Secunda Quinquagena.

1. Ave, per quam

spero restitui,
Cum ad vitam

resurgent mortui,
Quod in Eva

male distribui,
Tunc gaudium

dabis auditui,
Ut te possim

et tuo perfrui
Fructu tecum.

2. Ave, mitis

oliva gloriae,
Fructum ferens,

cuius deliciae
Gustum habent

plenum esurie,
Cum descrescens

crescat cotidie,
Ubi fratres

pascit meridie
Ioseph secum.

3. Ave, virgo,

salutis baiula,
Sicut vetus

signavit tabula,
Dum ascendens

ut fumi virgula
Florem defers

de caeli specula,
Cuius odor

detersa macula
Reddit vitam.

4. Ave, digna

Deo iuvencula,
Per quam prima

recurrunt saecula.
Sua Samson

arat in vitula,
Dum ad nostra

solvenda vincula
Caeli profers

de ventris cellula
Margaritam.

5. Ave, pacis

columba redditae,
Felle carens,

dum sinc fomite
Mersis defers

sab mortis gurgite
Ramum pacis

et vitae perditae,
Quem de tuo

produxit stipite
Radix Iesse.

6. Ave, virga

fecunda nucleo,
Qui devicto

mortis aculeo
Suos solvit

de nervo ferreo,
Nec iam lapsum

ut prius timeo,
Quem virtutis

obumbras clipeo
Indefesse.

7. Ave, cuius

ingressus vasculum
Orbis factor

per crucis baculum
De caverna

propulsat regulum,
Novi regis

effecta ferculum,
In quo suum

nunc regit populum
In salute.

8. Ave, per quam

succurri misero,
Sperat miser

errans ab utero,
Qui ad mortem

gressu praepostero
Currens nomen

regale peiero,
Sub Heliae

iacens iunipero
Dissolute.

9. Ave, mater sanctae spei,
Regis sponsa, cella Dei,
Tibi psallam, scala rei,
Per quam mihi memor mei
Dux caelestis aciei
Misit adiutorium.

10. Ave, porta regi grata,
Per quam transit calceata
Virtus patris ex te nata,
Ut resurgat innovata
Idumaea desolata
In figura gentium.

11. Ave, petra praeelecta,

Per quam dudum plebs deiecta
Exaltatur fide recta,
Nulla viri manu secta,
In quam templi sarta tecta
Princeps pacis terminat.

12. Ave, parens sine pari,
Valde te nos venerari
Laude decet singulari,
Per quam caelo, terrae, mari
Ex superno salutari
Laudem Deus germinat.

13. Ave, caeli margarita,
Terra sulco non attrita,
Per quam nobis vera vita,
Diu votis expetita,
Christus datur custodita
Ventris pudicitia.

14. Hic natura sic procedit,
Perscrutando victa redit,
Ius naturae caelo cedit,
Dum stirps sancta florem edit,
Dicat ergo, qui sic credit:
Ave, plena gratia.

15. Ave, parens contra morem,
Terra caeli bibens rorem
Germinasti salvatorem,
Virgo Deum, virga florem,
Sic bos suum possessorem
Parit intra stabulum.

16. Ave, decus puellare,

Stella maris absque mare
Caeli ferens luminare,
Maris iter singulare,
Per quod facit transmeare
Legislator populum.

17. Ave, terra benedicta,
Ne vocetur derelicta
Terra dudum maledicta,
Porta patet interdicta,
Ex quo cessit mors devicta
Crucis beneficio.

18. Ave, in qua sub momento
Pallet aurum ex argento,
Satum celans sub fermento,
Dum relicto firmamento
Sol se carnis indumento
Tuo vestit gremio.

19. Ave, per quam urbs superna
Ventris fulget ex lucerna,
In lege, qua sempiterna
Sede regnant in paterna,
Quos lex mortis ad inferna
Ab antiquo traxerat.

20. Ave, per quam lapsum genus
Surgit, dives fit egenus,
Venter tuus ager plenus,
Ex quo prodit flos amoenus,
Sub quo perdit alienus
Praedo, quod invaserat.

21. Ave, virgo, cuius pectus
Caeli replet architectus,
Ne desperet iam proiectus,
Cum in ligno sit erectus
Legis serpens, ut senectus
Renovetur saeculi.

22. Ave, vellus Deo notum,
Rore caeli madens totum,
Nil committens contra votum,
Nullum carnis passa motum,
Aquae vivae hauris potum
In salutem populi.

23. Ave, per quam est renata
Pax cum nato, pacis nata,
Dum terrenus fide data
Terra caelo coaptata
Fit caelestis relegata
Veteri discordia.

24. Ave, per quam plebs adiuta
Te tuente currit tuta
Nec iam morti dat tributa,
Rosa nata de cicuta,
Cuius morte distributa
Sunt armati spolia.

25. Ave, virgo, virga zeli,
Viam pandens Israeli,
Mons ostensus Danieli,
In quo templum regi caeli
Fit legato sub fideli
Ornante paraclito.

26. Ave, sacro vernans flatu,
Nardus, cuius odoratu
Tractus redit minor natu,
Primo mota sub reatu
Confirmatur terra statu
Libertatis reddito.

27. Ave, cella grata Deo,
Locus aptus Elisaeo,
Ut restringat se sub eo
Et devicto Philistaeo
Pacem nobis cum tropaeo
David noster referat,

28. Ave, mitis, ave, pia,
In qua mare cum Maria
Dulci sonat harmonia,
Praeparata regi via,
Qua de mundi phantasia
Nos ad vitam transferat.

29. Ave, petra singularis,
Quae intacta salutaris
Aquae fontem illis paris,
Quos post cursum huius maris
Sublimabit in praeclaris
Superna promissio.

30. Ave, per quam rex salutem
Fecit crucis per virtutem,
Lucc creans iuventutem,
Nec est ultra, cur me putem
Ob antiquam servitutem
Destinatum gladio.

31. Ave, vitis, arbor vitae,
Vitae botrus, de te vite
Prodit agnus sine lite,
Cuius nobis corpus mite
Potum mittit, quem nunc rite
De altari sumimus.

32. Ave, verbi vas arcanum,
Mundo ferens caeli granum,
Cuius odor reddit sanum,
Cuius sapor ius profanum
Prorsus tollit, quod per manum
Primae matris hausimus.

33. Ave, per quam rex egeno
Iudicavit, cum in foeno
Se coniunxit gemma caeno,
Ut reddatur iure pleno
Servitutis rupto fraeno
Liber servus Domini.

34. Ave, de qua lex naturae
Satis stupet, quae iuncturae,
Quis sit ordo geniturae,
Quod pudoris salvo iure
Se creator creaturae
Unit, Deus homini.

35. Ave, virgo quam privatis
Sede primae dignitatis
Dux praefecit bonitatis,
Ut te. duce cum beatis
Hortum intret voluptatis
Amota custodia.

36. Ave, virga, grata flori,
In qua contra legem thori
Man descendit iunctum rori,
Dum pax lege meliori
Reum negat dignum mori
Favente iustitia.

37. Ave, cella plena favi,
Cuius prodit ex conclavi,
Ad quem pressus carne gravi
Per te meum cor levavi,
Ad te clamo, quam amavi
A primaevo tempore.

38. Ave, dudum concupita,
Urbs in monte sancto sita,
In quam contra legis scita
Legislator intrat ita,
Quod post fructum insignita
Manes floris decore.

39. Ave, per quam vita mortem,
Morte vicit fortis fortem,
Cum deplorans nostram sortem
Nostrae sortis se consortem
In te facit, ut exsortem
Primae sorti redderet.

40. Ave, virgo, quam elegit
Rex in thronum, qui nos regit,
Opus tale nullus egit,
Cum sic in te se collegit,
Quod pudoris non effregit
Ebur, cum ascenderet.

41. Ave, per quam salus crevit,
Cum ros caeli te replevit,
Hic est ille, qui non sprevit
Nostrum genus, sed complevit
In te sola, quae decrevit
Ab aeterno fieri.

42. Ave, per quam in fornacem
Rex descendit ferens pacem,
Novam stella parit facem,
Rorem lucis efficacem
Qui conturbat contumacem
Exactorem inferi.

43. Ave, cuius in factura
Stupet omnis creatura,
Tota pulchra, tota pura,
Quae cum rege paritura
Iure tenes regni iura,
Cui nil in te displicet.

44. Ave, virgo, cuius natus
Est ex servo rex creatus,
Cum post mortem est renatus
Illi regni principatus,
In quo dudum iudicatus
Novus iudex iudicet.

45. Ave, virgo tangens caelum,
Fructum ferens intra velum,
Qui Iudaeae passus zelum
Fert iniuste mortis telum,
Ut transducat sic camelum
Per foramen lateris.

46. Ave, per quam delinquenti
Parcit virga testamenti,
Dum ardori venienti
Rorem infers, in quo genti
Regnum pandit revertenti
Auctor novi foederis.

47. Gaude, terra, caelum, plaude,
Venit iudex dignus laude,
Cui delusum caeca fraude
Reum solvit, ergo gaude,
Felix homo, dic et aude,
Dic: ave, laus virginum.

48. Ave, per quam lux illuxit,
Quam superna lux reduxit,
O quam felix, de qua suxit
Potum lactis, qui destruxit
Claustra mortis, ubi luxit
Diu genus hominum.

49. Ave, lignum incombustum,
Visu pulchrum et venustum,
Liguum mortis pellens gustum,
Dum dilectus suum iustum
Revelavit per angustum
Tui ventris aditum.

50. Ave, thronus novi regis,
Tu columna novae legis,
Quae sub nube solem tegis,
De te ductor sui gregis
Vocem suis nunc collegis
Dat per unigenitum.