Secunda Quinquagena.

1. Ave, cui

nec vana gloria

Dominatur

neque malitia,

Da, ut prosit

plus tua aequitas,

Quam nocere

possit iniquitas.

2. Ave, quae non

sicut increduli

Deum negas

factorem saeculi,

Segrega nos

ab infidelibus,

Quae hoc fingunt

de suis cordibus.

3. Ave, mater

Dei almifica,

In nomine

cuius salvifica

Confidentes

in tuis viribus

Et statue

cum iudicantibus.

4. Ave, mortis

Evae destructio

Vitaeque spes

et restitutio,

Audi preces,

quibus te petimus

Neque spernas,

qui te deposcimus.

5. Ave, larga

donatrix veniae,

Miserere

filiis gratiae,

Quos conculcat

pestis superbiae,

Et impugnant

hostes tota die.

6. Ave, virgo,

quae nobis miseris

Subveniens

semper misereris,

Miserere

nobis, te poscimus,

Qui iugiter

in te confidimus.

7. Ave, virgo,

quae veram iudicem

Peperisti,

criminum vindicem,

Fac, ut eius

vindicta [anxia]

In nos praeponderet

misericordia.

8. Ave, porta

patens iustitiae,

Sed principi

clausa malitiae,

Libera nos

clemens ab hostibus,

Eripiens

ab insurgentibus.

9. Ave, virgo

sacro spiramine

Fecundata,

non viri semine,

Nos divina

ira non destruat,

Sed rebelles tua

caritas eruat.

10. Ave, mater

salvantis saeculum,

Caritatis

renidens speculum,

Audi preces

te deprecantium

Annuendo

votis orantium.

11. Ave, hostis

impudicitiae,

Regi parens

omnis munditiae,

Fac nos eius

mandatis subici

Salutari

placendo iudici.

12. Ave, splendens

lucerna saeculi,

Christiani

spes vera populi,

Fac, ut simus

ad Deum vigiles

Nec filii

lucis dissimiles.

13. Ave, iustos

semper exaudiens,

Mater pura

et virgo pariens,

Coniunge nos

Deum timentibus,

Eripiens

ab eius hostibus.

14. Ave, Sion

caelestis specula,

Quam per cuncta

laus decet saecula,

Fac, ut pacis

effecti visio

Vota Dei

reddamus filio.

15. Ave, cunctis

praecellens filia,

Orbis terrae

totius domina,

Iubilare,

psallere Domino,

Et laudes dare

fac sine termino.

16. Ave, cunctis

regibus imperans,

Miserorum

reatus miserans,

Vultum tuum

super nos irradia

Et miserando

remove vitia.

17. Ave, vincens

ortum diluculi,

Illuminans

tenebras saeculi,

Effugatur

a tua facie,

Qui adversum

nos stat in acie.

18. Ave, salus

humani generis,

Virgo, proles

non Adae veteris,

Salvos nos fac

a tempestatibus

Ad animam

pervenientibus.

19. Ave, per quam

creator omnium

Venit nobis

in adiutorium,

Et, quod nostra non

merentur opera,

. Auxilium

Dei inpropera.

20. Ave, virgo,

in te sperantium

Vera salus,

verum refugium,

Libera nos

tua iustitia

Et eripe

magna miseria.

21. Ave, cuius

nato iudicium

Dedit Deus

omninm gentiam,

Confer nobis

clemens auxilium

Apud regis

commendans filium.

22. Ave, bonis

quoque virginibus

Et maior es

feminis omnibus,

Praesta nosse

tuis fidelibus,

Quam sit bonus

Israel Dominus.

23. Ave, virgo,

quam rite praetulit

Omni mundo

nec Deus reppulit,

Iram eius

a nobis remove

Et compescens

furorem nos fove.

24. Ave, Christi

mater dignissima,

Advocata

nostra purissima,

Fac, ut nominis

eius confessio

Nobis prosit

et invocatio.

25. Ave, de qua

tonantis filius

Dignatus est

nasci, non alius,

Fac nos scire,

quod sit Emmanuel,

Cuius magnum

nomen in Israel.

26. Ave, virgo,

doctarum virginum

Doctissima,

perfer ad Dominum

Sic clamores

nostros cum vocibus,

Ut intendat nostris

orationibus.

27. Ave, virgo,

plebis Iudaicae

Flos et finis

legis Mosaicae,

Fac nos legem

Dei attendere

Et auribus

verba percipere.

28. Ave, summi

regis oraculum,

Doce Christi

fidelem populum,

Ut se Dei

templum custodiat

Et de gentibus

hereditas fiat.

29. Ave, decus

virginum omnium,

Quam figuravit

rubi incendium,

Exora, nos regat

qui regit Israel,

Qui eduxit

velut ovem Ioseph.

30. Ave, luce

transcendens meritum,

Quam figuravit

velum umbriferum,

Fac carentes

peccati nubilo

Et exultare

Deo in iubilo.

31. Ave, Dei

mater egregia,

Synagogae

carnalis filia,

Subtrahe me

eius iudicio,

Ut gaudere

possim in Domino.

32. Ave, Christi

parens mirabilis,

Cui non est

alia similis,

Adversum nos

compesce filium,

Ut taceat

culpis fidelium.

33. Ave, mater

virtutum Domini,

Qui peccanti

pepercit homini,

Fac nos eius

atria cupere

Et a pravis

votis deficere.

34. Ave, terra,

quam sancti spiritus

Fecundavit

fructus divinitus,

Captivatos

remitte liberos,

Casus a nobis

averte asperos.

35. Ave, gazis

terrenis indigens,

Omnibus sanctis

virtute praeminens,

Aures nostris

porrige precibus,

Exaudiens, quae

fideliter rogant.

36. Ave, cunctis

plena virtutibus

Et in sanctis

fundata montibus,

Duc in tua

nos tabernacula,

Ut vivamus

tecum per saecula

37. Ave, quam dilexit

Deus plus aliis

Filiorum

Iacob tentoriis,

In diebus

simul et noctibus

Subveniat

ad te clamantibus.

38. Ave, mater,

clara [ut aurora]

Nimis pulchra

et [nimis] decora

Fac nos [virgo]

per [cuncta] saecula

Cantare Domini

misericordiam.

39. Ave, virgo,

cuius refugium

Nobis satis

est necessarium,

Christiana,

fac, generatio

Tuta tuo

fiat auxilio.

40. Ave, bonae

tu germen arboris,

In hieme

non iacens frigoris,

Habitare

cum tuo filio

Nos ipsius

fac adiutorio.

41. Ave, virgo,

cuius confessio

Et bonitas

placuit Domino,

Fac nos eius

nomini psallere

Et devotos

amodo vivere.

42. Ave, cuius

regnator filius

Indutus est

fortitudinibus,

Praecinge nos

virtutum cingulo,

Ne vivamus

amplius saeculo.

43. Ave, princeps

et hera virginum,

Quae portasti

virginum dominum,

De hostibus

nostris ulciscere

Et doce nos

libere agere.

44. Ave, sancta,

repleta gaudio

Exsultantes

cum tuo filio

Fac nescire

peccati nubilum,

Ut congaudeant

tecum in aevum.

45. Ave, cui nova

decent cantica,

Nos cantantes

tibi laetifica,

Ut cum omni

caeli collegio

Laudabiliter

cantemus Domino.

46. Ave, parens

regnantis unica,

Nos in ipsius

regnum sanctifica,

Ut tu nostra

sis exsultatio,

Et insulae

redundent gaudio.

47. Ave, mater,

sola digna Deo,

Cui decet

laus cum tripudio,

Fac, ut nostra

superet vitia,

Mirabilia

qui fecit omnia.

48. Ave, cuius

regnavit filius,

Velit, nolit

populus impius,

In Cherubim

sedens nos foveat,

Ne nos turbo

terrae commoveat.

49. Ave, virgo,

cuius filio

Debetur laus

et exsultatio,

Fac nos servire

cum laetitia

Dominanti,

qui regit omnia.

50. Ave, mater

misericordiae,

De qua ortus

est sol iustitiae,

Fac, ut cantemus

Dei iudicia

Praecedente

misericordia.