449. De sancto Paulo.

1. Sancte Paule, pastor bone,

Vas electum Domini,

Praedicator

Gentium egregie.

2. Quem Damasco propinquantem

Lux divina subito

Circumfulsit

His verbis interrogans:

3. Saule, Saule, quid me caedis ?

Ego sum Jesus benignus,

Omnium conditor,

Qui te quoque

Condidi ex nihilo.

4. Tunc in terram corruisti,

Nec sufferre potuisti

Vocis vim coelicae,

Mox futurus

Doctor in ecclesia.

5. Seminans fidei

Dogmata catholicae

Numerum credentium

Aecumulans.

6. Ex quibus nos sumus,

Licet in novissimis

Constituti temporis

Angustiis.

7. Nos audi supplicantes,

Lux decus orbis hujus,

Atque vota famulorum

Pura mente famulantum

Recita judici,

Qui coclorum

Continet insignia.

8. Tu pastor nobis datus,

Tu gregis Christi custos,

Ejus pro salute semper

Supplicare regi nostro,

Cujus imperium

Sine fine

Manet in perpetuum.

9. Tu, feritas hominum

Quotiens id exigebat,

Carnem tuam cruciabas

Sempiternam

Ut acciperes gloriam.

10. Ter pelago navibus

Crepitis

Ingenti de periculo

Vix elapsus

Mortis merito coronaris

Ab altithrono.

11. Tu flagellis crebro caesus

Nomen Christi resonans

Superasti

Verbera carnificum.

12. Certe semel lapidatus

Inter imbres saxeos

Cecinisti

Cantica vivifica.

13. Multa sunt, quae memorantur

Multo plura, quae tacentur,

Vincula, verbera,

Quae subisti

Pro fide dominica.

14. Nunc in sede duodena

Post beatum Petrum sedes

Judicans populos,

Tuos quoque

Proprios contribulos.

15. Ideo petimus,

Ut, qui tanta passus es,

Damna nostra

Gravia consideres,

16. Variis casibus

Et timori subditis

Pietatis

Munere subvenias.

17. Nos juste pro peccatis

Tot poenis agitamur,

Pugnae foris, timor intus,

Ultor adstat loricatus,

Gladiis trucibus

Subjacemus

Et diris praedonibus.

18. His malis interventu

Nos tuo liberari

In amore salvatoris,

Qui pro nobis crucifixus,

Supplices petimus

Cum sudore

Tristis poenitentiae.

19. Naufragii conscius

Navi nostrae tempestate

Liberatae portum pande,

Ubi protinus

Inveniet Dominum.

20. Parce fruens dapibus

Sedulo nos pane, vino

Satiatos abstinere

Vitiis tribuas,

Quae necant animam.

21. Sancte Paule, praesul magne,

Nobis opem fer divinam

Et perenne

Gaudium in saecula.