DUBIUM.

Sed videtur esse falsum quod dicit .: 1. Quia sicut Philosophus dicit in octavo Physicorum, " Nihil movet se : " ergo non recipiuntur per se motu.

2. Praeterea, Motus semper dissimiliter se habet, et quod continuo exit de potentia in novum modum actus : ergo non recipiuntur modo eodem sive similiter se habente.

Ad primum dicendum, quod licet nihil possit per se moveri, ita ut idem sit movens et motum, potest tamen ex se moveri, ita ut in ipso sit una natura movens et altera mota, sicut animal quod habet sufficiens principium sui motus in seipso, scilicet animam, et similiter amans movetur in amatum per amorem qui est in ipso ut principium talis motus : unde glossandum est, per se motu, id est, ex se. Vel dicendum, quia dicitur per se moveri quod movetur secundum quod exigit sua natura, sicut ignis sursum, licet principium movens sit extra, scilicet generans vel removens prohibens. Et similiter charitas est ut natura inclinans ad amandum.

Ad secundum dicendum, quod motus qui est de potentia ad actum, semper est dissimilis, qui proprie dicitur motus : sed motus iste est de actu in actum, quia de amore in perfectionem amantis per amati unionem : et ideo similiter se habet, quia non efficitur ibi forma aliqua quae prius non fuerat, sed tantum quod fuit perficitur : sicut etiam motus de praemissis in conclusionem, de actu in actum, non de potentia in actum, cum idem sit quod est postea in actu et.in potentia prius, conclusio autem non est eadem principiis.