480. De sancto Stephano rege.

1. Gaude, mater Hungaria,
Prolis agens praeconium
Cum laude multifaria
Patronum lauda proprium.

2. Hic tibi verus lucifer
Lumen fidei praebuit,
Datus a Deo legifer
Viam salutis docuit.

3. Geisae duci decrepito
Divina fit promissio,
Et Stephanus a Stephano
Vocatus est in utero.

4. Cujus ortus praedicitur
Patri coelesti nuntio,
Martyr ad matrem mittitur
Nascentis vaticinio.

5. Nato gaudet Hungaria,
Damnatur idolatria,
Coelestis datur gloria,
Beata fit memoria.

6. Puer crescens progreditur
Sicut cedrus in Libano,
Praedictum nomen inditur
Hinc a beato Stephano.

7. Dignis datur doctoribus
Imbuendus in literis,
Probis ornatur moribus
Sub annis adhuc teneris.

8. Adolescens progreditur
Verbum salutis serere,
Gens Hungara convertitur
Et baptizatur propere.

9. Olim erroris populus
Divinum lumen conspicit,
Pulsis tenebris sedulus
Se Christi jugo subjicit.
10. Trino Deo et simplici
Sit laus, honor et gloria,
Quae sancti regis supplici
Prece det eoeli gaudia.