Prima Quinquagena.

1. Ave, lignum

excelsum gloriae,
Secus aquas

plantatum gratiae,
Cuius nunquam

defluxit folium,
Quia virgo

gessisti filium.

2. Ave, regis

aeterni civitas,
Cuius virtus,

cuius auctoritas
Regit gentes

in virga ferrea
Et confringit

ut vasa testea.

3. Ave, causa

salutis hominum,
Cuius clamor

factus ad Dominum
Exaudiri

de monte meruit,
In te carnem

cum verbum induit.

4. Ave, virgo,

quae de caelestibus
Ostendisti

bona hominibus
Quos frumento,

vino et oleo
Satiasti

partu virgineo.

5. Ave, mater

aeterni principis,
Verba nostra

quae pie percipis,
Tuae scuto

benevolentiae
Coronemur

in regno gloriae.

6. Ave, salus

infirmi hominis,
Tui, quaeso,

vim medicaminis,
Quod medetur

cunctis languoribus,
Conturbatis

infundas ossibus.

7. Ave, mater

virgo concipiens,
Fac, ne iudex

iustus et patiens
Mentis nostrae

perscrutans angulos
Irascatur

per dies singulos.

8. Ave, cuius

magnificentia
Supercrescit

et transit omnia,
Tua, virgo,

nam suxit ubera,
Qui fundavit

lunam et sidera.

9. Ave, thronus,

et sedes gratiae,
Thronum enim

iudex iustitiae
Tuum sibi

paravit uterum,
Non oblitus

clamorem pauperum.

10. Ave, templum

virtutis caelicae,
Pia mater,

egenos respice,
Ne nos hora

supremi exitus
Procellarum

involvat spiritus.

11. Ave, de qua

surgens rex gloriae
Nostrae dedit

finem miseriae,
Cuius casta

narrant eloquia,
Castae matris

quanta sint gaudia.

12. Ave, mater

eius, qui tribuit
Nobis bona,

cam in te latuit,
Psalle, virgo,

illius nomini,
Per te vitam

qui dedit bomini.

13. Ave, pia,

viam te credimus,
Quam invenit

bonam altissimus,
Cum non esset,

bona qui faceret
Vel qui Deum

corde requireret.

14. Ave cuius

in tabernaculo
Habitavit,

qui pacem saeculo

Nuntiavit,

quem sine macula
Protulisti

de ventris cellula.

15. Ave, Christi

pars et hereditas
Notas nobis

fac vitae semitas,
Ut in tua,

felix puerpera,
Delectemur

in fine dextera.

16. Ave, potens

caelorum domina,
Nostras igne

mentes examina
Ne nos male

pro malis meritis
Leo saevus

voret in abditis.

17. Ave, mater

aeterni luminis,
Firmamentum

et virtus hominis
Tui fructu

salvemur uteri
Ne nos premant

dolores inferi.

18. Ave, cuius

de tabernaculo
Sol et dies

procedens saeculo
Inclinavit

nocti scientiam
Lucis novae

dans caecis gratiam.

19. Ave, mater

exorans filium,
Ut de sancto

mittat auxilium,
Ne sub nostris

cadamus hostibus,
Qui in equis

instant et curribus.

20. Ave, mundi

totius gaudium,
Cordis nostri

quae desiderium
Tribuisti

in tuo filio,
Non fraudasti

vitae solacio,

21. Ave, mater

intacta filii,
Cuius membra

foderunt impii,
Cuius carnem

pro vita saeculi
Obsederunt

cum tauris vituli.

22. Ave, mundum

vas et virgineum,
Fundens nobis

impinguens oleum,
Cuius nos sic

impinguet gratia,
Ut sequatur

misericordia.

23. Ave, orbis

terrarum domina,
Super mare

potens et flumina,
Cuius mira

virtute gratiae
Introivit,

ventrem rex gloriae.

24. Ave, pia,

in qua spem posui
Et quam tota

die sustinui,
Intra tuam

misericordiam
Meam, quaeso,

dele malitiam.

25. Ave, virgo

munda prae omnibus,
Inter mundos

quae lotis manibus

Introisti

ad aram Domini,
Summo templum

effecta numini.

26. Ave, orbis

illuminatio,
Salus nostra,

vitae protectio,
Tuum nobis

confer auxilium,
Si exsurgat

contra nos proelium.

26b. Ave, pia,

reducens exsules,
Pro me unam

a Christo postules,
Ut in domo

eius inhabitem
Et te templum

illius visitem.

27. Ave, cuius

caro refloruit,
Florens florem,

quae nunquam aruit
Placa tuis

auctorem precibus,
Ne nos tradat

cum peccatoribus.

28. Ave, domus

Dei et atrium,
Super aquas

ad cuius filium
Maiestatis

Deus intonuit,
In quo sibi

bene complacuit.

29. Ave, virgo,

cuius solacium
Planctum mundi

vertit in gaudium,
Saccum, quaeso,

concide veterem
Veste nova

decorans pauperem.

30. Ave, quae nos

de mortis laqueo
Eduxisti

partu virgineo,
Quandocunque

ducar ad exitum,
Meum tibi

commendo spiritum.

31. Ave, cuius

me sanet unctio,
Notum tibi

delictum facio,
In quo diu

ossa inveterant,
Carnis motus

menti dum imperant.

32. Ave, virgo,

felix puerpera,
Cuius cuncta

in fide opera,
Nam tu mater

misericordiae
Germinasti

fractum iustitiae.

33. Ave, salus

in omni tempore,
Casto Christum

circumdans corpore,
Qui suorum

intendens lacrimas
Nostras pie

redemit animas.

34. Ave, cuius

caro virginea
Scutum nobis

fuit et framea,
Qua nos Christus,

cum eam induit,
Fortiorum

de manu eruit.

35. Ave, de qua

fons vitae defluit,
Peccatorum

qui sordes abluit,

Cuius lumen
videmus lumine,

Sub alarum

nos serva tegmine.

36. Ave, cuius

ducatu hominum
Diriguntur

gressus ad Dominum,
Manum nobis

supponas, petimus,
Ne laedamur,

cum ceciderimus.

37. Ave, cuius

nos sanet puritas,
Quia non est

in nobis sanitas,
Ut sanatis

constet, quod gemitus
Noster a te

non est absconditus.

38. Ave, munda

verbo et opere,
Ne in lingua

delinquam temere,
Ori meo

pone custodiam,
Ut novica

loqui fastidiam.

39. Ave, mater

regis iustitiae,
Nos de lacu

educ miseriae
Et ad Christum

recto duc tramite,
Qui scriptus est

in libri capite.

40. Ave, mater,

intende pauperi,
Qui sub veste

mendicat veteri,
Et in die

mala nos libera,
Nostra iudex

ne libret scelera.

41. Ave, vitae

fons, quem desidero,
Cuius rivus

ex tuo utero
Nos emundat

a sorde maxima;
Quare ergo

tristis es, anima?

42. Ave, templum

lucis perpetuae,
Nos a gente

dolosa erue,
Quae, ut vitam

orares homini,
Introisti

ad aram Domini.

43. Ave, potens

in cuius nomine
Malignorum

spreto molimine
Triumphamus

devictis hostibus
Et salvamur

de affligentibus.

44. Ave, regis

domus eburnea,
Foris candens

et intus aurea,
Quam virtutum

varietatibus
Rex decoram

fecit prae omnibus.

45. Ave, cuius

Deus refugium,
Iuncta virtus

est adiutorium,
Quae virtutum

tenens fastigia
Super terram

ponis prodigia.

46. Ave, virgo,

quae plaudis manibus
Subiectisque

gaudes de gentibus,
Tuam nobis

ostende faciem,
Cuius Deus

dilexit speciem.

47. Ave, Dei

mons sive civitas,
Ad te nostras,

converte semitas
Ut in tuis

cognosci domibus
Mereamur

cum caeli civibus.

48. Ave, virgo,

per cuius meritum
Evaserunt

mortis interitum,
Quos redemit

de manu inferi
Tui germen

et fructus uteri.

49. Ave, cuius

ex Sion species,
Cuius ut sol

decora facies,
Unde venit

deorum dominus,
Ut humanum

deleret facinus.

50. Ave, mater

misericordiae,
Miserere

nostrae miseriae,
Miserere,

quia peccavimus,
Quia malam

coram te fecimus.