DIVISIO TEXTUS.

Annexa est itaque sic ipsa quidem norabilissima, etc.

Determinatis his quae pertinent ad unamquamque hierarchiam per se, determinat de his quae conveniunt eis communiter, scilicet de connexione earum. Unde istud capitulum est de consequentibus hierarchiam secundum se, sequentia vero quatuor de consequentibus hierarchiam secundum ea quae traduntur in hierarchia.

Dividitur autem hoc capitulum in partes quatuor. In prima determinat de connexione omnium hierarchiarum in connexione ad unum principium, et actu manifestationis uno. In secunda de connexione trium ordinum in hierarchia una, ibi (g 2, A), Et omnem hierarchiam. In tertia de connexione personarum et ordine uno, ibi (g 2, A), Sed et ipsam per singulas. In quarta de connexione virtutum in una persona, ibi (g 2, B), Addiderim etiam.

Prima dividitur in partes duas. In prima repetit sub compendio quae dicta sunt de distinctione trium hierarchiarum quia artificialiter non quaeritur connexio nisi inter distincta. In secunda ponit connexionem earum, ibi, Secundum ipsam bene ordinantis. Unde etiam in titulo dicitur : Repetitio et synagoga angeli-cae ordinationis. Item, circa primum ponit dispositionem trium hierarchiarum, secundum quae potest dividi pars prima.