DUBIUM.

1. Sed videtur, quod superfluit ponere auditum in eis : quia de organo auditus secundum idem objectum possunt accipi potentiae plures : sed secundum verum accipitur tam visus quam auditus spiri-

tualis, ut dictum est : ergo ponendo visum non debuit in eis ponere auditum.

2. Praeterea, " Auditus deseruit do-" ctrinae," ut dicit Philosophus : sed sicut dicit Jerem. XXXI, 34 : Non docebit ultra vir proximum suum : omnes enim cognoscent me, etc, et multo magis hoc in Angelis verum videtur : ergo non est in eis auditus.

3. Praeterea, Auditus percipit cum distantia per medium extrinsecum : sed Angeli non sunt distantes a suo beatificante : ergo respectu ejus non convenit eis auditus.

Solutio. Dicimus, quod sicut supra dictum est, auditus spiritualis Angelorum est quo percipiunt primum verum sub signis quibusdam, scilicet speciebus, scilicet creatis.

Unde dicendum ad primum, quod verum per se et sub signo acceptum est in diversa ratione objecti, sicut etiam eadem res corporalis percipitur diversis sensibus secundum diversa.

Ad secundum dicendum, quod non sit in eis doctrina qua unus doceat alium pertinentia ad esse beatitudinis, illuminat tamen unus alium de his quae pertinent ad dispensationem mysteriorum Ecclesiae, et dispositionem mundi, ut saepe dictum est, quamvis secundum omnia salvetur in eis ratio doctrinae per receptionem a Deo, secundum ejus perceptionem maxime distinguuntur sensus spirituales in Angelis.

Ad tertium dicendum, quod quamvis in eis non sit distantia localis, est tamen in eis distantia per essentiam.