DIVISIO ET EXPOSITIO TEXTUS.

A. Transeundum autem nunc nobis in mediam, etc.

In hoc capitulo determinat de tribus mediis ordinibus. Et dividitur in partes duas. In prima ponit proprietates eorum. In secunda determinat hierarchiam eorum in communi, ibi (sig. 4), Has habent deiformes, etc.

Prima in duas. In prima continuat se ad praecedentia, praelibans de quo agendum sit. In secunda exsequitur propositum, ibi (sig. 1, C.), Igitur sanctarum Dominationum, etc,

Circa primum duo facit. Primo dicit de quo est agendum. Secundo, quomodo eorum accipienda sunt propria, ibi (g 1, B), Etenim unaquaeque.Littera sic legatur : Determinavimus de primis tribus ordinibus et hierarchia eorum. Autem, id est, sed transeundum nunc est nobis in mediam dispositionem, id est, hierarchiam caelestium intellectuum, id est, Angelorum. Nobis dico explorantibus, id est, inquirentibus, quantum possibile est nobis oculis supermundanis, id est, praeditis supermundano lumine : quia nihil proprio motu dicet, ut supra dictum est, illas Dominationes, scilicet caelestes, speculamina divinarum Potestatum et Virtutum vere

potentia, id est, ordinem Potestatum et Virtutum, quae sunt quasi specula in quibus relucet divina potestas et virtus. Et dicuntur vere potentia propter efficaciam eorum in suis actionibus.