DIVISIO ET EXPOSITIO TEXTUS.

Has habens deiformes proprietates, etc.

Positis proprietatibus trium ordinum, determinat de hierarchia eorum.

Et dividitur in partes duas. In prima ostendit qualiter participent actus hierarchicos, quia mediante prima hierarchia. In secunda probat per auctoritatem sacrae Scripturae, ibi (sig. 6), Invenies autem, etc.

Prima in duas. In prima manifestat qualiter participent actus hierarchicos. In secunda ostendit hoc concordare traditioni sapientium, ibi(sig. 5, B), Hoc enim est omnino, etc.

Circa primum duo facit. Primo dicit, quod participant actus hierarchicos mediantibus primis. Secundo manifestat hoc per similitutinem locationis, ibi (sig. 5, A), Itaque per alium etc.

Littera sic legatur : Media dispositio, id est, hierarchia caelestium animorum, id est, intellectuum, scilicet Angelorum, habens has quas docuimus secundum quemlibet ordinem proprietates deiformes, id est, quibus Deo similatur, quidem, id est certe purgatur, illuminatur, perficitur a divinis illuminationibus sibi inditis a Deo immediate, quemadmodum dictum est, id est, secundum proprium modum recipiendi quem assignavimus ponendo proprietates cujuslibet ordinis :

et hic est unus modus purgantur, illuminantur, et perficiuntur : vel etiam participant dona tria secundo, id est, secunda acceptione, et hoc per primam dispositionem hierarchicam, id est, per Angelos primae hierarchiae a Deo, et hic est secundus modus, quo purgantur mediantibus primis.