DUBIUM.

Sed videtur, quod hoc non sit simile praedictis.

1. In omnibus enim Angelis est una communis ratio participandi illuminationes, quia deiformiter : homines autem secundum hanc rationem non participant : ergo non videtur, quod debeant denom mari a caelestibus ordinibus, quamvis quidam eorum denominentur ab aliis.

2. Praeterea, Eorum quae non sunt in hierarchia una, non est una participatio : homines autem cum Angelis non sunt in eadem hierarchia : ergo non habent eandem participationem illuminationum. Et sic non videntur denominari ab Angelis .

3. Praeterea, Prima relatione accipere illuminationem non in umbra continui et temporis, et secunda relatione obumbrate accipere, facit aequivocam acceptionem : cum igitur Angeli prima relatione accipiant, homines vero secunda, ut dicitur in libro de Motu cordis, videtur quod homines non possunt denominari ab illuminationibus Angelorum.

4. Praeterea, Alius est gradus sacerdotis et Prophetae, sicut habetur I ad Corinth. XII, 10. Inconvenienter ergo dicitur Angelus propter participationem propheticae proprietatis.

5. Praeterea, Sicut comparatur hierarchia ad hierarchiam, ita summum in hierarchia una ad summum in alia : sed summus sacerdos habet summum gradum in nostra hierarchia, quae comparatur caelesti : non ergo debuit comparari Angelis qui sunt infimi in illa hierarchia, sed magis Seraphin.

6. Praeterea, Pontifices habent officium circa universitatem : Angelorum vero officium est circa singulos : non ergo debent sacerdotes Angelis comparari.

Solutio. Dicimus, quod sacerdos congrue potest dici Angelus propter participationem divini luminis procedentis a primis usque in ultimos, quamvis sit diversitas accipiendi in modo ex parte recipientium : propter quod est etiam diversitas in hierarchia. Et per hoc patet solutio ad prima tria.

Ad quartum dicendum, quod Propheta secundum quod large dicitur, quicumque scilicet divinas illuminationes alios instruit, non facit gradum diversum a sacerdote : quia hoc sacerdotis est. quamvis non sit Propheta, eo quod per se revelationes occultorum a Deo accipiat, sicut proprie dicitur Propheta : et illo modo sumitur I ad Corinth.XIV,29 : Prophetae duo, aut tres, etc.

Ad quintum dicendum, quod ratio illa procederet si compararetur hierarchia nostra angelicae ex aequo, sed illa est superior : et ideo inferior in illo est supra eum qui est supremus in ista.

Ad sextum dicendum, quod non attenditur in hoc similitudo quod est illuminare singulos vel universos, sed in hoc quod est divinam illuminationem recipere et aliis edere.