Tertia Quinquagena.

1. Tremendus Deus Dominus
Et conditor naturae,
Creator nihilominus
Totius creaturae,

2. Viventis Dei filius,
Ex Deo patre natus,
Qui fuit mirabilius
Ex temet incarnatus,

3. Stellatum hemisphaerium
Illuminans supernum,
Qui regnum ac imperium
Gubernat in aeternum.

4. Decoris castimoniae,
Maria, tu exemplum
Es atque sanctimoniae
Spirituale templum,

5. Omnimode gratissima,

Praerutilans, praeclara,
Quae es et praepurissima,
Caelesti Deo cara.

6. Matrona summe nobilis,
O domina caelorum,
Tu salus es immobilis
Et decus angelorum.

7. In caeli magnitudine
Tu tenes principatum,
In poli celsitudine

Tu praefers dominatum.

8. Nam omnis te caelicola
Condigne veneratur,
Ac quilibet christicola
Devote te precatur.

9. Virginea puellula,

Quae parem non vidisti,
Praepura Dei cellula,
Quae marem non novisti.

10. Subtilis sine macula,

Praepulchra, praeserena,
Praepollens per miracula
Tu es et praeamoena.

11. Nimirum pulchritudinem
Tis Deus concupivit
Et propter mansuetudinem
Te oleo linivit.

12. O tu misericordiae

Spes semper immortalis,
Tu pacis et concordiae
Donatrix aeternalis.

13. Stirps nobilis, humillima,

Progenies divina,

Tu tutrix es agillima,

Magnifica regina.

14. Te virginem puerperam
In matrem Iesu Christi
Elegit Deus, perperam
Quae nunquam commisisti.

15. Es vere mater veniae
Condigne nominata,
Regali de progenie
Praeclare propagata.

16. Referta plena gratia
Divinae bonitatis,
Refulges in galaxia
Cum sanctis et beatis.

17. In cunctis mundi finibus
Tu rite praedicaris,
Prae ceteris virginibus
Tu mire collaudaris.

18. Hinc igitur, egregia,
Clarissima matrona,
Propago diva, regia,
Maria, summe bona,

19. Electum quae refugium
Es omni paenitenti,
Quae nemini repudium
Das veniam poscenti.

20. Sanctissima, pulcherrima,
Suavis et amoena,
Gratissima, sacerrima,
Divinitate plena,

21. Virgineam clementiam
Flebiliter exoro
Tuamque praecellentiam
Humiliter imploro.

22. Succurre, Sion filia
Decora, mibi reo,
Me prece reconcilia
Cunctipotenti Deo.

23. Cum miser ego variis
Me culpis inquinavi,
Peccatis multifariis
Qui Deum irritavi,

24. Respicito, carissima,

Me, domina benigna,
Matrona clementissima,
Supremo Deo digua.

25. Intuere culpabilem

Me vere paenitentem,
Indignum, miserabilem,
Te pie requirentem.

26. Sis memor mei flebilis,
Indigni peccatoris,
Homuncionis debilis,

Stirps alma redemptoris.

27. Tu vere mater gratiae,

Succurre paenitenti,

Tu, domina, cum facie

Me respice clementi.

28. Velociter exaudias

Me, virgo, supplicantem,
Me patienter audias
Humillime precantem.

29. Succurre contra Satanae
Versutias abundas
Et erga Leviathanae
Argutias immundas.

30. Vecordiam, vesaniam,
O domina, repelle,
Discordiam, insaniam
A me procul propelle.

31. Exstingue capitalia
Peccata criminosa,
Praecipue moralia
Delicta vitiosa.

32. Restringe mundi gloriam
Velociter labentem,
Caducam, transitoriam,
Sophistice fallentem.

33. Ut per te adinveniam
In gaudio iustorum,
Exora mihi veniam
Meorum delictorum.

34. Sic bona temporalia
Concede pertransire,
Ut queam aeternalia
Paratim invenire.

35. Da mihi necessaria

Praesentis huius vitae,
Devincam ut contraria
Vivendo sine lite.

36. Et sensus meos regere
Dignare, virgo pura,
Benevole protegere
Me, diva mater, cura,

37. Ut valeam ubilibet
Me gerere securus,
Nec inimicus quilibet
Me noceat praedurus.

38. Sint omnia, quae facio,
Sic utinam modesta,
Quod mea conversatio
Sit nemini molesta.

39. Et in tentationibus

Adesto sublevamen,
In meditationibus
Aspira dulcoramen.

40. Tu bonis in operibus,
O virgo, me dignare
Cum mysticis muneribus
Benigne roborare.

41. Horrendis a periculis
Me sedula defende,
In cunctis offendiculis
Solacium impende.

42. O virgo venerabilis,

Adiutrix immo fortis,
Sis custos mei stabilis
In hora meae mortis.

43. Me contra diabolicas
Insidias protervas
Defendas ad catholicas
Me iungasque catervas.

44. O domina pulcherrima,
Succurre tua prece,
Quod eruar acerrima
Tunc a perenni nece.

45. Ast impetra me leniter
Post obitum purgari,
Quod cum electis breviter
Queam inthronizari

46. In gloriosa patria,

Iucunda, caelestina,
Qua perpes iugis latria,
Fluitio divina,

47. Assidua laetitia,

Concentus angelorum,
Pax, quies, amicitia

Conventusque sanctorum,

48. Multiplicatum gaudium
Glorificationis,
Tripudium, adplaudium,
Vox exsultationis,

49. Eterna contemplatio
Supernae deitatis,
Laus, salus, iubilatio
Melosque suavitatis.

50. Nunc, domina carissima,
Flos, decus virginale,
Matrona sincerissima,
Tu in aeternum vale.