EXPOSITIO TEXTUS.

Littera sic legatur: Et, id est, etiam inter alia quae determinata sunt, ut aestimo, hoc est dignum intellectuali cognitione, id est, ut per causam cognoscatur, scilicet quia traditio eloquiorum, id est, sacra Scriptura, ait de Angelis, eos esse millies millia et decem millia decies millies (Dan. vii, 10). Hoc dico, ait re-

volvens et multiplicans in seipsam sublimissimos, id est, maximos numerorum secundum nos, scilicet decem centum mille : quia non habemus nomina majorum numerorum, nisi per multiplicationem horum in seipsos : et per hos numeros maximos nobis aperte significans ordinationes caelestium essentiarum secundum individua esse innumerabiles quoad nos : et hoc verum est. Enim, id est, quia beatae militiae, ut alludat verbo beati Job, xxv, 3 : Numquid est numerus militum ejus ? Militiae dico supermundanum intellectuum, id est, Angelorum sunt multae superantes commensurationem, id est, proportionem materialium numerorum secundum nos, id est, rerum materialium quae sunt apud nos. Commensurationem dico infirmam, id est, infirmarum rerum respectu virtutum superiorum, et coarctatam, id est, diminutam respectu earumdem, et haec multa sunt gnostica, id est, nota diffinite, id est, determinate a sola intelligentia, quantum ad cognitionem principiorum, et scientia, quantum ad cognitionem principiatorum, supermundana et caelesti, scilicet angelica: et haec cognoscunt non a se, sed secundum ipsam sanitatem, id est, perfectionem, ditissime, id est, abundantissime donatam eis, scilicet Angelis. Sanitatem dico vel perfectionem scientiae divinae multae, id est, quam a Deo participant copiose. Donatam dico a sapientifica, id est, divina sapientia factiva omnium quae sunt simul acceptorum. Sapientificam dico principii subsistentis, id est, per se existentis, non commixti superessentialiter, scilicet Dei, et ejusdem causae substantificae, id est, facientis omnem substantiam, et ejusdem virtutis continentis in esse omnia creata, et ejusdem consummationis active ambientis, id est, circumeundo per providentiam perficientis : potest enim describi primum principium, aut secundum quod est in se, et sic est quod dicit subsistentis principii : aut secundum quod producit alia, et hoc vel secundum rationes ideales, et quantum ad hoc dicit sapientifica : vel secundum quod operatur per eas in causata, et hoc vel dando esse, et sic dicit causae substantificae : vel conservando in

esse, et sic dicit virtutis continentis, in esse scilicet : vel perficiendo per reductionem in finem, et sic dicit ambientis consummationis.