EXPOSITIO TEXTUS.

Alter autem Theologorum, etc.

Hic probat idem per auctoritatem Ezechielis,cap.IX,dicens : Haec vidit Zacharias. Autem, id est, sed alter de numero Theologorum, scilicet Ezechiel, inquit, id est, dicit, ab ipsa gloriosissima divinitate super firmata, id est, immutabiliter illis praeeminente,est promulgatum, id est revelatum, sacratissime, id est, sacro lumine ipsi Cherubin, hoc scilicet superiores illuminare inferiores : vel superfirmata ipsi Cherubin, quia legitur Ezech.IX, 3 : Gloria Domini Israel assumpta est de Cherub, quae erat super eum. Enim, id est, quia humanitas , id est, benignitas divina dux exercitus, secundum quod Deus dicitur Dominus exercituum. Alia littera," exercitativa," id est,exercens patientiam per flagella. Hoc dico traducens, id est, promovens ipsum Israel in melius per disciplinas, id est, correctiones, ut dictum est supra. Hoc dico respondetur Angelis corripientibus malos divina justitia, id est, poena. Et hoc dico justificavit, id est, ut justos non puniri dixit correctos, id est, gementes et flentes super malis aliorum, ut ibi dicitur. Alia littera, et est planior. Hoc dico, condemnat, id est, puniri praecipit justitia divina, ut supra, obnoxios p oenae : et eadem justitia innoxios, id est, bonos. Hoc, scilicet con-

demnatio malorum et absolutio bonorum, docetur primus post Cherubin, cum dixit promulgatum. Docetur dico praecinctus lumbos, id est,habens praecinctos lumbos sapphiro, id est, sapphirina zona,quae signat caelestem vitam, qui induebatur poderam, id est, lineum vestitum usque ad talos juxta symbolum hierarchicum, id est, in similitudinem hierarchicam. In hoc enim significatur munditia, quae decet hierarchias. Autem, id est, sed divina ordinatio imperat reliquos Angelos qui habebant secures quasi ad exercendum vindictam. Hoc dico doceri a priori, scilicet praecincto sapphiro, divinum judicium de hoc, id est, de ultione divina per eos exsequenda. Enim,id est, quia divina ordinatio dixit quidem, id est, certe ei, scilicet induto poderam, transire per mediam Jerusalem, et dare signum, scilicet thau, in frontes virorum correctorum, id est, in quibus non est aliquid corrigendum. Alia littera habet, " viro-" rura gementium et dolentium. " Sed aliis, scilicet qui habebant secures, dixit : Exite in civitatem post eum, quasi ejus illuminationem sequendo, et percutite et nolite parcere oculis vestris, autem, id est, sed ne appropinquetis ad omnes super quos est signum thau. Per hoc ergo quod statuitur illis percutere secundum distinctionem illius per signum, patet quod aliquid iriguntur in exsecutionem divinae voluntatis ab aliis qui immediate recipiunt a Deo.

Quid fortassis quis dixerit, etc. Hic probat per auctoritatem Danielis, et immiscet aliqua de Ezechiele, dicens : Quid fortassis quis dixerit, id est, quid poterit respondere aliquis negans illuminari medios a primis, ad hoc quod scriptum est Danielis, IX, 23, sic de Angelo dicente ad Danielem, hoc scilicet, Exivit sermo ? Nostra littera habet," Ab exordio precum tuarum egressus est sermo... Ego autem veni ut indicarem tibi, " In quo datur intelligi sermonem revelationis illius ab aliis in ipsum exisse.

Aut quid diceret de ipso primo Angelo, scilicet praecincto sapphiro, recipiente ignem ex medio Cherubin ? Ezech. x,2, sic dicitur : Dixit ad virum, qui indutus erat lineis, et ait... Imple manum tuam prunis ignis, quae sunt inter Cherubim, et effunde super civitatem. In quo datur intelligi eum de consumptione civitatis per Cherubin erudiri. Aut quomodo solvet illud ejusdem, scilicet Ezechielis in eodem capite, v, 7, quod est abundantius et efficacius in ostensionem ordinis angelici, id est, ad ostendendum quod unus accipit ab alio. Illud dico, quoniam et, id est, etiam Cherubin immittit ignem in manus induti sanctam stolam, scilicet poderam, de quo supra : sic enim ibi dicitur : Extendit Cherub manum suam de medio Cherubim, etc. In quo idem significatur, sed expressius quam primo.

Aut quid dicet de Angelo vocante Gabrielem divinissimum, propter divina altissima quae revelavit, et dicente ei :Fac intelligere istum, scilicet Danielem, visionem (Dan. VIII, 16), in quo ostendit Daniel unum Angelum ab alio illuminari, ut Prophetam illuminet.

Aut quid dicet ad alia quaecumque dicta sunt a sacris Theologis, id est, divinae Scripturae traditoribus, de ornatu deiformi, id est,Deo similem facienti, caelestium hierarchiarum, ad quem, scilicet ornatum, ordinatio, id est, dispositio nostrae hierarchiae, scilicet Ecclesiasticae,est assimilata, secundum quod possibile est sibi, habebit in cognitione angelicam pulchritudinem, quantum est possibile in characteribus, id est, per figuras haberi. Ipsa dico ordinatio formata illuminationibus per eum, scilicet ornatum, ei reducta per eum ad superessentialem causam omnis hierarchiae simul acceptae tam angelicae quam humanae, scilicet Deum. Usque adhuc pendet interrogatio. Quasi diceret : Nihil aliud ad hoc poterit dicere, nisi quod a nobis dictum est.