DIVISIO ET EXPOSITIO TEXTUS.

B. Sed ut omni, etc.

Dicto qualiter non est in eis purgatio et illuminatio, hic dicit qualiter est in eis. Et primo in Cherubin. Secundo in Seraphin, ibi, Et proprio per se motu. Tertio, qualiter in Thronis, ibi (sig. 8, C), Et in subjectis.

Littera sic legatur : Praedicto modo non est in eis aestimandum purgationem esse, sed est aestimandum purgari eas, scilicet primas essentias, quantum ad Cherubin, ut mundas, id est, purgatione mundatas omni diminutione luminis, quae intelligitur in eis ante purgationem ex confusione intellectus propter potentialitatem ejus : aliter enim non reciperent aliquid si nulla in eis esset diminutio : et ut altiores seipsis secundum conditiones naturalium factas per illuminationem receptam : et ut supercollocatas omnibus deiformissimis virtutibus, idest, eminenter constitutas super omnes virtutes angelicas, quae sunt inter creatas Deo simillimae, ita quod sit accommoda distributio pro inferioribus : vel quod sint superiores seipsis, ut primo dictum est: et in hoc tangitur quibus emineant. Collocatas dico omni, id est, toto templo, id est, contemplatione, super firmato, id est, in quo superfirmantur, Deum propinquius contemplantes : et in hoc tangitur effectivum collocationis.Supercollocatas dico secundum castitatem excelsissimam, id est, secundum virtutem divini luminis., quae castigat et refraenat intellectum eorum vagantem circa diversa constituens firmiter in uno, sicut virtus castitatis castigat a fluxibus concupiscentiae, ponens in uno medio virtutis : et hoc in eis excellenter fit : et in hoc tangitur id quo formaliter in alto collocantur. Et aestimandum est eas purgari, quantum ad Seraphin, ut receptas in unionem similitudinis Dei ineffabiliter : quia exsuperat omnem sensum pax illa in qua recipiunt . Receptas dico proprio per se motu, id est, similiter se habente, secundum Commentatorem, et hoc secundum inconversibile ordinis diligentis Deum, id est, secundum quod inconvertibiliter ordinatur Deum amando ipsum, ita quod avelli non possunt.