DUBIA.

Sed hic primo dubitatur de hoc quod dicit, quod sunt superexcellentes omnem factam virtutem. Videtur enim hoc esse falsum.

1. Virtus enim eorum etiam facta est, et ita excederent seipsas : quod videtur impossibile.

2. Praeterea, Accidens non excedit subjectum : sed ea quibus constituuntur in tali eminentia, accidentia eorum sunt : et ita non excedunt sua subjecta, et ita non omnem factam virtutem.

Solutio. Dici potest, quod est hic accommodata distributio, qua distribuit pro omni virtute facta inferiori ipsis. Vel aliter dicendum, quod ipsi secundum virtutem gratuitorum donorum excedunt semetipsos secundum virtutem naturae ipsorum, quae inest eis ex creatione, sicut Socrates senex est alter a seipso puero, cum per dona gratuita ponantur in ultimo et secundum intellectum et secundum affectum, ad quod non attingunt naturalia eorum, scilicet ad videndum

Deum immediate et inhaerendum sibi ferventissimo amore, ad quod etiam inferiores ordines secundum eorum gratuita non attingunt.

Ad secundum dicendum, quod accidentia non excedunt subjectum in esse, ita quod possint esse extra ipsum, in hoc tamen possunt excedere, quod producunt altiores actus quam subjectum per se facere potuisset, sicut patet de charitate quae elicit de se actum meritorium, in quem de se natura non potuisset.

Deinde dubitatur de hoc quod dicit, " aestimandum est hierarchiam eorum esse aequiformem. "

1. Omnimoda enim aequalitas est contra naturam totius potestativi, quod requirit ordinem in partibus. Cum igitur hierarchia omnis sit totum potestativum, non erit in eis omnino aequiformis.

2. Praeterea, Dona quibus collocantur in hierarchia, non sunt aequalia : sed charitas major est scientia : ergo nec hierarchia, omnino aequiformis.

3. Praeterea, Hoc videtur contra id quod supra dixit in capitulo IV, quod " in aeque potentibus lex ipsa diffinitur, " hoc est, secundum unamquamque hierarchiam esse primas, medias, et ultimas : sic enim non esset omnino aequiformis eorum hierarchia.

Solutio. Dicimus, quod dicitur esse omnino aequiformis, quantum ad modum accipiendi illuminationes : quia aeque immediate recipiunt a Deo illuminationes. Et iterum ad ultimum in quo ponuntur : quia ipsi Deo immediate adhaerent, in quo nullus est inaequalitatis ordo. Quantum autem ad virtutes tam recipientes, scilicet naturales, quam receptas, scilicet gratuitas, non sunt aequales : et sic salvatur in eis natura totius potestativi et aequalitas donorum : et hoc est quod supra dixit quasdam esse primas, medias et ultimas. Unde patet solutio ad objecta.

8