Tertia Quinquagena.

1. Ave, felix, per quam vita
Mundo redit, dura audita

Tua est. oratio,
Audi fletus captivorum,
Quia tu es miserorum

Facta consolatio.

2. Ave, quae per bis senarum
Coronata es stellarum

Opus venerabile,
Vitam nostram conservari,
Iuventutem renovari

Fac ad instar aquilae.

3. Ave, terra gignens panem,
Qui infirmam et inanem

Mentem cibat hominis,
Ipso dona confirmari
Nos atque laetificari

Vino sui sanguinis.

4. Ave, quae iam invenisti
Vultum Christi, quem quaesisti

In terra viventium,
Per ipsius nos laudari
Praesta nomen et laetari
Cor ipsum quaerentium.

5. Ave, per quam salutare
Dei venit visitare,

Quos premebant vitia,
Quod concedat ope tuae
Precis nos laetare suae

Gentis in laetitia.

6. Ave, bonis satiata,
Quae a Deo sunt collata

Te implente spiritu,
Verbo in te a superno
Patre misso ab aeterno

Salva nos interitu.

7. Ave, virgo quae parato
Corde Deo et mundato

Cantas nunc in gloria,
Sicut praesens laudem polo
Confers, sic et pacem solo

Tua det memoria.

8. Ave, super cuius natum
Os dolosi reseratum

Auxit improperia,
Tu a dextris egenorum
Asta mundans cor eorum

Christi per mysteria.

9. Ave, virgo, quae emissa
Es de Sion ut promissa

Dictis in Isaicis,
Le torrente passionis
Christus bibens per te thronis

Iungat nos angelicis.

10. Ave, quae redemptionem
Verbi per susceptionem

Protulisti saeculo,
Quod dedit hereditatem,
Per te nobis suavitatem

Det in vitae speculo.

11. Ave, de qua verum lumen
Rectis per divinum numen

Ortum est in tenebris,
Ne ab ira formidemus,
Da, iu Deo ut speremus,

O Maria celebris.

12. Ave, virgo, mater munda,
Quae de magno es iucunda

Filiorum numero,
Per te nos in imis natos
Pius pastor ad beatos

Sacro portet umero.

13. Ave. parens regis caeli,
Qui ducatum Israeli

Ex Aegypto praebuit,
Is pusillum cum maiore
Tuo salvet pro amore,

Quos per crucem eruit.

14. Ave, ad quam inclinavit
Deus aurem, qui firmavit

Tua desideria,
In vivorum regione
Nos placentes Christo pone
Salvans a miseria.

15. Ave, prima reddens votum
Deo mundo, quo per totum

Dicat castimoniam,
In qua nos concede stare
Et per ipsam immolare
Christo laudis hostiam.

16. Ave, per quam omnes gentes
Deum laudant congaudentes

Tuae celsitudini,
Qua nos Christus confirmari
Atque tantae sociari

Det beatitudini.

17. Ave, quae ad aequitatis
Portas intrans trinitatis

Confiteris nomini.
Reguum lucis ad praeclarae
Per te sine nos intrare,

Quae es porta Domini.

18. Ave, nostra spes, Maria,
Te intactam lex et via

Deducebat Domini,
Per te lapso disciplina
Et erecto lux divina

Tribuatur homini.

19. Ave, quae in omni vita
In pressuris es audita

Clamans ad altissimum,
Sublevato incolatum
Nostrum nimis prolongatum,

O sidus clarissimum.

20. Ave, mons excellens Dei,
in quem levant omnes rei

Sui cordis oculos,
Ne malignus nos enervet,
Nos in bono praeconservet,

Qui custodit populos.

21. Ave, virgo vere laeta,
Omni bono quae repleta

Es in domo Domini,
Christus in virtute sua
Donet pacem prece tua

Exsulanti homini.

22. Ave, vultu quae erecta
Ad excelsum es evecta
A mundanis sensibus,
Miserere nobis, pia,
Miserere, o Maria,
Cunctis te colentibus.

23. Ave, in quam mundus sperat,
In qua Deus semper erat

Premens omnem strepitum,
A venante ne fallamur
Aut torrente demergamur,

Nostrum rege spiritum.

24. Ave, firma et immota
Ut mons Sion, mente tota

Verbis Dei credula,
Ne a nobis regni sortem
Tollat, virgam hostis fortem
Flecte prece sedula.

25. Ave, vere iucundata,

Quae cum Christo es locata,

Laudas hunc assidue,
Ut quod flentes seminamus,
Exsultantes hoc metamus,
O Maria, tribue.

26. Ave, domus fabricata
Et urbs fortis conservata

Dei sapientia,
Ut heredes Christi simus,
Dum per somnum hinc abimus,

Tua det clementia.

27. Ave, mitis et beata,
Tu es vitis fecundata

Botrum Cypri generans,
Qui in crucis pressus prelo
Benedicat nos e caelo

Regnum per te reserans.

28. Ave, mater flagellati
Pro nobis et expugnati

A primaevo tempore,
Qui pravorum collis stratis
Te precante caritatis

Nos dilatet foenore.

29. Ave, clamans de profundis
Ad Iesum, qui ab immundis

Te clementer eruit,
Qui nos solvens a peccatis
Regnum per te donet gratis,

Quod in cruce meruit.

30. Ave, visu columbina,
Corde simplex et divina

Incessuque humilis,
Ablactanti o patrona,
Caritatem nobis dona

In spem vitae stabilis.

31. Ave, splendens ut lucerna,
In qua Christus, lux superna,

David explet foedera,
Aulam eius ad intrandum
Et ad pedes adorandum

Nostra purga scelera.

32. Ave, cingens velamento
Carnis Christum, qui unguento

Te perfudit gratiae,
Ut laudemus te iucunde,
In fraterna, da, ut munde

Conversemur acie.

33. Ave, per quam servi Dei
Omnes benedicunt ei

Choris cum angelicis,
Extollentes ad te manus
Serva, hostis ne profanus

Regnis privet caelicis.

34. Ave, virgo laudans suave
Iesu nomen, quod ignavae

Mentis fugat tenebras.
Hoe ut tecum collaudemus,
Da, ut hostes superemus
Carnisque illecebras.

35. Ave, clara lux diei,
Gaudens confiteris ei,

Qui facit mirabilia,
In aeternum prece tua
Nos conservet virtus sua

Et misericordia.

36. Ave, quae in peregrina
Terra sacra et divina

Cecinisti carmina,
Ut in primis supernorum
Memoremur, a malorum

Nos absolve sarcina.

37. Ave, psallens cum affectu
Angelorum in conspectu

Deo nostro gloriam,
Qui nos, opus manus suae,
Conservare velit tuae
Laudis per memoriam.

38. Ave, virgo, cuius natus
Victor surgens est locatus

In paterna dextera,
Ora, ne pro imperfecto
Deleamur ab electo
Libro ut gens extera.

39. Ave, cuius praedilectus
Venenatis est affectus

Linguis per opprobria,
Nos cum eius habitare
Vultu praesta et laudare

Ipsum mente sobria.

40. Ave, per quam dirigenda
Sursum et exaudienda

Nostra est oratio,
Ori nostro pone fraena,
Ut non linguae cum habena

Trahat nos damnatio.

41. Ave, felix in vivorum

Terra gaudens de donorum

Portione optima,
Age, nostra ut educta
De mortalis vitae lucta
Deum laudet anima.

42. Ave, sancta, quam instruxit
Et in terram rectam duxit

Bonus Dei spiritus,
Cor meum torpore arens
Et fluentis vitae carens

Tu infunde caelitus.

43. Ave, ad quam properavit,
Quando caelos inclinavit,
Mundi rex adveniens,
Manum tuam ad nos tende
Et ab ira nos defende
Deum nobis leniens.

44. Ave, per quam escam quaerunt,
Resurgendi qui ruerunt

In virtutum acie,
Tuum nunc per spiritale
Imple nostrum animale

Pandens manum gratiae,

45. Ave, Deum quae in vita
Laudasti, cum iam unita

Laudes et in anima,
Compeditos in peccatis
Solve, caecos veritatis

Luce ornans intima.

46. Ave, carens omni fraude,
Quae iucunda canis laude

Decoraque filio,
Ipse corde tribulatos
Sanans ducat ad beatos

Tuo nos auxilio.

47. Ave, terra, ad quam misit
Verbum Deus, quo elisit

Damnum multifarium,
Pro te panem vitae genti
Veri adeps det frumenti

Vincens adversarium.

48. Ave, laudans, quam et poli
Cives laudant atque soli

Cum creatis omnibus,
Da, ut nobis Christo iunctis
Hymnus sit cum sanctis cunctis

Caelique ordinibus.

49. Ave, quae in tuo rege,
Qui pro suo ruit grege,

Gaudes, Sion filia,
Horum laude canticorum
Exsultantes ad sanctorum

Induc nos cubilia.

50. Ave, mater, in qua natus,
Pater simul et beatus

Laudatur paraclitus,
Trinitatem istam pure
Nos laudare fac, quam iure

Laudat omnis spiritus.

Conclusio.

Haec tibi, virgo pia, sint carmina grata, Maria,
Ut sis ipsa via miseris ad culmina dia,
Sint componenti veniae locus atque legenti,
Sint fluidae menti spes solamenque maerenti,
Quae pater et flamen cum nato conferat. Amen.