204. De sancto Ansberto.

1. Ansebertus, Christi haeres,

Fontanellae sinibus
Ob amorem paradisi

factus est discipulus,
Christi jugum quam suave

suis dans cervicibus.
2. Bonus pastor pavit oves

in praesulis vicibus,
Jacob scalae miro modo

ascendendo gradibus,
Veste vilis, cibi parcus,

humilis prae omnibus.

3. Celsus pontifex electus
Rotomensi populo,

Speculator illis factus,
Galliarum finibus

Gregem Christi custodivit
a luporum morsibus.

4. Dado sacer nuncupatus,

Audoenus nomine,
A praefata urbe migrans

cum perfecto opere,
Cui dignus Ansebertus

successit in dogmate,
5. Erat enim clemens doctor

plenus bonis actibus,
Ansebertus, verus pastor,

mansuetus moribus,
Verbum vitae praedicando

affabilis omnibus.

6. Fide firmus, ore fulgens

in legendi studio,
Ut Johannes Chrysostoma

olim in Byzanzio,
Datum de supernis donum

capiendi optimum.
7. Gloriosus praesul factus

Galliarum populis,
Hospitum, peregrinorum,

largos dator omnium,
Elemosynae studendo

sinus implens pauperum.
8. Hilaris erat in vultu

jucundusque facie,
Miserendo cunctis dabat

stipem hic egentibus
Orphanorum pater pius

acsi Job sanctissimus.
9. Jubar poli, illustratus

sancto quoque spiritu,
Gregem Christi informando

circuit parochias,
Dei verbum nuntiando

invitat ad praemia.
10. Kapax hagiographia

repletus per omnia,
Vetera novaque pandens

de thesauro optimo,
Veluti ut scriba doctus

coelorum basileo.

11. Largus dator, laetus semper,

luculenter tribuens
Animarum corporumque

abundanti pabulo,
Viduarum, orphanorum,

verus pastor omnium.
12. Mensa ejus patens erat

cunctis indigentibus,
Plures pauperes alebat

atque multos advenas,
Elemosynas utendo

inter ambas idumas.
13. Notus inter illas gentes

ut Elias Thesbites,
Ortum contra illum bellum

acsi ejus temporis,
Falsitate accusatus

in conspectu principis.

14. Ob invidiam expulsus

a Francorum principe
Velut Clemens dudum Roma

a Trajano Caesare,
Nullum arlprobatus crimen

exsul factus patriae.
15. Plures Clemens salvat gentes

sacrosancto dogmate,
Et hic multos recto ducit

ad aethera tramite,
Verbis et exemplo docens

.populo Sicambrico.
16. Quanti putas sub Clemente

salvi sunt in insula?
Multique et sub Ansberto

Belgica provincia,
Quos docendo ad aeterna

excitavit praemia.

17. Rapax illi damna hostis

missus est infligere,
Sed protector suo Christus

auxit lucra militi,
Adquisita sibi plebe

citra Sambrae flumina.
18. Suum jamque prope finem

prophetavit fratribus,
Quod rediret Fontanatiam

consummatis omnibus,
Sicque carne resolutus

gaudet in coelestibus.
19. Tantus ille odor fratrum

repleverat naribus,
Acsi omnes paradisi

interessent floribus,
Quod nec lingua valet nostra

proferre in vocibus.

20. Vovit vivens, quod defunctus

adimplevit opere,
Suo sancto deportato,

quod praedixit, corpore,
Ipsiusque narrant gesta

ostensa miracula.
21.Ymnidica angelorum

agmina perfulgida
Coelestium nunc conjuncta

ejus sancta anima
Christo sine fine fruens

sempiterna gaudia.
22. Zona ejus circumcincti

caritatis vinculo,
Zelo spiritali pleni

diligamus proximum,
Ut ipsum aeternae vitae

mereamur socium.