262. De sancto Christophoro.

1. Regem coelestis gloriae
Laudent flores ecclesiae,
Superna quorum patria
Nitoris fulget gratia.

2. Hic inter flores praeditum
Virtutibus Christophorum
Suo Christus carissimo
Inthronizat palatio.

3. Qui fretus Dei munere
Mundum coepit postponere,
Militiae post cingulum
Legis dilexit vinculum.

4. Mundo totus emoritur,
Christum vivendo sequitur,
Laborum fructus aggregat,
Ad coelos liber evolat.

5. Nos ergo tanto martyIi
Corde et voce supplici
Laudes canamus debitas,
Deo ferentes gratias.

6. Sit Deo perpes gloria,
Cui magna est potentia,
Per quem victor egregius
Mundum vicit Christophorus.