Secunda Quinquagena.

1. Gaude, generosum stemma
Davidicae stirpis gemma,

Dignare ab impia
Potestate nos tutari
Nec permittas gloriari

Malos in malitia.

2. Gaude, mater incorrupta,
Sola parens et innupta,

Innuptae et nubiles
Te docente Deum sciant
Revereri, ne qua fiant

Ee abominabiles.

3. Gaude, virgo, cuius alvum
Servans, sibi, per quem salvum

Genus est mortalium,
Dignatus est de te nasci
Et de tuo lacte pasci,

Iudex tamen omnium.

4. Gaude, quam in summo statu
Summo vigens potentatu

Christus sibi sociat,
Solus mentem solvens ream
Deprecationem meam,

Quaeso, ne despiciat.

5. Gaude, mentem cuius aequam
Non persuasit hostis nequam,

Qui per duras acies
Rectae impugnator viae
Nos impugnans tota die

Tribulavit pluries.

6. Gaude, verax, amans veri,
Miserorum misereri

Pie semper solita,
Anima in te confidens
Et se culpa non elidens

Vere Deo reddita.

7. Gaude, mater imperantis,
Mater iuste iudicantis,
Quam filii hominum
Actu, voce, fide pari
Debent omnes venerari
Ut Deum et Dominum.

8. Gaude, virgo, quam de priscis
Malis massae peccatricis

Et de viris sanguinum
Eripuit rex caelorum,
Cunctis choris supernorum

Te praeponens agminum.

9. Gaude, quae sic evasisti
Et tam probe reppulisti

Draconis astutiam,
Quod moribus usa probis
Viam reparasti nobis

Ad caelestem patriam.

10. Gaude, pro infirmis orans
Firma semper et perorans,
Hostem nostrum reprime
Cum peccati nube taetra
Et exalta nos in petra
Firmitatis optime.

11. Gaude, caelibatus schola,
Me talari ornans stola

Tuus per te filius
Suum levet ad conspectum,
Ubi felix ad perfectum

Non movebor amplius.

12. Gaude, virgo, quam de luce
Lux illustrans Deo luce

Vigilantem reddidit
Atque sursum sitientem,
Tuam quando piam mentem
Lucis templum condidit.

13. Gaude, virgo, spei certae
Fructu fruens mihi per te

Hoc concedi deprecor,
Ut placere Deo possim,
Voti quoque ut compos sim,
Quod affectu prosequor.

14. Gaude, mater, habens pignus,
Quod praecunctis decet hymnus

Ei votum reddere,
Sicut decet et optamus,
Ope sua valeamus

Et ipsius munere.

15. Gaude, mater, matrum decus,
Cuius actus omnis aequus,

Gaude, mater Domini,
A quo omne, quod est almum,
Dicat omnis terra psalmum

Sancto eius nomini.

16. Gaude, mater benedicti,
A quo nunquam derelicti

Sunt boni et humiles,
Qui superbos eradicat,
Ipse nobis benedicat

Confortetque debiles.

17. Gaude, mater babens prolem,
Cuius regnum supra solem

Et sub sole solidum,
Dissipentur hostes eius,
Agmen omni peste peius,
Agmen almis invidum.

18. Gaude, mentis spes oppressae,
Virga de radice Iesse

Generosa prodiens,
Cuius benedicto flore
Prosperatur in fervore

Cor ad Deum rediens.

19. Gaude, mater salvatoris,
Qui nos salvet et a loris

Absolvat peccaminum,
Ne nos trahat in profundi
Limum pondus huius mundi

Et moles gravaminum.

20. [Gaude, nitens margarita,
In supremi stabilita

Regis diademate,
Per te quaero exaudiri
Et ab eo stabiliri

In caelesti climate.

21. Gaude, mater adiutoris,
Qui sanctorum praeest choris,

Cuius adiutorium
Mihi precor nunc adesse,
Sicut semper est necesse,
Contra omne noxium. ]

22. Gaude, mater, esto prope
Mihi tua servet ope

In hostili acie,
In aeternum ne confundar,
Sed emender et abscondar

In aeterna requie.

23. Gaude, mater, cuius proli
Terrae, maris atque poli

Est omne iudicium
Dante Deo patre datum,
Ut in cunctis rebus ratum

Sit eius arbitrium.

24. Gaude, virgo, cuius gressum
Stabilivit indefessum

In via iustitiae
Rectis corde rector bonus,
Dulcis pater et patronus,

Rex aeternae gloriae.

25. Gaude, splendor honestatis,
Ornamentum castitatis,

Virginalis puritas,
Pastor summus te orante
Lupo servet ab instante

Oves tibi creditas.

26. Gaude, sancti sancta parens,
Cuius sanctus omnis parens

Ut actori omnium,
Cuius invocare nomen
Et amare felix omen

Populo fidelium.

27. Gaude, mater tam prudenti
Quam praeclaro, tam potenti

Declarata filio,
Qui non in Iudaea solum,
Sed per omne regnat solum
Solus absque socio.

28. Gaude, virgo, cuius voci
Levitatis atque ioci

Nulla haesit vanitas,
Te orante et intente
Tibi Deo intendente

Nos illustret veritas

29. Gaude, virgo, quae attendens
Legem Dei nec descendens

Infra legis monita,
Verba Dei exaudisti
Et ex voto implevisti

Etiam non indita.

30. Gaude, ethicae magistra,
Parens, nutrix et ministra

Conditoris siderum,
A quo longe sunt mendaces,
Fraudulenti, contumaces,

Intentores scelerum.

31. Gaude, templum sanctum Dei,
Quod nec gentes nec Iudaei,

Quantumcunque fremerent,
Potuerunt expugnare,
Licet eius luminare

Ad tempus exstinguerent.

32. Gaude, virgo, tua prece
Nos ab omni mundet faece

Deferente gratia,
Super Cherubim qui sedet,
Qui componat atque sedet
Omnium consilia.

33. Gaude, adiutori nostro
In virtutum placens ostro,

Gaude, tympanistria,
Psalterii melodiam
Et citharae symphoniam

Tenens in concordia.

34. Gaude, nullum de caducis
Casum timens, mater ducis,

Cuius eminentiae
Subest omnis synagoga,
Tu pro nobis eum roga,

Ne nos caedat anxie.

35. Gaude, mater regis magni,
Protectoris non tyranni,

Regis admirabilis,
Nullus maior vel aequalis,
Inter omnes nullus talis,

Nullus ei similis.

36. Gaude, quam divinis odis
Prophetarum multis modis

Extollunt oracula,
Protege nos et directa
Via perduc ad dilecta

Dei tabernacula.

37. Gaude, verax, nunquam ficta,
Gaude, terra benedicta,

Praedium refugii,
Cuius pretioso fructu
A primaevae matris luctu

Liberantur filii.

38. [Gaude, virgo, iure gaudes,
Iure cantas Dei laudes

Et misericordias,
Qui te matrem Dei fecit,
Omnes tibi qui subiecit

Saeculi potentias. ]

39. Gaude, virgo, quae divinas
Flectis aures et declinas

Ad clamorem pauperum,
Nos in sancta paupertate
Tua servans bonitate,

Redde choris superum.

40. Gaude, quae in Sion portis
Persistendo portis mortis

Impugnasti fortiter,
Civitatis Dei demum
Pervenisti ad supremum

Triumphans sollenniter.

41. Gaude, virgo, quam salutis
Dator Deus in virtutis

Extulit fastigio,
Sive nocte sive die
Ad te clament theoriae,

Me illustra radio.

42. Gaude, mundi imperatrix,
Plebis tuae conservatrix,

Ad quam sapientia
Se non sola visione,
Sed convictu et personae

Contulit praesentia.

43. Gaude, virgo, cuius nusquam
Dux non fuit, qui priusquam

Montes essent, exstitit,
Qui formavit orbem terrac
Et formatum circumferre

Cura nunquam destitit.

44. Gaude, mater, a qua longe
Omnes mali, nos adiunge

Bonorum consortio,
Qui babere Deum caeli
Protectorem de fideli

Merentur obsequio.

45. Gaude, virgo confitendi
Deo semper et psallendi

Singulare specimen
Et exemplar sine pari,
Dignum digne conservari

Per divinum regimen.

46. Gaude, et hunc pro me ora,
Qui in omni praesens hora

Cunctis mundi terminis
Se praecinxit in decore
Ad regnandum cum vigore
Summae fortitudinis.

47. Gaude, cui et in cuius
Cura mundi factor huius

Apparuit humilis,
In non diligentes honum
Vere Deus ultionum

Et iudex terribilis.

48. Gaude, mater, invocantes
Nomen tuum et amantes

Tuis redde precibus
In spiritu exultantes
Atque Deo iubilantes

Mundi cordis plausibus.

49. Gaude, virgo, per te mundus
Reflorescit laetabundus,

Audi preces supplicum,
Da, ne hostis nos supplantet,
Sed et omnis terra cantet
Novum Deo canticum.

50. Gaude, virgo, regno Dei
Clarescente plaudat ei

Omnis terra sedule,
Propulsetur hostis taeter,
Plaudat pontus, laudet aether,

Collaetentur insulae.

51. Gaude, virgo, Deo canta,
Qui te per tot atque tanta

Extulit magnalia,
Qui hominem redimendo
Et a morte resurgendo
Fecit mirabilia.

52. Gaude, gregem Dei pascens,
Nulli minans vel irascens,

Tuos serva servulos
Et ancillas, quas dat tihi
Rex, qui regnum servat sihi

Super omnes populos.

53. Gaude, mitis, expers irae,
Docta Deo deservire

Semper in laetitia,
Ne moreris expedire,
Quos innectunt anguis spirae

Spirantis letalia.

54. Gaude, semper laeta manens,
Iudicium laete canens

Cum misericordia,
Regi, qui te praefert cunctis,
Vivis aeque ut defunctis,
Cordis innocentia.