Secunda Quinquagena.

1. Ave, in qua vivunt cuncti,

Data mundo imperatrix.

2. Ave, solamen defuncti,

Nuncupata reparatrix.

3. Ave, collatrix veniae,

Vera mater orphanorum.

4. Ave, largitrix gratiae,

Sublevatrix turbatorum.

5. Ave, infundens virtutes,

Domini thesauraria.

6. Ave, maestos ut adiuves,

Clamat nostra miseria.

7. Ave, datrix largissima

Donorum sancti spiritus.

8. Ave, tu potentissima

In aethere divinitus.

9. Ave poli clavigera,

Per quam possidetur caelum.

10. Ave, celsa armigera,

Repellens hostile telum.

11. Ave, mandans daemonibus

Per natam auctoritatem.

12. Ave, quae das pectoribus

Spem, fidem et caritatem.

13. Ave, mater terrifica

Potestati contrariae.

14. Ave, virgo deifica,

Summae socians patriae.

15. Ave, tu imperiosa

Terrae, mari, mundo, caelo.

16. Ave, rectrix virtuosa

In universo saeculo.

17. Ave, patriarchis cunctis

Longe es praestantior.

18. Ave, prophetis defunctis

In donis abundantior.

19. Ave, David stirpe nata,

Florens velut rosa vernans.

20. Ave, ab Abraham data,

Aeternaliter gubernans.

21. Ave, generosa proles

A Salomone edita.

22. Ave, quae florere soles

Sophia patris praedita.

23. Ave, tu ab Isaia

Luculenter praesagita.

24. Ave, quae ab harmonia

Davidica es praescita.

25. Ave, ab Ezechiele

Porta clausa praedicaris.

26. Ave, quae in Daniele

Per Susannam figuralis.

27. Ave, quae a Ieremia

Desolata lugubraris.

28. Ave, iugiter in via

Spiritalem prolem paris.

29. Ave, columna ignita,

Decora arca foederis.

30. Ave, quoniam sunt sita

In te abdita aetheris.

31. Ave, limpidus crystallus,

Carbunculo splendidior.

32. Ave, rubra ut corallus,

Margarita candidior.

33. Ave, velut chrysoprassus

Pulchra decore interno.

34. Ave, fac, ut homo lassus

Surgat ardore superno.

35. Ave, mater gracilior

Rubenti amethysto.

36. Ave, et amabilior

Cunctis speculo in isto.

37. Ave, specimen pudoris,

O lilium convallium.

38. Ave, caelicis in oris

Residens in perpetuum.

39. Ave, o virgula fumi,

Aromate acceptior.

40. Ave, sponsa regis summi,

Murra prima perfectior.

41. Ave, dulce cinnamomum

Flagrantiorque balsamo.

42. Ave, caelicum quae domum

Sollerti construis palmo.

43. Ave, vellus Gedeonis,

Liliis redolentior.

44. Ave, spiritibus bonis

Caritate ferventior.

45. Ave, cedro sublimior

Proceriorque cupresso.

46. Ave, palmae eximior,

Subveni mente depresso.

47. Ave, platano similis,

Fecunda velut oliva.

48. Ave, collata hinnulis

Extricans corda captiva.

49. Ave, hortus voluptatis,

Fons signatus divinitus.

50. Ave, dans haurire gratis

De aquis datis caelitus.