EXPOSITIO TEXTUS.

Littera sic legatur : Non solum in figura ignea caelestes essentias describunt Theosophi, sed et, id est, etiam describunt ipsas humaniformes, id est, in forma hominum propter intellectuale hominis, et haec est prima proprietas, secundum quod est horizon intellectualis naturae : et iterum propter sursum haben-

do intuitivas virtutes, id est, visivas, hoc est, propter hoc quod habet virtutem intuendi supra se, quantum ad figuram, et haec est secunda quantum ad partem visivam : et iterum propter rectum figurae ejus, quia solus inter caetera animalia incedit rectus, quod est propter calorem cordis, ut dicit Philosophus, et haec est tertia, secundum quantitatem stantem sub figura : et propter luculentum, id est, hilarem faciem ejus, et haec est quarta, secundum qualitatem vultus sui : et etiam propter principale et regale secundum naturam, id est, propter hoc quod naturaliter aliis animalibus praeest, et regit ea, ut dicitur Gen. 1, 26 : Ut praesit piscibus, etc, et haec est quinta, in comparatione ad alia: et etiam propter hoc quod quidem, id est, certe est minimum secundum sensum, non quod habeat pauciores sensus, sed quantum ad reliquas virtutes irrationalium animalium, quae sunt majoris virtutis in sentiendo secundum sensum, et haec est sexta : vero, id est, sed est omnipotens virtute secundum magnitudinem intellectus practici, per quem habet virtutem faciendi sibi necessaria ad vitam vel defensionem : et ideo non dedit sibi arma natura sicut aliis animalibus, ut dicitur in libro de Animalibus : et haec est septima, secundum intellectum practicum : et etiam est potens continuitate secundum rationalem scientiam, et secundum quod continue deducit causas in causatum : sic enim accipitur hic ratio, et haec pertinet ad speculationem tantum, et est octava : et etiam est liberum et potentissimum secundum naturam animae, et haec pertinet ad voluntatem, cujus est primo libertas, et est potentissima secundum quod cogi non potest, et est nona proprietas.

5