DIVISIO TEXTUS.

Fer age quod restat, remittentes, etc.

Determinatis his quae proprie dicuntur de Angelis, vel in speciali, vel in communi, in hoc capite determinat de symbolis quibus figuraliter manifestantur.

Et dividitur in partes duas. In prima determinat de figurationibus Angelorum sensibilibus. In secunda determinat de determinationibus eorum, ibi (sig. 13), Reliquus nobis.

Prima dividitur in duas. In prima determinat quid et quomodo de figurationibus istis sit agendum. In secunda incipit agere, ibi (sig. 2), Inchoandum autem ratione, etc.

Prima dividitur in tres. In prima dicit quo modo et ordine de figuris determinandum sit. In secunda dicit, quod non est inconveniens si eadem figura aptatur his quae sunt in diversis ordinibus, ibi, Unum autem sit. In tertia dicit quid considerandum sit in istis figurationibus vel formationibus, ibi, Et sursum igitur conversibiliter.