DUBIUM.

Et ad evidentiam eorum quae in Littera dicuntur, oportet hic quaerere de his quae Seraphin attribuit.

i. Videtur enim, quod incongrue utatur eorum manifestatione : supra enim, cap. VII, dictum est, quod illuminationes primae hierarchiae sunt circulares : hic autem dicit, quod habent extensionem quae est secundum rectitudinem : ergo contradicit sibi.

2. Praeterea, Omnes Angeli habent visionem absolutam a speculo et aenigmate, cum habeant intellectus deiformes : ergo non debuit specialiter attribui Seraphin.

3, Praeterea, Ezech. 1, 6 , dicitur de Cherubin, quod habent quatuor pennas, quae sunt quatuor alae, qui tamen sunt in eadem hierarchia cum Seraphin : ergo similiter Seraphin debuit hic ostendi tantum cum quatuor alis, et non cum

sex.

4. Praeterea, Ad motum unum sufficiunt duae alae : cum ergo prima hierarchia sumatur penes conversionem in Deum, et sic videtur habere tantum unum motum, videtur quod non deberet describi nisi tantum cum duabus alis.

Solutio. Dicendum ad primum., quod illuminationes primae hierarchiae ex parte contemplati sunt circulares, quia involvuntur circa id quod est primum, medium, et finis, ut supra patuit : sed ex parte contemplantis quod elevatur in id quod est supra ipsum, est extensio similis motui recto.

Ad secundum dicendum, quod licet omnes habeant absolutam contemplationem quantum ad modum ex parte contemplantis, quia sine velamine speculi et aenigmatis : quantum tamen ex parte objecti est proprium primorum, quia accipiunt in ipsa prima virtute non coarctata ad aliquid : in his vero quae post ipsas sunt, contrahitur et determinatur, et tanto magis, quanto plus descendit : et ideo inferiores recipientes in superioribus et non in ipso primo, non habent absolutam extensionem.

Ad tertium dicendum, quod invenitur et binarius et quaternarius et senarius alarum in Angelis descriptus. Bi narus enim est secundum duo quibus elevantur in motu contemplationis, scilicet capacitas naturae, et illuminatio descendens, sine quibus non possunt in altum contemplationis elevari. Duplex vero binarius, qui est quaternarius alarum, est secundum duo opera ipsorum, scilicet conversionem in superiora et inferiora : et ad utrumque exigitur binarius alarum, ut sint altivoli in superiora, et citivoli in inferiora, per facilem exsecutionem in utroque, quorum exigitur donum capacitatis naturae. Sed senarius alarum secundum Dionysium intelligitur, quod duobus alis velabant caput suum, et duabus pedes suos, et duae erant in medio corporis : quamvis Augustinus aliter exponat, quod " velabant corpus et pedes sedenti " super thronum. " Unde secundum Dionysii expositionem significantur illuminationes trium hierarchiarum, quae habentur a superioribus, qui habent quod est inferiorum, et non e converso. Unde per binarium alarum qui erat in capite, significatur illuminatio primae hierarchiae, et per medias mediae, et per eas quae in pedibus erant, illuminatio ultimae. Ezechiel ergo tantum posuit quatuor : quoniam sibi ostendebantur secundum quod operabantur ab captivitatem filiorum Israel, vel eorum liberationem, et secundum quod accipiebantur de hoc illuminationes per conversionem in Deum. Sed Isaiae ostensi sunt Seraphin secundum quod sunt in vicinitate ad Deum : et ideo debuerunt sibi ostendi cum sex alis, quod pertinet ad perfectam illuminationum receptionem. Et per hoc patet solutio ad alia.