EXPOSITIO TEXTUS.

B. Sed et eloquium, etc.

Hic solvit quod contra praedicta posset objici. Dixerat enim, quod non est aestimandum deos alios imperare aliis gentibus. Sed contra hoc videtur esse quod Moyses in Cantico dicit : Pars autem Domini populus ejus. ''Videtur enim per hoc quod distributis aliis populis, aliis diis, aut Angelis, sibi in partem retinuerit populum Israel. Et ad hoc solvens dicit, quod hoc dictum est, quia ultra alios in Deum sint reducti.

Per hoc autem quod genti Judaeorum praefecit aliquem. Angelum, datur intelligi quod ipse non singulariter ejus curam

habeat, sed de omnibus populis, distribuendo singulis Angelos.

Littera sic construitur : Diximus, quod non Imperabant alii dii gentibus. Sed et, id est, etiam illud eloquium, Moysi,quod videtur contra hoc esse, accipiendum est, id est, exponendum secundum ipsam, q uam diximus, sacram intelligentiam, non ut hoc sit dictum, Deo non partiente cum aliis Angelis aut diis nostrum ducatum, et ipso Deo contento, ut in sua sorte in principatum gentis Israel et ducatum ejusdem gentis, ita quod sit princeps tantum illius gentis, et alii aliarum. Sed intelligendum est ut, Id est, sicut ipsa excelsa providentia et divina una omnium hominum simul, id est, similiter : hoc dico distribuente omnes homines salutariter, id est, ad salutem, manuductionibus, i d est, ducatibus sive custodiis restitutoriis, i d est, quibus restituuntur in Deum, Angelorum propriorum, id est, sigillatim unicuique praefectorum : et hoc fit solo populo Israel converso in illuminationem et cognitionem veri Dei, fere ultra omnes. Hoc dicitur propter perfectissimos qui fuerant in aliis gentibus, sicut Job et Melchisedech. Unde, quia scilicet Israel est magis reductus, licet non solus, Theologia, id est, sacra Scriptura, quidem ait: Facta est portio Domini, supple, Israelis, significans seipsum, scilicet Deum, possedisse Israel in famulatum

veri Dei : maxime autem, i d est, sed Theologia ostendens, et, i d est, etiam eum, scilicet Deum distribuisse caeteris gentibus Angelos, ita quod cuidam sanctorum Angelorum assignat unam gentem in cognoscendum, id est, ut gens illa cognoscat per eum, scilicet Angelum, unum principium omnium, scilicet Deum. Scriptura dico hoc ostendens, dixit Michaelem duxisse Iudaicum populum, id est, fuisse ducem Judaici populi (Dan. x, 15). Vel sic Deus ostendens eum, id est, se distribuisse caeteris gentibus Angelos, dixit, id est, Imperavit cuidam, sanctorum Angelorum, scilicet Michaeli, duxisse, id est, ut duceret Iudaicum populum, ut supra. Deus dico vel Scriptura per hoc nos aperte edocens unam providentiam esse omnium, scilicet divinam, supercollocatam, quia regit sine mixtione sui, superessentialiter, quia est super omnem essentiam, omnibus virtutibus simul visibilibus et invisibilibus : autem, i d est, sed edocens omnes Angelos imperantes per singulas gentes extendere, id est, educere quasque virtutes, scilicet cujuslibet gentis, voluntate essentiali, id est, naturali, quia, sine coactione, quod est naturale nobis. Extendere dico in ipsum, scilicet Deum, ut proprium principium uniuscujusque : et hoc faciunt sequentes actionem ejus ut primi agentis.