220. De s. Stephano Protomartyre.

1. Magnus Deus
in universa terra.

2. Magna sunt eius
ubique omnia
in caelo
atque in terra opera,

3. Qui est rex regum,
Dominus omnium,
a patre
genitus ante saecula.

4. Cuius caritas vera
caelo sublevat
Stephanum de terra

5. Atque perenni vita
ornat, candida
dignanter corona.

6. Plenus etenim Stephanus
deitate atque gratia

7. Magna dabat prodigia
docens verissima dogmata.

8. Cum autem praedicaret
iam praesentia

9. Nostrae redemptionis
nova gaudia,

10. Intento
in superna
caeli patet ianua,

11. Dixitque
circumstanti
plebi voce publica

12. Sacra plenus gratia:
"Ecce, Dei video
admirabilem gloriam,

13. Claritate fulgidam,

atque Iesum stantem in
virtutis Dei dextera."

14. Cum hoc audisset impia
gens Iudaica,
dans fremitum
concita quassat
lapidibus Stephani membra.

15. Sed stat fortiter patiens
martyr et orans:
"Ne his, Christe,
noxam statuas,
sed iam accipe animam meam."

16. Et cum hoc dixisset
in Domino obdormivit
pace aeterna.

17. Tu et nobis, martyr
o Stephane, sempiterna
impetra

18. Gaudia.