EXPOSITIO TEXTUS.

A. Et omnem hierarchiam, etc.

Littera sic legatur : Sic omnes communiter connectuntur secundum ordinem primi, medii, et ultimi. Et, id est, etiam videmus omnem hierarchiam, id est, angelicam et humanam esse divisam in primas et medias et ultimas virtutes secundum ordinem ad actum unum hierarchiae. Sed et, id est, etiam dicendum est, quod Deus decrevit ipsis harmoniis, id est, proportionibus divinis, id est, in participatione divinorum, scilicet primi, medii, et ultimi ipsam dispositionem, id est, ordinem, per singulas, scilicet personas vel essentias : et hoc specialiter , id est, speciali ratione connexionis. Et hoc probat per Scripturam dicens : Propter quod , scilicet quia discreti sunt, ipsi Theologi, scilicet Isaias, VI, 3, aiunt et, id est, etiam ipsos Seraphin divinissimos id est, Deo propinquissimis, clamare alterum ad alterum, aperte declarantes in hoc, ut aestimo, non propter dubietatem dicit, sed propter timorem imperfectae expositionis, quoniam ipsi primi, scilicet inter eos, tradunt secundis scientias, id est, illuminationes, Theologicas, id est, a Deo acceptas.