220. De sancto Bavone.

1. Audite, Christi milites,
Voces ovantum concite,
Laeto canentes agmine
Sancti Bavonis gloriam,

2. Beata mater filii
Et prolis electae Dei,
Gavisa partu praecluem
Effudit orbi militem.

3. Coepit sinistri tramitis
Dexter superni principis
Tiro reversus lubrica
Ire relictum devia.

4. Dum subdidit collum jugo
Suave terendum coelico,
Potenter haec insignia
Effecerat miracula:

5. Erat sibi contrarius
Quidam loquela subdolus,
Qui morte punitus fera
Est voce surrectus sua.

6. Fit fletus et fletu pium
Cernentibus hunc gaudium,
Quam concite miles Dei
Leges resolvit inferi.

7. Gaude, patroni portatrix
Augusta tellus corporis,
Quae cella sanctis artubus
Eras, quies et nunc suus.

8. Hujus precatus sedulus,
Coram Deo tam vividus,
Fictum maligni spiritus
Pellebat in serpentibus.

9. Unum Deum, quem colimus
Et toto corde quaerimus,
IHi sit virtus et honor
Et gratiarum actio.

10. Xristianae qui fidei
Aemulatori Bavoni
Claritatem concesserat
Cum angelis perpetuam.

11. Ymnum pro nobis dic Deo,
Esto nostri memor, Bavo,
Optando salutem nobis
Simul et indulgentiam.

12. Zelator ut fortis Deus
Muniat nos ab hostibus
Detque praesens solatium
Et summae lucis bravium.