Lectio 4

Origenes in Matth.. Postquam Petrus confessus est christum filium dei vivi, quia noluit hoc eos interim praedicare, subdit tunc praecepit discipulis suis ut nemini dicerent quia ipse esset iesus christus. Hieronymus. Sed cum supra mittens discipulos ad praedicandum iusserit eis ut annuntiarent adventum suum, videtur esse contrarium quod hic praecipit ne se dicant esse iesum christum. Mihi videtur aliud esse christum praedicare, aliud iesum christum. Et christus commune dignitatis est nomen, iesus proprium vocabulum salvatoris. Origenes in Matth..

Vel tunc leviter quidem de eo annuntiabant, quasi de magno et mirabili viro; christum autem esse eum nondum annuntiabant. Qui autem vult etiam christum eum praedicatum prius ab apostolis, dicet, quoniam leviter praemittere voluit eos mentionem nominis sui, ut interim facto silentio praedicationis huius, hoc ipsum quod leviter de christo auditum fuerat, digeratur in sensibus auditorum.

Aut ita est solvenda quaestio: ut videantur ea quae superius de annuntiando christo sunt dicta, non ad tempus pertinere quod fuit ante christi resurrectionem, sed ad tempora post futura. Haec autem quae mandat ut nemini dicant, tunc apostolis convenire: inutile enim est ipsum quidem praedicare, crucem autem eius tacere.

Propterea praecepit eis ut nemini dicerent quia ipse est christus, et praeparabat eos, ut postmodum dicant, quoniam ipse est christus, qui crucifixus est, et resurrexit a mortuis. Hieronymus. Quod ne quis putet nostrae tantum esse intelligentiae quod sequitur, causas tunc prohibitae praedicationis exponit: sequitur enim exinde coepit iesus ostendere discipulis suis quia oportebat eum ire hierosolymam, et multa pati a senioribus et Scribis et principibus sacerdotum, et occidi, et tertia die resurgere.

Est autem sensus: tunc me praedicate cum ista passus fuero: quia non prodest christum publice praedicari, et eius vulgare in populis maiestatem, quem post paululum flagellatum visuri sunt et crucifixum. Chrysostomus in Matth..

Quod enim semel radicatum est et postea evulsum, si iterum plantetur, difficile retinebitur apud multos: quod autem infixum semel est, et mansit postea immobile, facile provehitur ad augmentum.

Propter hoc autem immoratur tristibus praedicendis, et sermonem multiplicat, ut aperiat discipulorum mentes. Origenes.

Et vide quia non dixit: coepit dicere vel docere, sed ostendere; quia sicut corporalia ostendi dicuntur, sic ostendi dicuntur a christo ea quae loquebatur. Non autem sic puto eis qui corporaliter eum multa patientem viderunt, ostensa fuisse ea quae videbantur, quomodo discipulis ostensus est rationabilis sermo de mysterio passionis et resurrectionis christi: et tunc quidem coepit ostendere; consequenter autem postea capacioribus factis plenius demonstravit: quia omne quod coepit iesus, hoc perfecit. Oportebat autem eum ire in ierusalem, ut occidatur quidem in hierosolymis quae sunt deorsum, regnet autem resurgens in ierusalem caelesti.

Postquam enim resurrexit christus, et alii consurrexerunt ei, iam non deorsum quaeritur ierusalem, vel domus orationis in ea, sed sursum. Patitur autem multa a senioribus ierusalem terrenae, ut glorificetur ab his qui capiunt beneficia eius caelestibus senioribus. Tertia autem die resurrexit a mortuis, ut eripiens maligno, acquirat eis qui liberati fuerint hoc donum, ut baptizentur spiritu et anima et corpore in nomine patris et filii et spiritus sancti, qui sunt tres dies simul perpetuo instantes eis qui per eos facti fuerunt filii lucis.