EXPOSITIO TEXTUS.

A. Est atem per singula, etc.

Littera sic legatur : Per praedictas proprietates describuntur Angeli in forma humana. Autem, id est, sed est, id est, contingit, ut aestimo, invenire caelestes virtutes, id est, Angelos, et, id est, etiam per singula nostrae multiplicis partitionis corporalis, id est, omnibus partibus corporis nostri figuratas. Hoc dico contingit invenire nos, dicentes virtutes conspectivas, id est, visivas quae eis circumformantur, quidem, id est, certe, significare ipsum clarissimum respectum, id est, intuitum eorum qui est actus visus, ad divina luminaria : hoc expositum est per objectum, et haec est prima proprietas : et iterum dicimus hoc significare susceptionem divinarum illuminationum teneram, id est, humidam, secundum quod organum est bene receptivum, et haec est secunda : et etiam liquidam et bene reddentem alteri, sicut liquidum diffunditur ad altera, et haec est tertia : oportet enim organum esse visus bene receptivum, propter quod est humidum, et iterum tentivum formarum, et propter hoc est consistentium partium, et non aeris, sed aquae, ut dicitur in libro de Sensu et sensato : et oportet etiam, quod reddat species suas aliis virtutibus, scili-

cet sensui communi, et deinceps, et ob hoc est pervium. Sed secundum hoc videtur, quod non conveniat spirituali visui, cum non sit alia potentia prior intellectiva. Et dicendum, quod etiam intellectus reddit voluntati nuntiando formam qua movenda sit. Et susceptionem dico, non repercussum : visus enim debilis repercutitur a luce excellenti, utpote non potens in illam : et etiam noster intellectus repercutitur a luce divina, sed non intellectus Angelorum intuentium ipsum immediate : et sic est quarta, per comparationem ad objectum secundum excessum. Non talem dico, sed acute mobilem, et puram et planam. Omnis enim oculus circularis est, et ex hoc habet quod sit mobilis. In acutum autem movetur secundum quod radii congregantur in pupilla, et ex hoc confortatur ad cognoscendum speciem objecti, et significat in Angelis subtilem intuitionem intellectus : et haec est quinta, secundum proportionem ad objectum. Et susceptionem dico puram, in quantum humor crystallinus qui intus continetur, segregatus est ab omni terrestri, per quod impediretur ad receptionem : et sic est sexta. Et planam, secundum quod tunicae exterioris una pars alteri non supereminet : si enim superemineret una, obumbraret alteram, et sic impediret receptionem specierum : et haec est septima. Susceptionem dico impassibiliter : per hoc enim quod oculus sphaericus est, congregantur radii ad punctum unum : et ideo eliciunt calorem, sicut elicitur ignis de crystallo rotundo, et ex calore resolvitur humor, et lacrymantur oculi : et tantum potest intendi lux, quod corrumpitur visus. Haec autem passio non potest contingere in Angelis, et haec est octava.

B. 01factuum vero. Hic ostendit quomodo convenit eis olfactus.