470. De sancto Swithuno.

1. Aurea lux patrias, Wentana splendet in urbe,
Switnun sanctus adest, aurea lux patriae.

2. Blande patrone, tuis succurre benignus alumnis,
Confer opem famulis, blande patrone tuis.

3. Culmina celsa poli felici calle petisti,
Et nobis aperi culmina celsa poli.

4. Dextera sancta Dei terrae benedixit in omni,
Nos et ubique regat dextera sancta Dei.

5. Euge, beate pater, meritoque et nomine fulgens,
Undique signipotens, euge, beate pater.

6. Fulgida lux hodie nostris lucescit in oris,
Spargit ubique jubar fulgida lux hodie.

7. Gentibus Angligenis solemnia festa recurrunt
Et renovant jubilum gentibus Angligenis.

8. Haec veneranda dies astris arridet et arvis
Estque decora nimis haec veneranda dies.

9. Illa videre tuum meruit super astra meatum,

Digna fuitque obitum illa videre tuum.
10. Kastra beata poli psallunt jubilando tonanti

Congaudentque tibi castra beata poli.
11. Laeta vident Dominum felicia corda piorum

Et tecum jugiter laeta vident Dominum.
12. Mitis ades miseris, relevans a clade catervas,

Languida restituens, mitis ades miseris.
13. Nulla camoena tuas potis est evolvere laudes,

Narrat virtutes nulla camoena tuas.
14. O medicina potens, quae morbida corpora sanas,

Nos sana fragiles, o medicina potens.

15. Protege, sancte, tuos pia per suffragia servos

Nos et ab adversis protege, sancte, tuos.
16. Quae tua cuncta potest insignia promere lingua,

Pangere vox merita quae tua cuncta potest?
17. Regibus ac miseris idem patronus haberis

Subveniens pariter regibus ac miseris.
18. Solve nefas scelerum disrumpe et vincla reorum,

Flebile nostrorum solve nefas scelerum.
19. Te petitore Deus prius est praestare paratus,

Parcit et audivit te petitore Deus.
20. Vox tua celsithronum potis est placare tonantem,

Flectit et ad veniam vox tua celsithronum.
21. Xristus ab arce poli dat te rogitante salutem,

Mittit et omne bonum Christus ab arce poli.
22. Ymnifer iste chorus solvit tibi cantica laetus,

Permaneat gaudens hymnifer iste chorus.
23. Zelus amarus abest, ubi saecla per omnia pax est,

Pax ubi Christus adest, zelus amarus abest.
24. Agmen Amen resonat, quod ibi cum laude triumphat,

Cum Christo regnans agmen Amen resonat.

25. Mens habitans inibi canit Alleluja tonanti,
Exsultans jubilat mens habitans inibi.

26. En tibi, sancte pater, modicum cantavimus hymnum,
Quem commendamus, en tibi, sancte pater.

27. Nomina nostra choro sint sociata superno,
Stent et in angelico nomina nostra choro.