Prima Quinquagena.

1. Ave, caeli lux Maria,
Lignum vitae es, o pia,

Fructum dans credentium,
Hic nos ora prosperari
Et in fine renovari

Dote resurgentium.

2. Ave, mater gignens Christum,
Patre natum ante istum

Mundum sicut hodie,
Disciplina nos emendet
Eius tuaeque commendet

Felici custodiae.

3. Ave, virgo, cuius nato
Somno mortis soporato

Quievit adflictio,
Tua nobis pro virtute
Resurgentis cum salute
Detur benedictio.

4. Ave, in qua habitavit

Christus et quam consignavit

Vultus sui lumine,
Noc in pace obdormire
Sicque ad quietem ire,

Praesta sacro numine.

5. Ave, tamquam sol electa,
Tua via est directa

In conspectu Domini,
In aeternum exsultare
Nos cum Christo fac et dare

Laudem suo nomini.

6. Ave, quae non es correpta
In furore sed suscepta

Cum supernis coetibus,
Nos defende, ne in ira
Arguamur Dei dira
Deputandi fletibus.

7. Ave, propter quam regressus
Est in altum, qui perpessus

Mortem est pro gentibus,
Post ipsum per te trahamur,
Ne quando nos rapiamur

A leonum dentibus.

8. Ave, virgo, quam praefecit
Caeli Deus et subiecit

Cuncta eius precibus,
Super caelos elevato
Nos commenda tuo nato
In supernis sedibus.

9. Ave, per quam defecerunt
Arma atque perierunt

Hostis domicilia,
Da egeno, derelicto
Tibi, locum mundo victo

Dei cum familia.

10. Ave, sancta, quae migrasti
Ad excelsum, quem amasti,

Christum montem montium.
Tu obtutus in nos flecte,
Per te sorti ut electae

Iungamur insontium.

11. Ave, quae noa defecisti
Sanctitate, sed fuisti

Vanitatem respuens,
Egenorum propter preces
Exsurge cunctasque faeces
Peccatorum abluens.

12. Ave, quae in salutari
Sic exsultas, ut effari

Omnis lingua nequeat,
Corda nostra tu illustra,
Ut conetur in nos frustra

Hostis nec praevaleat.

13. Ave, Sion, ex qua datur
Salutare, quo donatur

Salus indeficiens,
Det virtutum nobis munus,
Te poscente bonus unus

De caelo prospiciens.

14. Ave, alma parens Christi,
Quae ad caelos introisti
Absque ulla macula,
Mundans nos ab omni naevo
Duc post te de mundi saevo
Lucis ad cenacula.

15. Ave, casta conservata,
Sacra proles de te nata

Tua est hereditas,
Per te nobis, o Maria,
Nota fiat vitae via,

Quam non tangit foeditas.

16. Ave, cuius cor probavit
Deus atque visitavit

Redempturus saecula,
Vias duras custodire
Ut possimus, has lenire

Stude prece sedula.

17. Ave, quam de nostri limi
Deus mittens de sublimi

Assumpsit putredine,
Tua regat disciplina
Nos, ut tecum in divina

Vivamus dulcedine.

18. Ave, sol Maria splendens,
In qua Christus ad nos tendens

Fixit tabernaculum,
Ab occultis nos emunda,
Ne ruamus in profunda

Leti per piaculum.

19. Ave, fontem qua elisit,
Cum de sancto tibi misit

Pius rex auxilium,
Nos in tuo salutari
Posce tecum collaetari,

O pudoris lilium.

20. Ave, virgo Deo grata,
Quae in nullo es fraudata

Cordis desiderio,
Vultus Christi consolare
Servos tuos in praeclarae
Lucis refrigerio.

21. Ave, manna gignens vermem,
Quem plebs damnat ut inermem

Plenis improperiis,
Ora, ut per mortem Dei
Corda nostra vivant ei
Sanctis desideriis.

22. Ave, virgo, quae labentes
Suscitando tristes mentes

Consolando erigis,
Sacri per altaris mensam
Tolle metum et offensam

A nostris miseriis.

23. Ave, dulcis et fecunda,
Actu corda nostra munda,

Mater regis gloriae,
Qui in caelo ut sol micat,
Hic per te nos benedicat.

Praebens spera victoriae.

24. Ave, sancta, quod levasti
Ad factorem, quem portasti,

Tuam sanctam animam,
Ipsum semper deprecare
Ut det nos hereditare

Terram lucis optimam.

25. Ave, salas indefessa,
Aulam Dei quae ingressa

Es per innocentiam,
Nos ablutos a peccatis
Duc ad aram deitatis

Tuam per clementiam.

26. Ave, lux illuminata
Luce vera de tc nata

Carnis in umbraculo,
Quae in die nos amaro
Pie tegat in te, caro
Suo tabernaculo.

27. Ave, cuius caro nati
Crucifixi et humati

Exsurgens refloruit,
Ipse salvet suum gregem,
Per te sternens mortis regem,

Quem per crucem domuit.

28. Ave, virgo, cuius nato
In Iordane baptizato

Patris vox intonuit,
Qui per te nunc det salutem
Plebi suae et virtutem,

Quam vivendo docuit.

29. Ave, stella matutina,

Per quam mundo vespertina

Est pulsa maestitia,
Carnis nostrae sacco scisso
Nos eductos de abysso

Circumda laetitia.

30. Ave, quam Iesus evexit
De pressuris, nam respexit

Mentem tuam humilem,
Terrenorum a tumultu
Nos absconde tuo vultu

Hostem fugans vigilem.

31. Ave, felix Dei parens,
Quae peccati labe carens
Tanto gaudes pignore,
Intellectum sine mora
Confer et pro nobis ora
Opportuno tempore.

32. Ave, summi verbi mater,
Quo firmavit caelos pater,

Quos ornavit spiritus,
Per te supplicantes tibi
Ponat nos heredes sibi

Christus a te genitus.

33. Ave, virgo, quam in Deo
Omnis mansuetus cum reo

Collaudant hilariter,
Praesta, ut magnificemus
Tecum hunc et exaltemus

Nomen eius pariter.

34. Ave, credens Gabrieli,
In te carnis est rex caeli

Indutus cilicio,
Per quod saevo et astuto
Victo precis tuae scuto

Tegat nos a vitio.

35. Ave, vitae fons, Maria,
Apud patrem es, o pia,

Intra caeli atria,
Ubertate domus Dei
Hic nos reple, ut sic ei

Iungamur in patria.

36. Ave, virgo delicata,

Mater Iesu, per quem data

Omnis tibi gratia,
In aeternum conservemur
Per te, ut non supplantemur
Hostili fallacia.

37. Ave, quae per Gabrielis
Verba es transfixa telis
Supernae dulcedinis,
Per quam nostrae sanitatem
Carni da et castitatem
Pellens vim putredinis.

38. Ave, cuius iam beata
Apud patrem est locata

Cum Christo substantia,
Hic adhuc nos peregrinos
Deo tandem fac vicinos
Mortis in instantia.

39. Ave, quae de paupertatis
Lacu ducta deitatis

Gaudes in triclinio,
Te quaerentes fac laetari
In te semper nec turbari

Hostis exterminio.

40. Ave, resurgentis mater,
Quam in sua Deus pater

Confirmavit facie,
Tu per ipsum nos conserva,
Ne sanctorum a caterva
Trahat rex fallaciae.

41. Ave, quae ad fontem vitae
Sitisti, quem hauris rite
Nunc in regni medio,
Ipso dona nos potari,
Ut possimus memorari
Tui sine taedio.

42. Ave, mitis tamquam byssus,
Ad quam est de patre missus

Christus, lux et veritas,
Age, ut post mundi cursum
Ad se ipsum ducat sursum
Eius nos sinceritas.

43. Ave, cuius ventilantur
Hostes omnes et fugantur

Invocato nomine,
Salva nos ex adfligente,
Ut amemus tota mente

Occisum pro homine.

44. Ave, quam astringit nato
In vestitu deaurato

Virtutum varietas,
Ut ducamur post te digni,
Castitate nos insigni

Tua ornet pietas.

45. Ave, quam praeordinavit
Sibi et sanctificavit

Christus tabernaculum,
Ut vacemus mente Deo,
Tuae cedat ferus leo
Precis per obstaculum.

46. Ave, Deo quae plausisti,
Ascendentem dum vidisti

Christum hinc in iubilo,
Ut cum sanctis congregemur
Ad ipsum, per te mundemur

A culparum nubilo.

47. Ave, spes desiderata,
Tu ut Sion es fundata

Magni regis civitas,
Te cor nostrum amplectatur,
Ut in eo restringatur

Peccandi proclivitas.

48. Ave, cuius adunavit
Sese carni, qui salvavit

Te de manu inferi,
Nos, qui brutis comparamur
Propter culpam, deprecamur
Per te sanctis inseri.

49. Ave, quae devotionis
Vota et laudationis
Reddis sacrificia,
Invocamus te. Maria,
Sis nobis ad Iesum via
Tua per servitia.

50. Ave, virgo, per quam multa
Revelata sunt occulta

Dei sapientiae,
Cor in nobis crea rectum,
Ut ducamur ad conspectum

Tuae excellentiae.