Secunda Quinquagena.

1. Ave, arbor portans fructum,

Quo ius vetus est destructum

Mortis cum imperio,

Per te nomen Iesu bonum

Sit saporis vitae donum

Nostro desiderio.

2. Ave, de qua salutaris,

Quo salvamur, singularis

Orta est nativitas,

Te precante redimatur

Christi plebs, et convertatur

Virtutum captivitas.

3. Ave, quam adivit fortis,

Quam caelestis cum cohortis

Suscepit tripudio,

Tu ab omni nos pressura

Salvans caeli duc ad iura

Sacrae precis studio.

4. Ave, quae assumptis pennis

Columbinis ad perennis

Vitae transis requiem,

Supra Deum nostram curam

Nos iactantes duc ad puram

Vultus sui speciem.

5. Ave, virgo cuius natus

Passus est et conculcatus

Pro salute gentium,

Ora, ut nos gaudeamus

Atque ipsi placeamus

In luce viventium.

6. Ave, virgo, quae confisa

Es in Christo et gavisa

Obumbrante flamine,

Ne leonis os nos trucis

Rodat, muni sanctae crucis

Praeclaro tutamine.

7. Ave, per quam molae fractae

Sunt leonum et subactae

Christo de te edito,

Fac vindictam nos videre

His deiectis et gaudere

Regno nobis dedito.

8. Ave, cuius in adventu

Christus surgens cum conventu

Occurrit angelico,

Salva nos ah inimicis

Atque vitae da felicis

Regno frui caelico.

9. Ave, in qua incarnata

Maiestas et calceata

Est mortali corio,

Da, ut arcum fugiamus

Hostis artesque vincamus

Tuo adiutorio.

10. Ave, quae es exaltata

Nunc in Christo, anxiata

Cuius morte fueras,

Esto nobis turris fortis

Contra vultum regis mortis,

Quem potenter superas.

11. Ave, Deo quae subiecta

Nunc ad Christum es provecta,

In quo tua gloria,

Fac in eo nos sperare,

Ut dignetur nos purgare

A malorum scoria.

12. Ave, cuius caro multum

Sitivit ad Dei vultum

Mentis cum fiducia,

O Maria, tuis alis

Nos obumbra, ne feralis

Supplantet astutia.

13. Ave, felix iam salvata

A timore ac stipata

Supernis militibus,

A conventu malignorum

Nos defende, ne reorum

Iungamur gemitibus.

14. Ave, virgo, supra caelos

Quam assumptam dulce melos

Collaudat angelicum,

Ut in bonis satiemur

Domus Dei ac laetemur,

Da, o sidus caelicum.

15. Ave, quae de huius vitae

Cursu ducta es ad mite

Caeli refrigerium,

Te iuvante adimpletis

Votis nostris ad quietis

Transfer nos imperium.

16. Ave, terra, de qua datur

Verus fructus, quo salvatur

Mundus ab interitu,

Ut nos natus atque pater

Benedicat, ora, mater,

Cum amborum spiritu.

17. Ave, quam signavit dumus

Igne candens, sicut fumus

Per te hostis deficit,

In conspectu epulari

Fac nos Christi et laetari,

Qui caelestes reiicit.

18. Ave, de qua ortus fuit,

Qui totius mundi luit,

Qui non fecit crimina,

Per te iustis conscribamur,

O Maria, et ducamur

Ad caelorum limina.

19. Ave, ad quam adiuvandam

Et prae cunctis sublimandam

Festinavit Dominus,

Nos egenos et mendicos

Post hanc vitam ut amicos

Christo iunge comminus.

20. Ave, virgo, quae es nata

Sancta atque confirmata

In Deo ex utero,

Esto nobis firmamentum,

Ut a sponso cum prudentum

Colligamur numero.

21. Ave, veri Salomonis

Mater, tamquam Gedeonis

Vellus madens gratia,

In diebus nati tui

Praesta nobis semper frui

Pacis abundantia.

22. Ave, quae es cum honore

Hinc suscepta et amore

Caeli ad palatium,

Fac nos Deo adhaerere,

Ut possimus obtinere

Paenitendi spatium.

23. Ave, virgo, quae in ortu

Ut aurora, sed in partu

Instar solis radias,

Frange caput sic draconis,

Via ne seductionis

Tradamur ad bestias.

24. Ave, fortis ut columna,

Quae de mundi es aerumna

Erecta ad gloriam,

Frange cornu peccatorum

Et in bello vitiorum

Tuis fer victoriam.

25. Ave, in qua locum fecit

Sibi Christus, qui deiecit

Per te arma fortium,

Tu es vera pax, Maria,

Esto nobis tuta via

Caeli ad consortium.

26. Ave, cuius cor in Christo

Consolari, sed in isto

Mundo nunquam voluit,

Nos de mari vitae huius

Per te ducat Datus tuus,

Qui pro nobis doluit.

27. Ave, per quam panis caeli

Vero datur Israeli

Mentis ad edulium,

Qui quaesitum dextra sua

Nos ad montem ope tua

Ducat post exsilium.

28. Ave, templum sanctum Christi,

Quae polluta non fuisti

Mundi huius vitiis,

Nati tui nos emunda

Per cruorem, qui ut unda

Fusus est ab impiis.

29. Ave, per quam apparebat,

Super thronos qui sedebat

In paterno gremio,

Dextra sua quos plantavit

Et per crucem reparavit,

Vitae donet praemio.

30. Ave, Deo quae iucundum

Psalmum cantans totum mun-

dum

Tua reples gratia,

Carnis Christi nos frumento

Atque mellis alimento,

Quod dat petra, satia.

31. Ave, de qua rex caelorum

Natus stetit Iudaeorum

Docens in concilio,

Ambulantes per obscura

Nos custodi iugi cura

Isto in exsilio.

32. Ave, decus castitatis,

Tu solamen deitatis,

Tibi nullus similis,

Hostes nostros preme fortes,

Pacis simus ut consortes

Per te, o amabilis.

33. Ave, quae de lacrimarum

Valle isti ad praeclarum

Caeli habitaculum,

Nos per tuam servitutem

Duc caelestem in virtutem

Carnis post obstaculum.

34. Ave, terra benedicta,

Qua salvatur plebs adflicta

Longaque captivitas,

Sicut per to salus datur,

Sic et nobis ostendatur

Divina benignitas.

35. Ave, virgo, cuius vita

Verbo Dei custodita

Fuit ab initio,

Deduc nos in tua via,

Ne tradamur, o Maria,

Inferni supplicio.

36. Ave, Sion porta clara,

Cuius ortu mors amara

Venit ad interitum,

Christus in te homo natus

Nostros solvat ut reatus,

Tuum poscat meritum.

37. Ave, fida, quae mansisti

Cum dilecto, dum vidisti

Notos omnes cedere,

Qui expansus est in cruce,

Amplectatur te nos duce

Cum amoris foedere.

38. Ave, fulgens Christi throne,

Qui in tua, Deus bone,

Lucet ut sol facie,

Advocata et fidelis

Testis nobis sis in caelis,

Pia mater gratiae.

39. Ave, quae nunc et in aevum

Nobis contra mundum saevum

Facta es refugium,

Servos tuos rege, mater,

Ne post mortem hostis ater

Trahat ad supplicium.

40. Ave, virgo, beatorum

Custodia angelorum,

Fideli custodia

In te, clemens, da sperantes,

Ut leonem conculcantes

Eius vincant odia.

41. Ave, quae factura Dei

Es excellens, in qua spei

Nostrae delectatio,

In virtute sicut palma

Per te nostra, mater alma,

Reflorescat natio.

42. Ave, sedes praeparata,

In qua sedet carne nata

Dei sapientia,

O Maria, sancta Deo

Domus facta, per te reo

Detur indulgentia.

43. Ave, cuius nati sanguis

Condemnatus arte anguis

Vicit et saevitiam,

Quod per legem eruditis

Per te virgo nobis mitis

Veram det laetitiam.

44. Ave, pia mater Christi,

Quae ipsius praevenisti

Confitendo faciem,

Te in psalmis collaudantes

Post laborem exsultantes

Fac intrare requiem.

45. Ave, quam sacravit signo

Castitatis, qui a ligno

Regnavit pro gentibus,

Qui dum venit iudicare

Orbem, velit adgregare

Per te nos gaudentibus.

46. Ave, clara caeli porta,

Per quam iustis lux cst orta

Rectisque laetitia,

In te iusti gratulentur,

Peccatores emundentur

Omni a malitia.

47. Ave, salutaris mater,

Quod revelat Deus pater

Ante vultum gentium,

Tuae semper recordare

Pietatis et solare

Corda te canentium.

48. Ave, per quam vicit atrum

Deus iuxta [verbum] patrum

Carnis in velamine,

Invocantes te audito,

O Maria, et munito

Sacrosancto flamine.

49. Ave, quae exsultans Christi

In conspectu introisti

Cordis per munditiam,

Nos scientes ipsum Deum

Verum esse duc ad eum

Carnis post militiam.

50. Ave, domus puri cordis,

In qua doli sive sordis

Nulla fuit portio,

Fac nos oboedire legi,

Ut sanctorum sacro gregi

Iungamur consortio.