EXPOSITIO TEXTUS.

Littera sic legatur : Determinavimus praedictas quaestiones. Age, adverbium hortandi, inspiciamus secundum virtutem nostram, et, id est, etiam hoc, scilicet ut quid dicitur a Theologis, id est, scriptoribus Canonicae Scripturae, Isa. (VI, 6 ) fuisse missus Seraphin. Sed propter hoc quod pluraliter dicit Theologis, potest dici, quod etiam Ezech. x, 2, dicitur, quod ignis erat in medio rotarum, per quod significatur Seraphin. Etenim, id est, quia quispiam, id est, aliquis responderit, id est,posset respondere, quia, id est, quod non quisquam, id est, aliquis suppositorum, id est, inferiorum Angelorum purgat sacerdotem, id est, Isaiam sacra dantem, innumeris, id est, a multis peccatis, sed unus quidam ex maximis essentiis, id est, supremis. Vel aliter, ex maximis essentiis innumeris, quoad nos : et hoc relinquit pro inconvenienti, quia per hoc destruetur totum quod determinatum est. Quamvis quidam hoc sustineant, dicentes quod cum Deus aliqua praeter ordinem naturae facit, non est mirum si non servato ordine angelico nuntiat, sicut est de Incarnatione Filii, quae fuit Prophetae nuntiata. Sed contra hoc est quod supra,cap.IV, determinatum est, quod ipse Christus secundum quod homo angelicis dispositionibus subditus fuit : ipse enim non fuit incarnatus ut ordinem rerum destrueret, sed ut ordinem repararet.

Quidam ergo aiunt, etc. Hic incipit solvere. Et dividitur in partes duas secundum quod duas ponit solutiones. Secunda,ibi(sig. 2),Alter autem non nimis,etc. Prima ergo solutio est, quod ille qui purgavit Prophetam, fuit de inferioribus ordinibus dictus Seraphin aequivoce per imitationem actus superiorum : quia purgavit per ignem.

Littera sic legatur : Ergo,quia sic non potest responderi, quidam aiunt solvendo, quia, id est, quod eloquium, id est, sacra Scriptura non nominat venisse in purgationem Theologi, scilicet Isaiae, unam de numero mentium primarum, id est, Angelorum supremorum existentium circa Deum, per hoc quod dicit Seraphin venisse : et hoc dicunt juxta diffinitionem, id est, determinationem societatis, id est, connexionis cunctorum intellectuum, id est,Angelorum. Diffinitionem dico jam ante redditam a nobis : vero, id est, sed aiunt quemdam de numero Angelorum inferiorum praestantium, id est, praepositorum nobis sacrificantem, id est, sacra facientem, purgationem Prophetae, scilicet Isaiae, fuisse vocatum Seraphin aequivoce, non fortuna et casu, sed per imitationem proprietatis superioris ordinis, quae est primo in illo, scilicet propter ablationem peccatorum dictorum, id est, confessorum a Propheta, dum dixit : Vir pollutus labiis ego su m(Isa. VI, 5.) Ablationem dico igneam et caelestem, id est, per ignem qui consumit peccata, in quo assimilatur calori ignis, et conservat et perficit, in quo assimilatur calori caeli : dicitur enim ibi (VI, 6 et 7) quod tetigit labia ejus igne quem forcipe tulerat de altari : et supra in proprietatibus Seraphin dictum est, " igneum caelitus : " et etiam propter resuscitationem purgati a peccatis in obedientiam divinam, qua Propheta se obtulit ut mitteretur a Deo : et ideo praedicti aiunt eloquium,id est,sacram Scripturam, dixisse unum ex Seraphin simpliciter, id est, sine determinatione quod esset de pri-

mis, non aliquam de numero virtutum purgativarum secundum proprietatem ignis collocatarum circa Deum, scilicet primarum, sed de numero praestantium, id est, praepositorum nobis immediate.