sig. VI, Cypressus.

Cypressus, Unde dicit: Et quasi cypressus in monte Sion . Mons Sion Ecclesia, ut Sion significet Ecclesiam militantem, in qua Deus videtur per speculum in aenigmate, mons Sion Ecclesiam triumphantem : Sion enim interpretatur speculum vel specula. Exaltatur ergo in monte Sion beata Virgo, id est, in eminentia utriusque Ecclesiae : quia beatam me dicent omnes generationes , scilicet Angelorum et hominum. Ad Ephes. iii,

15 : Ex quo omnis paternitas in caelis et in terra nominatur.

Vel, in monte Sion, id est, eminentia speculationis.

Aliter : Cypressus arbor est medendis apta corporibus. Sion interpretatur speculum, quod scilicet speculum homini reddit imaginem suam. Deformatus erat homo per peccatum quod ei abstulerat imaginem Dei, ad quam factos erat. Sed per beatam Virginem quae est fons gratiae reformata est in homine imago Dei per gratiam. Unde bene dicitur cypressus in monte Sion, cum per ipsam imago Dei. reformatur in anima, et per resurrectionis medicinam corporibus infirmis restituetur sanitas. Item, cypressus paenae proximam virtutem habet cedro. Antiqui etiam cypressi ramos prope rogum constituere solebant, ut odorem cadaverum dum urerentur, opprimerent jucunditate odoris, et apud paganos mortuis consecrata erat: quia in modum hominis excisa non pullulat.

Maria cypressus. Quia cypressus arbor est medicinalis : quia genuit salutem animarum fidelium, Christum scilicet medicum vulnerum nostrorum. Unde, Eccli. xxxviii, 4 : Altissimus, id est, Pater, creavit , etc. Unde dicit, Isa. xlv, 8, de Filio : Ego Dominus creavi eum, hominem de terra, id est, beata Virgine, medicinam, id est, Christum, qui languores nostros tulit , (Melius invenies hoc titulo, quod Maria terra.)

Consolidat hernisos quibus interiora descendunt inferius, et exempla Mariae consolidant nos, ne per cupiditatem projiciamus in terram interiora nostra. Eccli. x, 10, de cupido : In vita sua projecit intima sua.

Complexione calida per dilectionem qua Filium diligit et creaturas ejus, sicut habuisti titulo de dilectione ejus.

Sapore amara: quia multum amari- cata est in Filii passione. Unde competit ei illud Ruth, I, 20 : Ne vocetis me Noemi (id est, pulchram), sed vocate me Mara (id est, amaram), quia amaritudine valde replevit me Omnipotens.

Colore surrufa. Caro enim Christi rufa fuit per sanguineam passionem. Unde signatus est per equum rufum . Et ipsa surrufa per compassionem : nam spiritualiter passa est in Filio.

Odorifera, ut supra de cedro.

Recta per dilectionem. Unde: Recti diligunt te . Recta etiam, quia numquam inclinata per amorem mundialium, vel aliquod peccatum. Vel, recta per paupertatem quae est rectitudo animae, divitiae vero faciunt tortuosum.

Durum habet fructum, Christum scilicet, qui durus est in sacramento indigne accedentibus. Joan. VI, 61 : Durus est hic sermo.

Membra mollia indurat et confirmat. Unde oramus eam : " Succurre miseris, juva pusillanimes, et hujusmodi. "

Fluxum sanguinis restringit. Et Maria cypressus est animae haemoroissae : quia desiccat venas mortis .

Nullo impulsu, nulla venustate comam deponit, id est, virtutes quibus ornat Christum caput suum, ei lotum attribuendo, cum dicit: Fecit milii magna qui potens est . Ipsam enim nec extulit felicitas, nec depressit afflictio.

Maria cypressus. Quia coma ejus tendit in corium. Unde et dicitur cypressus conifera. Cypressus enim Graece appellatur picutre :eo quod caput ejus a rotunditate erigitur in cacumine et imitatur formam coni: et fructus ejus dicitur conus. Per hanc etiam comam designatur Mariae virginitas, cui debetur aureola : unde et depingitur coronata.

Aliter: Cypressus dicitur ex eo quod ramos a rotundo in acutum colligens velut conum facit in summo. Et Maria ramos virtutum suarum non per vanitatem dispergebat, sed ad unum sublime, quod Deus est, colligebat, juxta illud Ecclesiastici, xxx, 24 : Contine, ei congrega cor tuum in sanctitate. Unum enim petebat a Domino, sciens unum esse necessarium .

Lignum ejus fructus et folia medicinalia sunt: sed in. fructu ejus quo Christus signatur, id est, in pomis praecipue consistit virtus medicinae : quia ipse operatus est salutem in medio terrae .

Folia etiam ejus, fructus, et frondes, id est, verba, opera, et exempla, sunt in medicinam per exemplum sapientiae ejus, sunt in cibum in Filii sacramento, sunt etiam in umbram et protectionem quoad frondes in quibus habet venustatem per exemplorum honestatem.

Dicitur fuisse quaedam pars crucis Dominicae, videlicet lignum infixum in rupe quod portabat totam crucem.

Ad multos usus necessaria : inde enim sunt fabulae ad scribendum, manubria cultellorum ad. secandum, et hujusmodi. Sic et ipsa nobis in diversis necessitatibus auxiliatur et prodest. Nam ipsa omnibus omnia facta est, ut quantum in se est, lucrifaciat universos .

Oneribus supportandis aptissima : quia infrangibilis et numquam oneribus cedit, sed sub eis perpetua stabilitate perdurat. Similiter et Maria numquam cessit oneribus tribulationum quas patiebatur in Filio. Per charitatem vero quae omnia sustinet , infatigabiliter et quasi infrangibiliter humanae infirmitatis in nobis onera sustinet et supportat, juxta illud. Apostoli, ad Romanos, xv, 1 : Debemus nos firmiores imbecillitates infirmorum sustinere, et caetera.

Item, Possunt esse verba sapientiae : Quasi cypressus exaltata sum in monte

Sion Sicut enim cypressus exaltatur et crescit in altum in monte Sion, qui est in Jerusalem : sic ergo sapientia exaltatur in contemplativis. Ezechiel. 1, 21 : Elevatis animalibus a terra, pariter elevabantur et rotae sequentes ea.

Item, Cypressus medicinalis in frondibus et foliis, et sapientia medicinam habet in verbis. Ezechiel. I, 20 : Spiritus vitae erat in rotis, Eodem, xlvii, 12 : Erunt fructus ejus in cibum, ei folia ejus in medicinam.

Item, Haec sunt verba Christi : Quasi cedrus exaltata sum, etc, et, quasi cypressus in monte Sion . Cypressus comae venustatem nullo deponit impulsu, in quo signatur conversatio antiqua doctorum, quam nec laude, nec aliquo tentationis impulsu deponunt, et per hoc apti sunt exaltari, si tamen sunt in monte Sion, id est, in eminentia speculationis per cautelam vitiorum. Habacuc, II, 1 : Super custodiam meam stabo. Christus autem exaltatur quasi cypressus : quia per eorum constantem operationem magnificatur, dum ei attribuitur.