DUBIA.

Sed hic dubitatur.

1. Privationem naturaliter praecedit habitus : cum igitur nudum sit privatio vestiti,prius debuit ponere vestes quam nudum .

2. Praeterea, Privatio cognoscitur per habitum, et insufficienter cognoscitur nudum, nisi praecognito vestito.

Et dicendum, quod Dionysius non ordinat ea secundum ordinem quem habent in his de quibus proprie dicuntur, sed secundum quod Angelis attribuuntur : nudi autem proprietas per se convenit Angelis, vestitum autem secundum aliquid circumpositum eis : et ideo prius de nudo determinavit.

Item, dubitatur de proprietatibus nudi quas Angelis attribuit.

1. Intellectus enim Angelorum exaltatur per divinam contemplationem et per modum contemplandi : ergo non convenit eis demissum.

2. Praeterea, Intelligunt ea quae sunt extra ipsos : ergo non convenit eis purum ab appositione eorum quae sunt extra.

3. Praeterea, Infra dicetur, quod zonae significant congregationem virtutum unitarum in seipsis : sed infinitum virtutis sequitur unitas ejus et congregatio, sicut dicitur in libro de Causis, quod. " virtus unita pius est unita quam multi-" plicata : " ergo immensurabile magis

pertinet ad significationem zonae quam nudi.

Solutio. Dicendum ad primum, quod demissum non dicitur hic infirmum, sed ampliatum et excelsum, prout dividitur contra restrictum pedis ex calceo, et convenit intellectui angelico, secundum quod eorum Intellectus non restringitur per continuum.

Ad secundum dicendum, quod sunt puri ab eorum quae sunt extra, appositione, quoad medium, licet non quoad objectum : cognoscunt enim res quae extra ipsos sunt, non recipiendo aliquam speciem ab eis, sed in lumine causae primae.

Ad tertium dicendum, quod immensurabilitas virtutis potest attendi quoad duo, aut quoad congregationem virtutum in uno : et sic virtus in. se roboratur, et sic significatur per zonam : aut quantum ad objecta multa in quae potest, et sic significatur per discalceatum, in quantum pes restringitur sub mensura calcei, et similiter nec Intellectus sub mensura intelligibilis.