Secunda Quinquagena.

1. Nam puteus pulcherrime
Prosilientis aquae
Fecundat tis uberrime
Virgultum circumquaque.

2. Est tuum viridarium
Omnino dulcorosum
Et omne pigmentarium
Excellit odorosum,

3. Diversis aromatibus

Quod undique redundat
Et floridis ornatibus
Ubilibet abundat.

4. Ibidem vigens copia
Valentium herbarum,
Sed abest et inopia
Spirantium virgarum

5. Cum nimia fragrantia
Multarum specierum
Et divite substantia
Gratissimarum rerum.

6. Tu gaudes in deliciis
Obrizo fulvens auro,
Redundans in divitiis
Ex maximo thesauro.

7. Amanda Sion filia,
Regalis ornamenti,
Tu vales super milia
Tam auri quam argenti.

8. Tu, mater, es prae caelicis
Virtutibus ornata,
Tu cunctis et angelicis
Spiritibus praelata.

9. Vestita solis lumine

Coniunctaque Messiae,
Resplendes in cacumine
Caelestis hierarchiae

10. In celsi throni sedibus
Cum immortali veste,
Nam calcas lunam pedibus
Apocalypsi teste.

11. Nitescis miro schemate,
Regina puellarum,
Cum claro diademate
Duodecim stellarum.

12. Mirificis fulgoribus

Clarescis ut aurora,
Magnificis splendoribus
Es utique decora.

13. Venusta rutilantia

Tu sidera cum stellis
Ac signa radiantia
Praeclarius excellis,

14. Limpidulum luciferum

Cum omnibus planetis,
Zodiacum signiferum
Cum candidis cometis.

15. Iam splendes super Hyadem
Et globum sublunarem,
Arcophylaxem, Plyadem
Et radium solarem.

16. Excellis claram eiice
Boetem, Orionem
Ac omnem lucis caelicae
Praeconstellationem.

17. Refulges super Iridem
Praeclare rutilantem,
Recurvam, flavam, viridem,
Luciflue micantem.

18. Illustras super fulmina
Tu coruscationis
Et super alta culmina
Caelestis regionis.

19. Beata, quae signaculum
Es sanctae trinitatis,
Electum habitaculum
Supernae deitatis.

20. Virtutes et archangeli

Te, virgo, venerantur,
Et potestates, angeli
Cum thronis famulantur.

21. Sic Seraphim altissima,
Sic ordo principatus,
Sic Cherubim sanctissima
Cum choro dominatus.

22. E quibus tu harmoniam
Fiellae semper audis
Et citharae symphoniam
Cum hymno tuae laudis,

23. Tam suave resonantia
Psalteria cum sistris
Ac organa crepantia

Cum lyris tymphanistris.

24. Blandisone clangentibus

Cum cymbalis exsultas,
In tubis perstrepentibus
Tu iubilum auscultas.

25. En, virgo praecellentiam
Quis tuam enarrabit?
Secundum exigentiam
Quis te praeconizabit?

26. Nam multum affectaverant
Te sancti patriarchae,
Qui pridem adoptaverant
Videre te non parce.

27. Et omnes sut aenigmate
Te concinunt prophetae,
Teque sub paradigmate
Metrificant poetae.

28. Duodecim similiter
Apostoli beati
Te dominam stabiliter
Laudare sunt parati.

29. In hymnis te magnificant
Evangelistae sancti,
Qui semper te glorificant
In laude gratulanti.

30. Cum iubilo sacerrimi
Te martyres invicti
Collaudant, celeberrimi
Tirones benedicti.

31. Tam sacrosancti domini,
Benigni confessores,
Decantant tuo nomini
Iam laudes et honores.

32. Venustae praeamabiles
Te virgines sectantur,
Ac cantus delectabiles
Hae tibi modulantur.

33. Sed dulci cum symphonia
Te colunt continentes
Magnifica praeconia
Tibique concinentes.

34. Fidelium convivio

Te laudat animarum
Supercaelestis unio
Concivium sanctarum.

35. In vocibus altisonis

Te colunt omnes sancti,
In laudibus dulcisonis
Ac hymno iubilanti.

36. Laudare te monasticus

Nunc, ecce, studet chorus
Nec non ecclesiasticus,
In cantico sonorus.

37. Iam praedicant theologi
Te, virgo, canonistae,
Morales physiologi,
Philosophi, legistae.

38. Virtutes tui nominis
Pontifices adorant,
Cum regibus et dominis
Te principes implorant.

39. Sic duces cum comitibus,
Primates, marchiones,
Praefecti cum equitibus
Et praesides turones

40. Te nunc cum potestatibus
Adorant castellani,
Barones cum magnatibus
Et proceres urbani.

41. Votiva te plebecula

Communis, ecce, laudat,
Quae per aeterna saecula
Te dominam collaudat.

42. Venusta, celeberrima,
Benevola Maria,
Matrona tam sacerrima,
Fidelis atque pia,

43. Saluto te millesies,
O virgo generosa,
Ac iterum centesies,
Iuvencula formosa.

44. Virago fortitudinis,

Maestorum consolatrix,
Imago pulchritudinis,
Caelorum imperatrix.

45. Naturae stupet ratio,

Quod virgo sis et parens,
Miratur Evae natio,

Cum tu sis labe carens.

46. In tuo gestas grabbato,
Qui zabulum deiecit
Ac hominem in sabbato
Curando salvum fecit.

47. Gratanter infra gremium
Fers mundi salvatorem,
Salutis nostrae praemium
Mundique plasmatorem,

48. Eternum unigenitum

Ex Deo summo patre,
Praeclarum soligenitum
Ex te sincera matre,

49. Nec minus Deum Dominum,
Infantem speciosum
Prae filiis et hominum
Aspectu gratiosum,

50. Initium qui luminis

Est lucis ante solem,
Qui cum virtute numinis
Sustentat terrae molem.