25. De sancto Matthaeo.

In 1. Vesperis.
Antiphonae.

I. Recensentes mira Dei

Pietatis munia,
Praecingamur ad Matthaei

Votiva sollemnia.
2. Lucris hians telonei

Fruitione publica

Fit conversis forma spei
Actione typica.

3. Prima Christi iussione
Linquens mundi stadia
Magistrat conspersione
Fermenti repudia.

4. Invitatis publicanis
Ad Christi convivia

Docet, aegris plus quam sanis
Opus fore gratia.

R. In figura prophetali
Sub figura bestiali

Comparatus homini,
Iuxta formae rationem
Texit generationem
Carnis Christi Domini,
V. Sic promissum probat missum
Hunc Messiam per Mariam
Iudaeorum germini.

Ad Magnificat.

A. Pange, Sion,

laude magnifica
Salvatoris

gesta mirifica,
Qui Matthaeum

de sorte publica
Dignum [sorte]

dat evangelica.

Ad Matutinum.

Antiphonae.

1. Clangas sacris in Matthaei,
Tuba neomenia,
Laudent iusti, sperent rei
De peccati venia.
2. Vere verax salvatoris
Probatur assertio:
Nolo mortem peccatoris,
Sed placet conversio.
3. Vice fungens exactoris
Fisci rei publicae,
Artem mutat assertoris
Fidei catholicae.
4. Inclamatus tuae, Christe,
Vocis ad imperium
Surgit et evangelistae
Subit ministerium.
5. Verbi gesta incarnati

Stringens in volumine,
Pandit stirpem propagati
De regali germine.

6. Primo docens in Iudaea,
Post in Macedonia,
Lingua prompsit in Hebraea
Messiae praeconia.

Responsoria.

1. Zelo fervens pietatis

A primis ecclesia
Repulsaque caecitatis

Iudaeae perfidia
Sparsit semen veritatis

Per orbis confinia,
V. Missis verbi destinatis

Cum signorum copia
In Matthaei sortem gratis

Cessit Aethiopia.

2. In hac dudum dementata

Fictione magica
Gens errabat excaecata

Fraude diabolica,
Vera credens obfuscata

Specie phantastica,
V, Sed errantis miserata

Plebis virtus deica
Luce fucis adumbrata

Purgas evangelica.
3. Quos Cosroes et Arphaxat

Ligat astu carminis,
Hos Matthaeus mox relaxat

In virtute numinis,
Signo consignans dumtaxat

Pretiosi nominis ;
V. Quos diversus dolor taxat

Ob reatum criminis,
Hos Matthaeus vima laxat

Fusi Christi sanguinis.
4. Ad haec visa tabescentes

Magi vires exserunt
Et confundi gemiscentes

Ad fraudes se conferunt,
Dum dracones flammescentes

In Matthaeum ingerunt;
V. Signo crucis fatiscentes

Vim nocendi deserunt,
Atque somno torpescentes

Christi numen asserunt.

In 2. Nocturno.
Antiphonae.

1. Hunc Candaces admiratus
Virtutis indicio
Ad Matthaei pedes stratus
Colligit hospitio.

2. Verba vitae sitientes

Ad hunc multi confluunt
Atque Christum confitentes
Ritum gentis despuunt.

3. Hos Matthaeus catechizans
Christi fide imbuit,
Instructos quoque baptizans
A peccatis abluit.

4. Haec Candacis dum fiebant
Intra domicilium,
En, defunctum qui plangebant,
Multi regis filium

5. Circa funus magi stantes
Regis ex imperio
Frustra manes invocantes
Agunt magisterio.

6. Sed complere non valentes
Coeptum sacrilegium
Raptum suadent nescientes
A diis in collegium.

Responsoria.

1. Maiestatis laesae rei

De more fallacium
Fausta spondent falsae spei

Donantes solatium,
Ut imago fiat ei,

Mandant, et palatium.
V. Haec Candaci natu Dei

Salutis consilium
Dant reginae, ut Matthaci

Petatur auxilium.
2. Destinantur honorati

Mox a regis latere
Postulantes hoc legati,

Ut Matthaeus propere
Tantae velit orbitati

Clementer succurrere,

V. Summae preces maiestati
Dignetur effundere
Ac defuncti corpus nati
Vitae restituere.

3. Venienti cum legatis

Matthaeo regalibus
Euphemissa festinatis

Obcurit incessibus,
Dans maternae pietatis

Fletum cum gemitibus:
V. Vivum, ait, desolatis

Natum redde precibus,
Ut sermonem veritatis

Confirmes operibus.
4. In excelsum tendens manus

Matthaeus cum lumine:
Cedat, inquit, error vanus

Ab his per te. Domine,
Resurgatque puer sanus.

Mox in Christi nomine
V. Excitatus a defunctis

Resumpto spiramine
Surgit puer coram cunctis

Crucifixi numine.

In 3. Nocturno.
Ad Cantica.
A. Hoc confuso signo magi
Fugiunt in Persidam
Et erroris umbra vagi
Gentem caecant perfidam.

Responsoria.
1. Stupens signi novitate
Regis cor extimuit
Et regali dignitate

Coronandum statuit
Ac divali pietate

Hunc colendum monuit,
V. Ab hac plebem caecitate
Matthaeus compescuit
Et hunc sola deitate
Cultum dignum docuit.

2. Regnum Christi dilatatur.
Credit Aethiopia,
Fonte sacro candidatur
Eglippi prosapia,

Et cum rege baptizatur
Multa plebis copia ;
V. Per Matthaeum propulsatur
Gentilis perfidia,

Prole nova fecundatur
Et floret ecclesia.

3. Thoro spreto maritali

Ad Matthaei genua
Cum cohorte virginali

Procidens ingenua
Fide nubit aeternali

Regi Ephigenia,
V. Hostis arte spiritali

Declinans ingenia
Voto sanctimonialis

Carnis calcat naenia.
4. Venustatis os admirans

Hirtacus ingemuit
Et porcorum fraude gyrans

Preces, minas miscuit,
Nunc demulcens, nunc delirans

Hanc mutare studuit ;
V. Virgo Christi fide spirans

Spem consensus abnuit,
Non terrentis minas curans

Preces, dona respuit.

In Laudibus.

Nuper Psalmos.

A. A Matthaeo redargutus
IIirtacus infremuit
Et monentem persecutus
Furore efferbuit.

Ad Benedictus.

A. Dum Matthaeus
defixis genibus
Secus aram

profusis precibus
Orat Christum,
hunc a cervicibus

Lictor pungit

et in caelestibus
Morte sacra

iungit martyribus.

Ad Horas.
Ad Primam.

A. Plebs Matthaei venerandum
Audiens martyrium,
Tota currit ad cremandum
Hirtaci palatium.

Ad Tertiam.

A. Obcurrentes cum placore
Matthaei discipuli
Vix sedarunt a furore
Commotum cor populi.

Ad Sextum.

A. Ad Matthaei nutu Dei
Currens puer tumulum
Hoste pressus est confessus
Hirtaci piaculum.

Ad Nonam.

A. Hirtacus lepra perfusus
Divino iudicio
Mente captus et confusus
Se transfodit gladio.

In 2. Vesperis.
Ad Magnificat.

A. O Matthaee, laus ludaeae,

Stirpis flos leviticae,
Vas insigne, doctor digne

Fidei catholicae,
Assistentes et plaudentes

In tui memoria
Nos, patrone, fac coronae

Consortes in gloria.