Tertia Quinquagena.

1. Gaude, Virgo, tui mores

Pro me clament, ut clamores

Mei Deo placeant,

Ut se non avertat a me,

Sed respectu suo squammae

Peccati dispareant.

2. Gaude, verae lampas lucis,

Benedicti mater ducis,

Quam coetus fidelium

Nunquam debet oblivisci,

Sed instanter proficisci

Ad eius imperium.

3. Gaude, laudem regis dicens,

Qui benignos benedicens

Stat in regni culmine,

Nullo egens adiumento,

Undique ut vestimento

Sic amictus lumine.

4. [Gaude, lucis stella clarae,

Illuminans nostrum mare,

Quod ipsa exprimitur

Nominis euphonia,

Nam Syriace Maria

Maris stella dicitur. ]

5. Gaude, videns tot credentes

Proli tuae confidentes

Mente, voce libera,

Tibi quoque servientes,

Dum illius inter gentes

Annuntiant opera.

6. [Gaude, populi adiutrix,

Sedula sanctorum nutrix,

Magni regis regia,

Caelos inultum qui adauxit,

Cum de Orco secum traxit

Suos ad caelestia. ]

7. Gaude, domina caelorum,

Laus et honor angelorum

Et sanctorum omnium,

Tui prolem revereri

Et eidem confiteri

Salus est credentium.

8. [Gaude, cuius puram mentem,

Deo pure adhaerentem,

Nulla contradictio

Affectuum irritavit,

Postquam tibi obumbravit

Divina conceptio. ]

9. Gaude, verbum tecum habens,

Quod perdurat non elabens,

Dulce confitentibus,

Quos probatos in adversis

Vocat ad se de diversis

Mundi regionibus.

10. [Gaude, hominum tutela,

Spes, solamen et medela,

Mundi seda strepitus

Et sic mala nostra pelle,

Ut nullius nos procellae

Inquietet spiritus].

11. Gaude, regum diadema,

Cuius praeparavit schema

Princeps, qui diluculo

Ex paterna voluntate

Et propria potestate

Surrexit de tumulo.

12. Gaude, paradisi clavis,

A dolosis et ignavis

Nos clementer separa,

Qui compotes noxae gravis

Moribus utendo pravis

Descendunt in tartara.

13. Gaude, maris huius extra

Fluctus manens et a dextra

Tui sedens filii,

Pedum cuius sunt scabellum,

Velint, nolint, ad flagellum

Rebelles et impii.

14. Gaude, actu, verbo, mente

Deo placens, te favente

Sit nostra confessio

Tam salubris, ut rectorum,

De salute iam certorum

Iungamur consortio.

15. Gaude, Deum pure colens,

Solum velle Dei volens,

Rectis nos associa,

Quibus Deus benedixit,

Quorum coetus pie vixit

Atque vicit impia.

16. Gaude, summae laudis honor,

Pro modulo meo conor

Laudes tuas canere,

Adiuva me per divinum

Nomen ad habendum sinum,

Quod possim pertingere.

17. Gaude, virgo, quam sacravit,

Qui Hebraeos liberavit

De populo barbaro,

Qui sanctorum regit vitas,

Qui veros Israelitas

Eripit de tartaro.

18. Gaude, virgo, quam dilexit

Tantum Deus et direxit,

Ut affectum mutuo

Tuum velle apud ipsum

Stabile sit atque fixum

Fiatque continuo.

19. Gaude, ad profectum tuta,

Digna semper obsecuta

Deo Dei filio,

Tuo sena intercessu

A noxio nos excessu

Et omni mendacio.

20. Gaude, quam praeesse caelis

Gaudent caeli et fidelis

Populi sedulitas,

Hunc implora, ut nos sanet

A pressuris huius maris

In aeternum meritas.

21. Gaude, decus atque decor

Domus Israel, te precor,

Ut meam exhilares

Mentem fructu spei bonae

Et in sancta regione

Locum mihi praepares.

22. Gaude, virgo sancta vere,

Semper te decet gaudere,

Sanctarum sanctissima,

Quae te Dei matrem noscis,

Qui dat tibi, quidquid poscis,

Mater beatissima.

23. [Gaude, cuius actiones,

Cogitatus et sermones

Sic munivit caritas,

Ut vel in his arguendum

Nil videret arguendum

Mundi curiositas. ]

24. Gaude, virgo, quam cunctorum

Sicut arcem meritorum

Merito constituit

Rector, qui non deest usquam,

Qui meritis bene plus quam

Merita retribuit.

25. Gaude, dulcis super mella

Virgo, Dei verbi cella,

Quam mala temptatio

In aliquo nusquam laesit,

Cuius menti non adhaesit

Vana cogitatio.

26. Gaude, medicamen orbis,

Cordis nostri quaeso morbis

Mederi ne differas

Et in legis actione

Istam mihi legem pone,

Ut me nunquam deseras.

27. Gaude, per quam vitae limen

Reseratur, quod per crimen

Evae clausum fuerat,

Per te beatorum turbae

Summa Deus nos in urbe,

Miseratrix, inserat.

28. Gaude, virgo, quae portasti

Verum Deum intra casti

Uteri muninima,

Nostri memor nos custodi,

Nostra omnium custodi

Praesentans precamina.

29. Gaude, virgo, Deo dulcis,

Quae nos tua prece fulcis,

Virgo prudentissima,

Virgo manens expers noxae,

Nationis orthodoxae

Portio purissima.

30. Gaude, mundi medicina,

Verax morum disciplina,

Bonitatis speculum,

Da, ne noxa me denigrem,

Sed immunis hinc emigrem

Ad perenne saeculum.

31. Gaude, sanctum Dei plasma,

Cuius statum non phantasma,

Non error malitiae

Movit unquam de humano

Plasmate in statu sano

Spem complecti veniae.

32. Gaude, humilium parma,

Por quam devitantur arma

Superborum principis,

Per te Dei salutare

Nos dignetur sociare

His, quos sursum recipis.

33. Gaude, quae in celsa sede

Caeli sedes, intercede

Pro fideli populo,

Ne zabulus nos fatiget

Neve corda nostra liget

Pravitatis vinculo.

34. Gaude, luminosum sidus,

Impiorum grex infidus

Populo fidelium

Te micante resipiscat

Et sectator esse discat

Legem diligentium.

35. Gaude, virginum lucerna,

Mundi salus sempiterna,

Lumen indeficiens,

Lingua mea mihi sonet

Te canendo, quod non donet

Paraclitus veniens.

36. Gaude, in qua nil enorme,

Cuius decus multiforme,

Cuius felix anima

Mundum vicit, nil iniquae

Partis habens, sed ubique

Stans in parte dextera.

37. Gaude, virgo, quod de massa

Zyma vetustatis passa

Defaecatam edidit

Iustus iudex, qui effringens

Superborum chaos ingens

Suis lucem reddidit.

38. Gaude, semper vernans rosa

Liliique generosa

Atque mira species,

Cuius florem non aestatis,

Non hibernae tempestatis

Laedit intemperies.

39. Gaude, de qua natus fuit

Iustus, quo iudice ruit

Zabulus ad infima,

Victa languet vis illius,

Qui fuerat fortis prius

In sede clarissima.

40. Gaude, virgo, quam sic amant,

Ad quam toto corde clamant

Tot per orbem supplices,

Nostri piam curam habe,

Sic nos munda, ut a labe

Peccati purifices.

41. Gaude, consolatrix bona,

Virginum laus et corona

Exhilarans flebiles,

Vitis saera, dulcis uva,

Nos dulcore tuo iuva

Et fac vere humiles.

42. Gaude, vim draconis terens

Princeps, principatum gerens

Super omnes principes,

Vivo, quo frueris, pane

Unitatis christianae

Recrea participes.

43. [Gaude, virgo, quae aspersum

Mundum vides universum

Christi beneficio,

Quo mens freta non delinquat,

Fac, ut ei adpropinquat

Nostra deprecatio. ]

44. Gaude, mater tribulatis

Dans solamen pietatis

Et misericordiae,

Per te dolos iniquorum

Devitemus et errorum

Careamus carie.

45. Gaude, mater, atque sursum

Vitae nostrae leva cursum

Ad montes aethereos,

Assit nobis inde salus,

Unde ruit princeps malus

In fines tartareos.

46. Gaude, quae in lucis domo

Sic eluces, ut et homo

Et angelus pariter

Gaudeat te praeminere

ln atriis lucis vere

Laetantem perenniter.

47. Gaude, quam super se gaudent

Principari, qui non audent

Res optare meritas,

Qui se super se levantes

Cernunt ad te suspirantes,

Quae in caelis habitas.

48. Gaude, mater reverenda,

Tuae proli nos commenda,

Ut in nobis maneat,

Ne nos queat irretire,

Qui Iordanem circuire

Solet, ut absorbeat.

49. Gaude, custos sanctae gentis,

Civitas omnipotentis,

Spes opem quaerentium,

A qua longe omnis Iabes,

Quae antemurale habes

Ipsum montem montium.

50. Gaude, splendor firmamenti,

Cordis curas turbulenti

Convertens in gaudium

Exsultatione plena

Et perenni, nos serena

Perducens ad bravium.

51. Gaude, cella pigmentorum,

Paracliti unguentorum

Redundans fragrantiam,

Domus supra petram fixa,

Quam aedificavit ipsa

Sibi sapientia.

52. Gaude, celebranda piis,

Te ducente qui in viis

Ambulant caelestibus

Et exercent opus clarum,

Reficiendi suarum

Manuum laboribus.

53. Gaude, virgo, quae in arce

Caeli regnas, hostes arce,

Ne pios impediant,

Quos impugnant, absint modo,

Quos artare noxae nodo

Cupiunt, ut capiant.

54. Gaude, blanda verecundis,

Ad te clamat de profundis

Conventus fidelium,

Audi cum favore vocem

Clamitantis et ferocem

Sterne adversarium.

55. Gaude, per haec mundi freta

Transiens non obsoleta

Vitiorum maculis

Et in statu tam beato

Corde carens exaltato

Et elatis oculis.

56. Gaude, mitis et quieta,

Mire semper mansueta

Vivendo pacifice,

Tui memorum memento

Et caelesti supplemento

Pia vota perfice.

57. Gaude, cuius est fomentum

Sicut Aaron unguentum

Piis inter impios,

A draconis vi proterva

Simul habitantes serva,

Serva solitarios.

58. Gaude, quae sic expiasti

Mundum noxa protoplasti,

Ut in Dei filio,

Per te facto nostro fratre,

Detur natis Eva matre

Regni benedictio.

59. Gaude, virgo, quam decorus

Beatorum colit chorus.

Atque semper recolet,

Dominica stas in domo,

Quae caelesti cinnamomo

Balsamoque redolet.

60. Gaude, regnans in aeternum,

Rectis corde per internum

Favorem mitissima,

Quae domino dominorum,

Deo utique deorum,

Stas in caelis proxima.

61. Gaude, decus virginale,

De medio nostri male

Hortantes extermina,

Ne insulae nationis

Instar intra Babilonis

Nos demergant flumina.

62. Gaude, mater, interventu

Tuo fiat et obtentu.

Ut cum sanctis omnibus

In conspectu angelorum

Psallam Domino caelorum

Gaudens in caelestibus.

63. Gaude, virgo, quam probavit

Et probatam adornavit

Honore angelico,

Qui de longe cuncta cernens

Gor, ut decet, mundi spernens

Dono ditat caelico.

64. [Gaude, sella salutaris,

Caeli splendor, lux solaris,

Animos illuminans,

De latebris temptatoris,

Vanitatis et erroris

Tenebras eliminans. ]

65. Gaude, cuius paci merae

Nequit improba nocere

Malorum malitia,

Qui per cordis pravitatem

Cogitant iniquitatem

Concitantque proelia.

66. Gaude, prolis reverendae

Mater, miseris intende,

Nostri vox precaminis

Tuum expetit assensum,

Dirige hanc ut incensum

ln conspectu numinis.

67. Gaude, virgo, quod prophetae

Praedixerunt olim de te,

Iam factum considerans,

Nos moribus orna sanctis,

De laqueo tribulantis

Te precantes liberans.

68. Gaude, summo fruens fructu,

Tuo prosperetur ductu

Nostra obsecratio,

Ut rex nos iudicaturus

Iudicandis non sit durus

Nimis in iudicio.

69. Gaude, victrix inimici,

Cunctis digua benedici

Benedictionibus,

Quae angelo credidisti

Et gaudium peperisti

Creaturis omnibus.

70. Gaude, dulcis lyra meli,

Decor Saron et Carmeli,

Diadema regium,

Te laudet in decachordo,

Psalterio omnis ordo

Deo servientium.

71. Gaude, virgo, flos regalis,

Gloria sacerdotalis,

Tribus gemma geminae,

In saeculi huius freto

Corde vigens semper freto

Numinis solamine.

72. [Gaude, decus Dei florum,

Caeli scala, fons hortorum,

Nubes absque nubilo,

Regni gloria caelestis,

Virtus, victrix dirae pestis,

Cuius sedes aquilo. ]

73. Gaude, atque protonanti

Assis mihi te laudanti,

Regina laudabilis,

Te laudabo, dum subsistam,

Quoad supportabo istam

Carnis molem fragilis.

74. Gaude, castitas fecunda,

Cuius dulcis et iucunda

Nobis est laudatio,

Cuius laus est, per quam caelis

Novissimi Israelis

Reddetur dispersio.

75. Gaude, cuius excellenter

Laus est ille, qui potenter

Iudicans de impiis

Per omnem dat nationem

Suam benedictionem

Sanctae Sion filiis.

76. Gaude, claritas amoena,

Laus caelestis, laus terrena,

Laus regentis omnia,

Supernorum laus virtutum,

Iter nobis para tutum

Ad superna gaudia.

77. Gaude, virgo, laus vivorum,

Pax et quies defunctorum,

Sanctae laus ecclesiae,

Te laudent Palestini,

Laudent Graeci et Latini,

Laudent Sion filiae.

78. Gaude, virgo digna laude,

Laude digna virgo, gaude,

Tibi laus divinitus,

Laus in terra, laus in caelo,

Te devotionis zelo

Laudat omnis spiritus.