Prima Quinquagena.

1. Gaude, virgo, mater Christi,

Quae in via non stetisti

Peccatis obnoxia,

Sed in lege Dei docte

Die meditans et nocte

Vixisti innoxia.

2. Gaude, virgo, labe carens,

Miro modo regis parens,

Qui gubernat omnia,

In quem frustra saevientes

Olim fremuerunt gentes

Sectantes inania.

3. Gaude, stella, dux aurorae,

Quam sequentes in splendore

Verae lucis ambulant,

Te praesente se absentent

Nec se nobis repraesentent

Hostes, qui nos tribulant.

4. Gaude, quae divinae laudi

Mancipata nunquam fraudi

Dedisti introitum,

Invocantem me exaudi

Nec permittas mihi claudi

Paradisi aditum.

5. Gaude, virgo, quae per Deum

Dei mater, vides eum

In perenni gloria,

Percipe clamorem meum

Et perduc me ad tropaeum

Et triumphi gaudia.

6. Gaude, dulce sonans lira,

Per te summi regis ira

Delira corripiens

Ita nobis mitigetur,

Ut infirmis confirmetur

Sanitas conveniens.

7. Gaude, Deo semper haerens

Et iam nil hostile verens,

Pro me obsta hostibus,

Per diversa temptamenta

De radice virulenta

Mundum persequentibus.

8. Gaude, virgo, eius mater,

Cuius Dei Deus pater,

Cuius admirabile

Est in orbe nomen toto,

Omni praeponendum voto,

Prae cunctis amabile.

9. Gaude, cuius altitudo,

Mira cuius pulchritudo

Viget sine termino,

Fac, eiecto Cananaeo

Ut in toto corde meo

Confitear Domino.

10. Gaude, cuius indefessae

Caritati nil obesse

Inimicus potuit,

Is in nullo confortetur,

Sed et per te pessumdetur

Ab his, quibus obfuit.

11. Gaude, gemma, quae praeferris

Universis aeque terris

Et terrenis omuibus,

Arcum fraudis intendentes

Et sagittas pestilentis

Aufer a fidelibus.

12. Gaude, consolatrix pia,

Mundi salus, vitae via,

Tuum roga filium,

Ne a nobis se avertat,

Sed dolorem nostrum vertat

In salubre gaudium.

13. Gaude, per quam liberatur

Ab errore et salvatur

Populus insipiens,

Et in lingua et in corde

Me ab omni munda sorde,

Per te fiam sapiens.

14. Gaude, nostri consors limi,

Quae habitas in sublimi

Dei tabernaculo,

Quae in monte requiescis,

Ubi vernas et nitescis

Solari amiculo.

15. Gaude, mater, proles tua

Tibi supplicantes sua

Nos conservet gratia,

Deus est nostrisque bonis

Non eget, nos eius donis

Et eo per omnia.

16. Gaude, virgo, iubar morum,

Te moveat adflictorum

Supples deprecatio,

Ne de rebus otiosis

Et de labiis dolosis

Nostra sit oratio.

17. Gaude, cuius munimentum,

Fortitudo, firmamentum

Deus Dei filius

Exstans omne per momentum,

Nulli de protoparentum

Stirpe dedit amplius.

18. Gaude, sanctitatis forma,

Sanctitate nos informa,

Ne peccati onere

Cum perversis pervertamur,

Sed ad Deum gradiamur

Directo itinere.

19. Gaude, caelebs et intacta,

Sine viro parens facta

Regis, cuius gloriam

Ipsi enarrantes caeli,

Turbae nuntiant fideli

Fidei constantia.

20. Gaude, virgo singularis,

Dei parens expers paris,

Nos in hac miseria

Protege per nomen sanctum

Dei Iacob, tolle planctum,

Tolle quaeque tristia.

21. Gaude, virgo, de virtute

Sancta cuius et salute

Rex laetatur superum,

Cuius facit salutare

Vehementer exsultare

Sunamitis puerum.

22. Gaude, virgo de respectu

Dei felix ia effectu,

Fac, nt nos respiciat

Et emundet a nostrorum

Pravitate delictorum,

Felices efficiat.

23. Gaude, quam Dominus regit

Et quam ala Cherub tegit,

Quae in loco pascuae

Uranicae collocaris

Et caelorum contemplaris

Arcana perspicue.

24. Gaude, parens regis regum,

Cuius clientelas legum

Minae non sollicitant,

Cuius est orbis terrarum

Et plenitudo earum

Et, quae in his habitant.

25. Gaude, domina sceptrorum,

Quae Domino dominorum

Recte potes psallere,

Ad te, domina, levavi

Cor meum nec declinavi

A recto itinere.

26. Gaude, virgo gloriosa,

Christi aula pretiosa,

Templum innocentiae,

Cuius spes in Deo rata

Nunquam fuit infirmata

Fermento malitiae.

27. Gaude, stella matutina,

Cuius ipsa lux divina

Est illuminatio,

Esto mihi supplicanti

Pro reatu trepidanti

Salus et protectio.

28. Gaude, virgo Deo cara,

Locum nobis sursum para,

Ne insipientibus

Assimilemur, opacum

Descendentibus in lacum,

Sed serenis civibus.

29. Gaude, virgo, cuius flori

Virginalis flores chori

Ultro sese offerunt

Et per floridum nitorem

Tibi pariter honorem

Et gloriam adferunt.

30. Gaude, virgo, Deo grata,

Super caelos exaltata,

Tua exaltatio

Nos provehat et iniquos

Christi crucis inimicos

Reprimat confessio.

31. Gaude, manens in conclavi,

Ubi nihil latet pravi,

Te adesse sentiam,

Ne confundar in aeternum,

Sed evadens ad supernum

Decorem perveniam.

32. Gaude, parens gaudiorum

His, iniquitates quorum

Remissae sunt penitus,

Quorum tecta sunt peccata

Affluente per te data

Gratia divinitus.

33. Gaude, virgo, et exsulta,

Gemma Dei manu sculpta,

Quam decet laudatio,

Nostram, precor, audi precem

In cithara et in decem

Chordarum psalterio.

34. Gaude, virgo benedicta,

Sempervictrix, nunquam victa,

Dans in omni tempore

Laudem Deo triumphanti

Et in tuo habitanti

Praepudico pectore.

35. Gaude, triumphatrix alma,

Ex antiquo hoste palma

Comparata strenue,

Impugnantes me impugna

Et languentem gravi pugna

Quieti restitue.

36. Gaude, per quam mens iniusta,

Mens immitis, mens onusta

Vitiorum pondere

In plerisque est adepta

Sanitatem spe recepta

Regnandi in aethere.

37. Gaude, virgo laude digna,

Gaude, mitis et benigna,

Quae in malignantibus

Aemulari noluisti,

Sed immunis exstitisti

A malignis actibus.

38. [Gaude, quae in mundi salo

Ab archipirata malo

Aliena penitus,

Bonum iugiter fecisti

Et ad pacem pervenisti

Caelestis exercitus. ]

39. Gaude, summi regis templum,

Cuius instar et exemplum

Non est ultra mansio,

Protege nos tuo more,

Ne nos caedat in furore

Divina correptio.

40. Gaude, virgo Deo placens,

Aequa sicut lingua tacens,

Me clementer expia,

Ut in lingua non offendam,

Sed cor et os comprehendam

Sub iugi custodia.

41. Gaude, virgo condelectans

Legi Dei, en, exspectans

Exspectavi Dominum,

Ora, mihi nunc intendat

Atque per te me defendat

A charybdi criminum.

42. Gaude, virgo, bonis dives,

Quibus caeli gaudent cives,

Ope ditans pauperem,

Fac me in virtutum scala

Sic protegi, quod in mala

Die malis imperem.

43. Gaude, gemma puellarum,

Sicut cervus ad aquarum

Fontes currens sitiens,

Sic ad Deum, fontem vivum,

Curram, quidquid est nocivum,

Te duce pertransiens.

44. Gaude, quae vicisti fortem,

Te tuente me consortem

Non habeant impii,

Sed de gente digna sperni

Causam meam fac discerni

In die iudicii.

45. Gaude, virgo, et gaudentes

Tibi redde innocentes,

Potes absque dubio,

In auribus nostris sonat,

Quantis malis finem ponat

Tua miseratio.

46. Gaude, porta paradisi,

Domus eboris excisi

Ipso Dei digito,

Quae caelitus accepisti

Verbum bonum mundo isti

Sine mundi merito.

47. Gaude, virgo cor tranquille

Semper habens, cuius ille

Virtus et refugium,

Per quem transferentur montes

In cor mare atque fontes

Super alta montium.

48. Gaude, cuius menti purae

Omnes gentes plaudunt iure,

Mundam munda transiit,

Terribilis, en, rex magnus

De te mitis sicut agnus

Miro modo prodiit.

49. Gaude, quam sic praeelegit

Rex, qoi regna cuncta regit,

Ut regnis praemineas

Et in summa civitate

Throno, dono, dignitate

Similem non habeas.

50. Gaude, virgo, quam laudantes

Omnes orbem habitantes,

Quotquot sunt catholici,

Dives atque pauper una

Caecitatis de lacuna

Per te gaudent eici.

51. Gaude, virgo, via vitae,

Genetrix archimandritae,

Quam decore Dominus

Ad supernam terram vocat

Et in altis eam locat

Sibi sitam comminus.

52. Gaude, matrem cuius Annam

Magnificans Deus magnam

Per misericordiam,

Tuo illustratur ortu,

In tranquillo vitae portu

Ducas nos ad gloriam.