10. De Armis Domini.

Ad Primam.

1. ''Iam lucis orto sidere
''Dignare nos invisere
Armis tuae potentiae,
Magnae Deus clementiae.

2. ''Christe, redemptor omnium,
''Da spiritale gaudium
De armis tuis hodie,
Splendor paternae gloriae.

3. Clavi sanctarum manuum
Ad opus ducant strenuum,
Resolvant noxam populi,
Iesu, salvator saeculi.

4. Sacris infixus pedibus
Clavus a nostris cordibus
Exstirpet omne vitium,
Rex Christe, factor omnium.

5. Fons lanceati lateris
Emundet sordes sceleris
Et irriget nos intime,
Aeterne rex altissime.

6. Tuis sacris vulneribus
Et armis salutaribus
Confer, Christe, in patria
Beata notis gaudia.

7. Sit Christo iubilatio,
Laus, gratiarum actio;
Armorum veneratio
Sit nobis defensatio.