DIVISIO ET EXPOSITIO TEXTUS.

Invenies autem et hoc multoties, etc.

In ista parte intendit probare per auctoritates, quae supra dixerat, scilicet secundam hierarchiam recipere illuminationes per primam.

Et dividitur in partes tres. In prima probat per auctoritatem Zachariae. In secunda probat per auctoritatem Ezechielis,ibi (sig. 7),Alter autem Theologorum, etc. In tertia per auctoritatem Danielis, immiscens etiam auctoritatem Ezechielis, ibi (sig. 7 circa medium),Quid fortassis quis dixerit, etc.

- Littera sic legatur : Diximus, quod prima hierarchia mediante reducitur media. Autem, id est, sed invenies hoc multoties, id est, in multis locis expressum, id est, manifeste ostensum, et, id est, etiam a Theologis, id est, a tradentibus sacram Scripturam, non solum per sapientes, sed et per legem divinam. Enim, id est, quia quando humanitas, id est, mansuetudo, quia homo est animal mansuetum natura, divina, quae omnia potest, et paterna, propter misericordiae affectum, corripiens populum Israel nutritive, id est, per modum nutrientis ut solidet

in bono, et hoc pro sacra salute ejus, scilicet Israel, et tradens eum nationibus, scilicet Chaldaeis, ut legitur in fine Regum , ulciscentibus in eos pro peccatis eorum, et immanibus, id est, immansuetis, et hoc in correctionem, id est, ut emendaretur, omnigena traductione provisorum in melius, id est, omnimodo dirigendo provisam eis correptionem in bonum eorum, quod intenditur. Sic dico erudiens, et tradens : sed postquam haec completa sunt, et captivitatem dimisit, id est, remisit, et etiam reduxit eos clementer ad priorem beneficentiam, reducendo eos in terram quam patribus eorum promiserat benigne, et dederat, ut habetur in principio Esdrae , quando quidem sic erat, unus de numero Theologorum, id est, divina tradentium, scilicet Zacharias Propheta, vidit unum de numero Angelorum primorum, id est, supremorum, ut aestimo, ex circumstantia Scripturae, et eorum qui sunt immediate circa Deum, quod est proprium primae hierarchiae, ut dictum est. Videt dico eum discentem, id est, audientem ab ipso Deo immediate consolatoria verba de hoc, id est, de dicta reductione, ut dictum est, id est, sicut scriptum est Zach. I, 11\ et seq., ubi dicitur, quod vidit vitum stantem inter myrteta, qui clamavit ad Deum: Domine exercituum ,usquequo tu non misereberis Jerusalem, etc. Et respondit Dominus Angelo... verba bona et consolatoria. Vel ut dictum est a nobis in praecedenti capitulo ubi diximus, quod "primi immediate accipiunt a Deo. " Et quia dixerat Angelos primos et circa Deum, cum ultimus ordo sit Angelorum, respondens tacitae objectioni, interponit parenthesim : enim, id est, quia haec cognominatio est communis om. nibus ordinibus,ut diximus supra, cap.v. Vero, id est, sed Zacharias, videt, ut ibidem legitur, alterum de numero sub- lectorum, id est, inferiorum Angelorum provenientem in occursum primi, qui audivit verba a Deo, tanquam ad susceptionem illuminationis oh eo de hoc facto, prout est in recipiendo, et perceptionem prout jam recepta est: deinde videt inferiorem Angelum eruditum divinum consilium, id est, de divino consilio, quantum ad praedictum factum, ab ipso scilicet primo, tamquam a summo sacerdote, cujus est primo subditis illuminationes immittere. Hunc dico videt docere, et, id est, etiam Theologum, scilicet Zachariam, conversum ad se, hoc, scilicet quoniam Jerusalem habitabitur fructuose, id est, affluentia bonorum a multitudine hominum.''