BALTH. CORDERII, S. J. INTERPRETATIO.

Ut autem dicam clarius, exemplis utar familiaribus (quae tametsi Deo, qui cunctis eminet, non ita congruant, nobis tamen planiora sunt), solaris, inquam, radii diffusio materiam sibi proximam, quippe caeteris liquidiorem, facillime trajicit, et per eam coruscationes suas clarius succendit ; verum ubi in densiores aliquas materias inciderit, obscuriorem cernitur habere luminis diffusionem, ob materiarum, quae illuminandae sunt, ad lumen diffundendum ineptitudinem ; atque inde sensim ad hoc contrahitur, ut vix ultra distribui jam possit. Eodem modo calor ignis magis se diffundit in ea quae ipsius sunt capaciore, et ad ejus similitudinem facile cedunt, et adducuntur ; verum in naturis illi reluctantibus contrariisve, vel nullum aut exile efficacitatis ejus igneae vestigium apparet ; quodque aut majus est, in ea quae non sunt ejusdem generis, per illa quae ipsi jam accomodata sunt se ingerit, ita ut primum, si ita res ferat, ignea faciat ea quae facile ignescunt, atque iis adhibitis, aut aquam, aut aliquid aliud eorum quae difficile ignescunt, eodem modo calefaciat.