratis datum, habens luminis tantum proprietates.