202. De s. Oswaldo Rege.

1. Potens virtutum
tu sator rerum,
moderator temporum cunctorum,

2. Gloria iustorum

martyrumque victoria,

3. Qui tuis in sanctis
praedicaris mirabilis ;

4. Qui protoplasti
delictum
in te concilians

5. Reddis parenti,
per lignum
quod deperierat.

6. In fundamento
matris et sponsae
heredes adoptasti
per gratiam ;

7. Dignans pusillos
facis amicos
virtutum praepollentes
insignibus.

8. Numero de quorum
David de caula ovium
eligis parvulum,

9. Regni firmans fascibus
spreto fastus culmine
Saulicae gloriae.

10. Ex quorum collegio praecipuus
Oswaldus, cuius festa colimus,
Virtute praecelsus,
fide meritus,
opere glorius.

11. Regum hunc nobilis prosapia
tibi felix profert, Britannia ;
Exsulta, collauda,
plaude, Scotia,
alitrix regia.

12. Fide imbuitur
puer hic sacra;
dat scandere paedagogus

13. Viam caelis nixam,
quam praefert in se
Oswaldo, athletae Dei,

14. Humilitatem,

virtutum matrem,

quae regni proxima solio.

15. Huic laetari
das in virtute
nunc tua, regum rex, Domine.

16. Hunc Anglia

plus exaltet apicem,
quam regni floridum.

17. Idonee

gubernavit patriam
virtutum stemmate.

18. Verus hic christicola,
dum temnit terrea,
caeli factus heres
adoptivus regnat cum Domino.

19. Pauperum inopiam
sublevans largiter
nunquam marcens dextra
testatur, quod vivit perenniter.

20. Magna hunc laude

coetus martyrum extollat
tanto glorians concive.

21. Haec tua, Deus,

haec miracula sunt tua,
qui das meritis coronam.

22. Doxa tibi sit perpes,
salvator, intermina
regnanti per saecula;
nobis pande caelestia.